બેંગલુરુમાં વરસાદી કહેર: દીવાલ ધરાશાયી થતા 7નાં મોત, અનેક ઘાયલ

કર્ણાટકની રાજધાની બેંગલુરુમાં ભારે વરસાદ વચ્ચે મોટી દુર્ઘટના સર્જાઈ છે. મંગળવારે સાંજે શિવાજીનગર વિસ્તારમાં લેડી કર્ઝન હોસ્પિટલ નજીક એક કમ્પાઉન્ડની દીવાલ અચાનક ધરાશાયી થતાં ઓછામાં ઓછા 7 લોકોના મોત થયા છે.

વરસાદ અને પવન વચ્ચે દુર્ઘટના
માહિતી મુજબ સાંજે લગભગ 5 વાગ્યે ભારે પવન અને ગાજવીજ સાથે વરસાદ શરૂ થયો હતો, જે લગભગ એક કલાક સુધી ચાલુ રહ્યો હતો. ખરાબ હવામાનથી બચવા માટે ઘણા લોકો હોસ્પિટલના પરિસરમાં આશરો લેવા ગયા હતા, ત્યારે જ દીવાલ તૂટી પડતાં તેઓ તેની ચપેટમાં આવી ગયા હતા.

બચાવ કામગીરી ચાલુ
આ ઘટનામાં 3 લોકો ગંભીર રીતે ઘાયલ થયા છે, જેમને તાત્કાલિક હોસ્પિટલમાં દાખલ કરવામાં આવ્યા છે. હજુ પણ કાટમાળ નીચે કેટલાક લોકો ફસાયેલા હોવાની આશંકા છે, જેના કારણે મૃતકોની સંખ્યા વધવાની ભીતિ છે. રાહત અને બચાવ કામગીરી સતત ચાલુ છે.

CM અને DyCMએ સ્થળની મુલાકાત લીધી
ઘટનાની જાણ થતાં જ કર્ણાટકના મુખ્યમંત્રી સિદ્ધારમૈયા સ્થળ પર પહોંચી પરિસ્થિતિની સમીક્ષા કરી હતી. તેમણે અધિકારીઓને કડક સૂચનાઓ આપી અને ઘટનાને લઈને નારાજગી વ્યક્ત કરી હતી. મૃતકોના પરિવારોને 5 લાખ રૂપિયાની સહાય જાહેર કરવામાં આવી છે. ઉપમુખ્યમંત્રી ડી.કે. શિવકુમારએ પણ ઘટનાસ્થળની મુલાકાત લઈને રાહત કામગીરીની સમીક્ષા કરી હતી.

રાજકીય પ્રતિક્રિયાઓ
આ દુર્ઘટના બાદ રાજકીય પ્રતિક્રિયાઓ પણ સામે આવી છે. સી.ટી. રવિએ મૃતકોની સંખ્યા વધવાની શક્યતા વ્યક્ત કરી અને સરકારને પીડિતોને તાત્કાલિક સહાય પર ધ્યાન આપવા જણાવ્યું.

વિસ્તારમાં ભયનો માહોલ
સતત વરસાદને કારણે રાહત કામગીરીમાં મુશ્કેલીઓ ઊભી થઈ રહી છે. ઘટનાસ્થળે ચીસો અને અરેરાટી વચ્ચે પરિવારજનો રડતા જોવા મળ્યા હતા, જેના કારણે સમગ્ર વિસ્તારમાં ભયનો માહોલ છવાયો છે.