રાજકોટમાં નિવેદનથી વિવાદ: મોના થીબાની સ્પષ્ટતા અને જાહેર માફી

રાજકોટમાં ગુજરાતી ફિલ્મના પ્રમોશન દરમિયાન અભિનેત્રી મોના થીબાના વેશ્યાવૃત્તિ અંગેના નિવેદનથી ઊભેલા વિવાદ બાદ તેમણે જાહેરમાં માફી માંગી છે. સોશિયલ મીડિયા પર ભારે ચર્ચા અને વિરોધ વચ્ચે અભિનેત્રીએ સ્પષ્ટતા કરી કે તેમની વાત ફિલ્મના સંદર્ભમાં કરવામાં આવી હતી, પરંતુ તેને અલગ રીતે રજૂ કરવામાં આવી.

વિવાદ બાદ મોના થીબાની સ્પષ્ટતા
મોના થીબાએ જણાવ્યું કે, “મેં મારી આવનારી ફિલ્મ ‘શક્તિ’ના સંદર્ભમાં આ વાત કરી હતી. રિસર્ચ દરમિયાન વેશ્યાવૃત્તિ સાથે સંકળાયેલી મહિલાઓ સાથે ચર્ચા થઈ હતી. ફિલ્મના સંદર્ભમાં કરેલી વાતને ખોટી રીતે રજૂ કરવામાં આવી છે. મારી વાતથી કોઈને ઠેસ પહોંચી હોય તો હું દિલથી માફી માંગું છું. અમે સમાજ અને સંસ્કૃતિ સાથે જોડાયેલા લોકો છીએ.”

ઉલ્લેખનીય છે કે રાજકોટમાં ફિલ્મના પ્રમોશન દરમિયાન મોના થીબાએ વેશ્યાવૃત્તિને “એક પ્રકારની સમાજ સેવા” તરીકે વર્ણવી હતી. સાથે જ તેમણે દાવો કર્યો હતો કે દેહવ્યાપારના કારણે બહેનો અને પુત્રીઓ પર બળાત્કારની ઘટનાઓ ઓછી રહેતી હોઈ શકે છે. આ નિવેદન બાદ સોશિયલ મીડિયા પર વ્યાપક વિરોધ જોવા મળ્યો હતો.

રાજકીય અને સામાજિક પ્રતિક્રિયા
કોંગ્રેસ આગેવાન નયનાબા જાડેજાએ મોના થીબાના નિવેદનનો કડક વિરોધ નોંધાવ્યો હતો. તેમણે કહ્યું કે, “વૈશ્યાવૃત્તિ ઘણા લોકો મજબૂરીમાં કરતાં હોય છે અને કેટલાક મરજીથી પણ કરતાં હોય છે, પરંતુ તેને સમાજ સેવા ગણાવવી દુર્ભાગ્યપૂર્ણ વાત છે. એક મહિલા તરીકે આવું નિવેદન કરવું શરમજનક છે.” તેમણે સ્ત્રીઓ પર થતા અત્યાચાર જેવા મુદ્દાઓ પર ફિલ્મ બનાવવા અપીલ પણ કરી.

આ ઉપરાંત પાટીદાર અગ્રણી પુરુષોત્તમ પીપળીયાએ પણ નિવેદનને અપરિપક્વ ગણાવ્યું. તેમણે જણાવ્યું કે, “સમાજમાં સંસ્કૃતિ અને મૂલ્યોને ધ્યાનમાં રાખીને જ જાહેરમાં નિવેદન કરવું જોઈએ. સંવેદનશીલ મુદ્દાઓ પર વધુ જવાબદારી જરૂરી છે.”

સોશિયલ મીડિયા પર મિશ્ર પ્રતિસાદ
મોના થીબાના નિવેદન બાદ વિવિધ સામાજિક સંગઠનો અને નાગરિકોમાં અસંતોષ ફેલાયો છે. ઘણા લોકોએ સોશિયલ મીડિયા પર ટીકાઓ કરી છે, જ્યારે કેટલાક લોકોએ તેમના નિવેદનને ફિલ્મના વિષય સાથે જોડાયેલ સંદર્ભમાં જોવાની પણ વાત કરી છે.

હાલ અભિનેત્રી દ્વારા માફી માગ્યા બાદ મામલો શાંત પડે છે કે નહીં તે જોવાનું રહેશે, પરંતુ આ સમગ્ર ઘટનાએ સંવેદનશીલ મુદ્દાઓ પર જાહેરમાં બોલતી વખતે જવાબદારી અને સંવેદનશીલતાની જરૂરિયાત ફરી એકવાર ઉજાગર કરી છે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in