Bindia
રવિવારે દુબઈમાં યોજાયેલી ACC અંડર-19 એશિયા કપ 2025ની ફાઈનલ બાદ યોજાયેલા સન્માન સમારોહ દરમિયાન એક રસપ્રદ અને ચર્ચાસ્પદ દૃશ્ય સામે આવ્યું. પાકિસ્તાનની જીત બાદ એશિયન ક્રિકેટ કાઉન્સિલ (ACC)ના પ્રમુખ અને પાકિસ્તાન ક્રિકેટ બોર્ડ (PCB)ના અધ્યક્ષ મોહસીન નકવી સ્ટેજ પર હાજર રહ્યા અને પાકિસ્તાની ટીમને વિજેતા મેડલ અર્પણ કર્યા.
જોકે, જ્યારે રનર્સ-અપ ટીમ ઇન્ડિયાને મેડલ આપવાનો વારો આવ્યો, ત્યારે ભારતીય ખેલાડીઓએ મોહસીન નકવી સાથે સ્ટેજ શેર કરવાનું ટાળ્યું. ભારતીય અંડર-19 ટીમ મુખ્ય સ્ટેજ પર ગઈ નહીં અને ત્યાં હાજર ICCના અધિકારી મુબાશ્શીર ઉસ્માની પાસેથી પોતાના મેડલ સ્વીકાર્યા. આ ઘટનાનો વીડિયો અને તસવીરો સોશિયલ મીડિયા પર ઝડપથી વાયરલ થયા છે.
ઉલ્લેખનીય છે કે રવિવારે ફાઈનલ મેચમાં પાકિસ્તાન અંડર-19 ટીમે ભારતને 191 રનથી હરાવીને એશિયા કપ ટ્રોફી પોતાના નામે કરી હતી. મેચ બાદ સન્માન સમારોહમાં ભારતીય ટીમનો આ વલણ સ્પષ્ટ રીતે જોવા મળ્યો.
ભારતીય ટીમ દ્વારા મોહસીન નકવી સાથે સંપર્ક ટાળવાનો મુખ્ય કારણ તેમનો બેવડો પદ માનવામાં આવી રહ્યો છે. નકવી માત્ર PCBના અધ્યક્ષ જ નથી, પરંતુ તેઓ પાકિસ્તાનના ગૃહમંત્રી પણ છે. ભારત તરફથી આ વલણ સરહદ પારની આતંકવાદી પ્રવૃત્તિઓ સામે વિરોધ અને સંવેદનશીલતા તરીકે જોવામાં આવે છે.
ખેલાડીઓ અને ક્રિકેટ બોર્ડના સૂત્રોનું માનવું છે કે આવા અધિકારીઓ સાથે ઔપચારિક મુલાકાત અથવા અભિવાદન કરવું આતંકવાદી હુમલાઓમાં શહીદ થયેલા જવાનો અને તેમના પરિવારની લાગણીઓ સામે હોઈ શકે છે. આ પ્રકારનું કડક વલણ ભારતીય ટીમે સપ્ટેમ્બર 2025થી અપનાવ્યું છે.
આ પહેલાં સિનિયર એશિયા કપ દરમિયાન પણ ભારતીય T20 ટીમના કેપ્ટન સૂર્યકુમાર યાદવે પહેલગામ (જમ્મુ-કાશ્મીર)માં થયેલા આતંકી હુમલાના પીડિતોને શ્રદ્ધાંજલિ રૂપે પાકિસ્તાની કેપ્ટન સલમાન અલી આગા સાથે હાથ મિલાવવાનો ઇનકાર કર્યો હતો.
આ જ ‘નો-હેન્ડશેક પ્રોટોકોલ’ એશિયા કપ 2025 દરમિયાન પણ ચાલુ રહ્યો હતો. ફાઈનલ બાદ તણાવ ત્યારે વધુ વધ્યો હતો જ્યારે વિજેતા ભારતીય ટીમે PCB અધ્યક્ષ મોહસીન નકવી પાસેથી ટ્રોફી સ્વીકારવાનો ઇનકાર કર્યો હતો. કહેવાય છે કે ગુસ્સે ભરાયેલા નકવી ટ્રોફી લઈને સ્ટેજ પરથી ચાલ્યા ગયા હતા અને ત્યારબાદ તે ટ્રોફી ભારતીય ટીમને રજૂ કરવામાં આવી નહોતી.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
