Bindia
રાજ્યમાં તાજેતરમાં થયેલા કમોસમી અને ભારે વરસાદથી થયેલા નુકસાન બાદ ખેડૂતોને તાત્કાલિક રાહત મળે તે હેતુથી રાજ્ય સરકારે ઐતિહાસિક પગલાં લીધાં છે. ગાંધીનગર ખાતે મુખ્યમંત્રી ભૂપેન્દ્ર પટેલની અધ્યક્ષતામાં યોજાયેલી રાજ્ય મંત્રીમંડળની બેઠકમાં કૃષિ રાહત પેકેજ અને ટેકાના ભાવે ખરીદીની પ્રગતિની વિગતવાર સમીક્ષા કરવામાં આવી હતી.
બેઠક બાદ પત્રકારોને માહિતી આપતા પ્રવક્તા મંત્રી જીતુ વાઘાણીએ જણાવ્યું હતું કે, રાજ્ય સરકાર દ્વારા ભારે વરસાદથી અસરગ્રસ્ત જિલ્લાઓ માટે ખૂબ જ ટૂંકા સમયગાળામાં બે અલગ-અલગ ઐતિહાસિક કૃષિ રાહત પેકેજ જાહેર કરવામાં આવ્યા હતા, જેનાથી રાજ્યના લાખો ખેડૂતોને સીધી રાહત મળી છે.
5,330 કરોડથી વધુની સહાય સીધી બેંક ખાતામાં
પ્રવક્તા મંત્રીના જણાવ્યા અનુસાર, આ બંને કૃષિ રાહત પેકેજ અંતર્ગત ખેડૂતોને સહાય આપવા માટે અત્યાર સુધીમાં 23.18 લાખ ખેડૂતોના કુલ રૂ. 6,890.98 કરોડના ઓનલાઈન બિલો તૈયાર કરવામાં આવ્યા છે. જેમાંથી આજદિન સુધીમાં 17.92 લાખ ખેડૂતોને રૂ. 5,330.43 કરોડથી વધુની સહાય સીધી તેમના બેંક ખાતામાં જમા કરવામાં આવી છે.
તેમણે વધુમાં જણાવ્યું કે, કમોસમી વરસાદની અણધારી આફતમાં ખેડૂતોને મદદરૂપ થવા મુખ્યમંત્રી ભૂપેન્દ્ર પટેલના માર્ગદર્શન હેઠળ રાજ્ય સરકારે કુલ રૂ. 11,000 કરોડથી વધુના મૂલ્યના બે ઐતિહાસિક કૃષિ રાહત પેકેજ જાહેર કર્યા હતા. આ પેકેજ અંતર્ગત રાજ્યભરમાંથી 30.71 લાખથી વધુ ખેડૂતો દ્વારા ઓનલાઈન અરજીઓ કરવામાં આવી હતી, જેમાંથી 26.60 લાખથી વધુ અરજીઓ તબક્કાવાર મંજૂર કરવામાં આવી છે.
ટેકાના ભાવે ખરીદીમાં ઐતિહાસિક વધારો
પ્રવક્તા મંત્રીએ રાજ્યમાં મગફળી, મગ, અડદ અને સોયાબીનની ટેકાના ભાવે ચાલી રહેલી ખરીદી અંગે પણ વિગતવાર માહિતી આપી હતી. તેમણે જણાવ્યું કે, ચાલુ વર્ષે ટેકાના ભાવે વેચાણ માટે થયેલી નોંધણીમાં ગત વર્ષ કરતાં અઢી ગણો વધારો નોંધાયો છે, જે ખેડૂતોમાં સરકારની નીતિ પ્રત્યે વિશ્વાસ દર્શાવે છે.
રાજ્યમાં મગફળીની ખરીદી માટે 114 તાલુકામાં કુલ 317 ખરીદ કેન્દ્રો કાર્યરત કરવામાં આવ્યા છે. આ કેન્દ્રો મારફતે અત્યાર સુધીમાં 4.75 લાખ ખેડૂતો પાસેથી રૂ. 7,537 કરોડના મૂલ્યની કુલ 10.49 લાખ મેટ્રિક ટન મગફળી, મગ, અડદ અને સોયાબીનની ટેકાના ભાવે ખરીદી કરવામાં આવી છે. આ ખરીદી સામે આજદિન સુધીમાં 2.18 લાખથી વધુ ખેડૂતોને રૂ. 3,468 કરોડની રકમ સીધી તેમના બેંક ખાતામાં ચૂકવવામાં આવી છે, જેનાથી ખેડૂતોને સમયસર આર્થિક સહારો મળ્યો છે.
ખેડૂતો માટે સરકારની પ્રતિબદ્ધતા સ્પષ્ટ
રાજ્ય સરકાર દ્વારા અપનાવવામાં આવેલી ઝડપી અને પારદર્શક કાર્યવાહીથી સ્પષ્ટ થાય છે કે, ખેડૂતોના હિતોની રક્ષા માટે સરકાર સતત પ્રતિબદ્ધ છે. કમોસમી વરસાદ જેવી કુદરતી આફતો સમયે તાત્કાલિક રાહત, તેમજ ટેકાના ભાવે પાક ખરીદી દ્વારા ખેડૂતોને ન્યાયસંગત ભાવ મળી રહે તે માટે રાજ્ય સરકાર દ્વારા સતત પ્રયાસો હાથ ધરવામાં આવી રહ્યા છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
