યુનિસેફનું ગંભીર એલર્ટ: ઇબોલાના વધતા કેસો, 30 લાખથી વધુ બાળકો જોખમમાં

વિશ્વમાં ફરી એકવાર ઇબોલા વાયરસનો પ્રકોપ ગંભીર સ્વરૂપ લઈ રહ્યો છે. તાજેતરના આંકડા મુજબ ઇબોલાના કુલ કેસો વધીને 1,048 થયા છે, જેમાં અત્યાર સુધી 267 લોકોના મોત નોંધાયા છે. મૃત્યુદર લગભગ 25.5 ટકા સુધી પહોંચ્યો છે. સતત વધી રહેલા કેસો હવે કોમ્યુનિટી ટ્રાન્સમિશન તરફ ઈશારો કરી રહ્યા છે, જેના કારણે વૈશ્વિક આરોગ્ય તંત્રમાં ચિંતા વધી છે. આ દરમિયાન UNICEF દ્વારા જાહેર કરાયેલા તાજા અહેવાલે પરિસ્થિતિને વધુ ગંભીર બનાવી છે, જેમાં 30 લાખથી વધુ બાળકો અને કિશોરો ગંભીર જોખમમાં હોવાનું જણાવાયું છે.

બુંડીબુગ્યો સ્ટ્રેનથી ફેલાતો પ્રકોપ
આ પ્રકોપ માટે “બુંડીબુગ્યો સ્ટ્રેન” જવાબદાર માનવામાં આવે છે. આ પ્રકારના ઇબોલા વાયરસ માટે હાલ કોઈ નિશ્ચિત વેક્સિન અથવા અસરકારક સારવાર ઉપલબ્ધ નથી. ડેમોક્રેટિક રિપબ્લિક ઓફ કોંગોના ઇતુરી પ્રાંત વિસ્તારમાં આવેલા વિસ્થાપિત કેમ્પોમાં ભારે ભીડ, નબળી સ્વચ્છતા અને આરોગ્ય સુવિધાઓના અભાવને કારણે સંક્રમણ ઝડપથી ફેલાઈ રહ્યું છે. અહેવાલ મુજબ આ વિસ્તારમાં 2.70 લાખથી વધુ લોકો વિસ્થાપિત સ્થિતિમાં રહે છે, જેમાં મોટાભાગે મહિલાઓ અને બાળકો સામેલ છે.

30 લાખથી વધુ બાળકો પર સીધો ખતરો
UNICEFના આંકડા અનુસાર 31 અસરગ્રસ્ત વિસ્તારોમાં રહેતા આશરે 29.5 લાખ બાળકો અને કિશોરો (18 વર્ષથી ઓછી ઉંમરના) ઇબોલાના સીધા જોખમમાં છે. આ સંખ્યા કુલ વસ્તીના લગભગ 54 ટકા જેટલી છે. આ બાળકો માત્ર ઇબોલાના સંક્રમણથી જ નહીં, પરંતુ તૂટી ગયેલી આરોગ્ય સેવાઓ, રસીકરણની અછત અને પોષણની સમસ્યાઓના કારણે પણ ગંભીર જોખમનો સામનો કરી રહ્યા છે.

બાળકો માટે વધુ ઘાતક સાબિત થઈ રહ્યો છે વાયરસ
આંકડા મુજબ ઇબોલાના કુલ પુષ્ટિ થયેલા કેસોમાં લગભગ 15 ટકા બાળકો છે, પરંતુ મૃત્યુઆંકમાં બાળકોનો હિસ્સો 25 ટકાથી વધુ છે. એટલે કે બાળકોમાં મૃત્યુનું જોખમ પુખ્ત વયના લોકોની તુલનામાં લગભગ બમણું છે. અત્યાર સુધી ઇતુરી વિસ્તારમાં 135 જેટલા એવા બાળકોની ઓળખ થઈ છે, જેઓ ઇબોલાના કારણે અનાથ બન્યા છે.

કુપોષણ અને નબળી રસીકરણ સ્થિતિ વધારતી મુશ્કેલી
વિસ્તારની સ્થિતિ વધુ ગંભીર બનાવે છે કુપોષણ. પાંચ વર્ષથી ઓછી ઉંમરના મોટા ભાગના બાળકો પહેલેથી જ કુપોષણથી પીડિત છે. સાથે જ નિયમિત રસીકરણની અછત પણ જોવા મળે છે, જ્યાં દરેક પાંચમાં એક બાળકને મૂળભૂત રસી પણ મળી નથી. કુપોષણ અને નબળી રોગપ્રતિકારક શક્તિના કારણે ઇબોલાનો પ્રભાવ વધુ ઘાતક બની રહ્યો છે. શરૂઆતના લક્ષણો મેલેરિયા જેવા હોવાથી સમયસર ઓળખ પણ મુશ્કેલ બની રહી છે.

UNICEFની ચેતવણી અને સહાયની અપીલ
UNICEFના એક્ઝિક્યુટિવ ડિરેક્ટર કેથરિન રસેલએ જણાવ્યું કે બાળકો સૌથી વધુ અસુરક્ષિત છે. તેમના અનુસાર ઇબોલા સાથે સાથે બાળકો સામાજિક ભેદભાવ, માનસિક તણાવ અને હિંસાનો પણ ભોગ બની રહ્યા છે. UNICEFએ આગામી 6 મહિનામાં તાત્કાલિક રાહત અને સુરક્ષા માટે 7.07 કરોડ અમેરિકી ડોલરની સહાયની અપીલ કરી છે, જેમાંથી હજુ સુધી સંપૂર્ણ રકમ મળી નથી. સંસ્થાએ ચેતવણી આપી છે કે પૂરતા સંસાધનો વિના પરિસ્થિતિ વધુ ગંભીર બની શકે છે.