હોર્મુઝ સ્ટ્રેટ સંકટનો પનામા કેનાલને મોટો ફાયદો, જહાજ ટ્રાફિક અને આવકમાં નોંધપાત્ર વધારો

મધ્ય પૂર્વમાં ચાલી રહેલા તણાવ અને હોર્મુઝ સ્ટ્રેટમાં વધેલી અનિશ્ચિતતાની અસર હવે વૈશ્વિક શિપિંગ રૂટ્સ પર સ્પષ્ટ જોવા મળી રહી છે. હોર્મુઝ માર્ગ પ્રભાવિત થતાં અનેક આંતરરાષ્ટ્રીય જહાજો હવે વૈકલ્પિક માર્ગ તરીકે પનામા કેનાલ તરફ વળી રહ્યા છે, જેના કારણે પનામાની આવકમાં નોંધપાત્ર વધારો નોંધાયો છે.

જહાજ ટ્રાફિકમાં 20 ટકાનો વધારો
અહેવાલો અનુસાર, ઈરાન સંઘર્ષ બાદ પનામા કેનાલમાંથી પસાર થતા જહાજોની સંખ્યામાં આશરે 20 ટકા વધારો થયો છે. પનામા કેનાલના સીએફઓ વિક્ટર વાયાલે જણાવ્યું હતું કે ફેબ્રુઆરીના અંતમાં મધ્ય પૂર્વમાં તણાવ વધ્યા બાદ વૈશ્વિક શિપિંગ કંપનીઓએ વધુ પ્રમાણમાં આ માર્ગનો ઉપયોગ શરૂ કર્યો છે.

કેનાલ ફી પણ પહોંચી રેકોર્ડ સ્તરે
જહાજોની વધતી અવરજવર વચ્ચે પનામા કેનાલમાંથી પસાર થવા માટે લેવામાં આવતી ફીમાં પણ મોટો વધારો નોંધાયો છે. અહેવાલ મુજબ, ગયા મહિને એક ગેસ ટેન્કરે કેનાલમાંથી પસાર થવા માટે લગભગ 4 મિલિયન ડોલર સુધીની ફી ચૂકવી હતી. જોકે સામાન્ય રીતે મોટાભાગના જહાજો માટે આ ખર્ચ 1 મિલિયન ડોલરથી ઓછો રહે છે.

આવકમાં 10થી 15 ટકાનો વધારો
વધેલા ટ્રાફિક અને હરાજી આધારિત પ્રીમિયમ દરોના કારણે પનામા કેનાલની કુલ આવકમાં આશરે 10થી 15 ટકા સુધીનો વધારો થવાની સંભાવના વ્યક્ત કરવામાં આવી રહી છે. પનામા કેનાલ સત્તાવાળાઓના જણાવ્યા અનુસાર, વધેલા કાર્ગો પરિવહનથી નફાકારકતા પણ મજબૂત બની છે.

પનામાને થયો મોટો નફો
પનામા કેનાલે 2024-25ના નાણાકીય વર્ષ દરમિયાન 5.71 બિલિયન ડોલરની આવક સામે અંદાજે 4.1 બિલિયન ડોલરનો ચોખ્ખો નફો નોંધાવ્યો છે. જ્યારે આગામી નાણાકીય વર્ષ માટે આવકનો અંદાજ 5.8 બિલિયન ડોલર સુધી પહોંચે તેવી શક્યતા દર્શાવવામાં આવી રહી છે.

વૈશ્વિક વેપાર પર અસર
વિશેષજ્ઞોનું માનવું છે કે હોર્મુઝ સ્ટ્રેટમાં અનિશ્ચિતતા લાંબા સમય સુધી ચાલુ રહેશે તો વૈશ્વિક વેપાર માર્ગોમાં મોટા ફેરફારો જોવા મળી શકે છે. હાલ વિશ્વભરની શિપિંગ કંપનીઓ વધુ સુરક્ષિત અને સ્થિર સમુદ્રી માર્ગોની શોધમાં છે, જેના કારણે પનામા કેનાલ જેવા વૈકલ્પિક રૂટ્સનું વ્યૂહાત્મક મહત્વ વધુ વધી રહ્યું છે.