Hormuz Strait પર તણાવ વધ્યો: અમેરિકાની ઈરાનને કડક ચેતવણી, વૈશ્વિક તેલ સપ્લાય પર ખતરો

હોર્મુઝ સ્ટ્રેટને લઈને અમેરિકા અને ઈરાન વચ્ચે તણાવ વધુ ગાઢ બનતો જઈ રહ્યો છે. અમેરિકાના રક્ષા મંત્રી પીટ હેગસેથે ઈરાનને સીધી ચેતવણી આપતા જણાવ્યું છે કે આંતરરાષ્ટ્રીય જળસીમામાં વેપારી જહાજોને ધમકાવવું એ નિયંત્રણ નહીં પરંતુ સમુદ્રી લૂંટ સમાન છે.

હેગસેથે જણાવ્યું કે ઈરાન ખોટા ભ્રમમાં છે કે તે હોર્મુઝની ખાડી પર કાબૂ ધરાવે છે, જ્યારે હકીકતમાં તેની નૌસેના એટલી મજબૂત નથી. તેમણે ઈરાનની જહાજોને નિશાન બનાવવાની ધમકીઓને ગંભીર ગણાવી અને કહ્યું કે અમેરિકા તેની દરેક હરકત પર નજીકથી નજર રાખી રહ્યું છે.

હોર્મુઝ સ્ટ્રેટ વ્યૂહાત્મક રીતે વિશ્વ માટે અત્યંત મહત્વપૂર્ણ માર્ગ છે. વિશ્વના કુલ તેલ પુરવઠાનો અંદાજે 20 ટકા હિસ્સો આ દરિયાઈ માર્ગથી પસાર થાય છે. જો અહીં કોઈ અવરોધ ઊભો થાય, તો વૈશ્વિક બજારમાં તેલના ભાવમાં ભારે વધારો થઈ શકે છે, જેના પ્રભાવથી ભારત સહિત અનેક દેશોની અર્થવ્યવસ્થા પર અસર પડી શકે છે.

અમેરિકાએ સ્પષ્ટ કર્યું છે કે તેની સેના સંપૂર્ણ રીતે તૈયાર છે અને જો રાજદ્વારી પ્રયાસો નિષ્ફળ જશે તો સૈન્ય વિકલ્પ પણ ખુલ્લો છે. બીજી તરફ, ઈરાન પણ પોતાની સૈન્ય શક્તિ વધારવામાં વ્યસ્ત છે. અહેવાલો મુજબ, ઈરાને એટેક ડ્રોન બનાવવાની ક્ષમતા 10 ગણો વધારી છે અને અગાઉ નષ્ટ થયેલા શસ્ત્રોને ફરી કાર્યરત કરવાનો પ્રયાસ કરી રહ્યો છે.

આ તણાવ એવા સમયે વધી રહ્યો છે જ્યારે 22 એપ્રિલે સીઝફાયર પૂર્ણ થવાનું છે. પાકિસ્તાનમાં થયેલી મધ્યસ્થીની વાતચીત પણ નિષ્ફળ રહી છે, જેના કારણે સંઘર્ષનો ખતરો વધુ ઊભો થયો છે.

વિશ્વભરના દેશોની નજર હવે 22 એપ્રિલ પર ટકેલી છે. આ દિવસ નક્કી કરશે કે પશ્ચિમ એશિયા શાંતિ તરફ આગળ વધશે કે પછી સંભવિત યુદ્ધ તરફ ધકેલાશે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in