રાજ્યમાં શિક્ષકોનું આંદોલન જાહેર: 20 જૂન સુધી જિલ્લામાં ધરણા કાર્યક્રમો યોજાશે

રાજ્યમાં ખેડૂતોના આંદોલન બાદ હવે શિક્ષકો પણ પોતાની માંગણીઓ લઈને આંદોલનના માર્ગે ઉતરવાના છે. વર્ષ 2010 પહેલાં ભરતી થયેલા શિક્ષકોને TET (શિક્ષક પાત્રતા પરીક્ષા)માંથી મુક્તિ આપવાની મુખ્ય માંગ સાથે રાજ્યવ્યાપી વિરોધ કાર્યક્રમોની જાહેરાત કરવામાં આવી છે.

20 જૂન સુધી તબક્કાવાર ધરણા કાર્યક્રમ
શિક્ષક સંગઠનો દ્વારા જાહેર કરાયેલા કાર્યક્રમ મુજબ આવતીકાલથી રાજ્યના તમામ જિલ્લાઓમાં તબક્કાવાર ધરણા યોજાશે. અલગ-અલગ તારીખે જિલ્લા કલેક્ટરોને આવેદનપત્ર પાઠવી સરકાર સમક્ષ પોતાની માંગણીઓ રજૂ કરવામાં આવશે. શિક્ષક સંઘ અને શૈક્ષિક સંઘ સહિતના સંગઠનો પોતાના સ્તરે અલગ-અલગ કાર્યક્રમો યોજીને આ મુદ્દે સરકાર પર દબાણ વધારવાનો પ્રયાસ કરશે.

TET ફરજિયાત નિર્ણયથી વધ્યો વિવાદ
તાજેતરમાં સુપ્રીમ કોર્ટે તમામ શિક્ષકો માટે TET પરીક્ષા ફરજિયાત હોવાનો નિર્ણય આપ્યો છે. આ નિર્ણય બાદ વર્ષ 2010 પહેલાં ભરતી થયેલા અંદાજે એક લાખ જેટલા શિક્ષકો સામે નોકરી જાળવી રાખવા માટે TET પાસ કરવાનો પડકાર ઉભો થયો છે. શિક્ષકોને 2028 સુધીમાં TET પરીક્ષા પાસ કરવાનો સમય આપવામાં આવ્યો હોવાનું પણ જાણવા મળે છે.

શિક્ષક સંગઠનોની દલીલ
શિક્ષક સંગઠનોનું કહેવું છે કે વર્ષ 2010 પહેલાં TET પરીક્ષા અસ્તિત્વમાં નહોતી અને તે સમયના ભરતી નિયમો મુજબ જ તેમની નિમણૂક કરવામાં આવી હતી. તેથી વર્ષોનો અનુભવ ધરાવતા શિક્ષકોને ફરીથી પરીક્ષા આપવી યોગ્ય નથી અને તેમને આ નિયમમાંથી મુક્તિ મળવી જોઈએ. સંગઠનોનું માનવું છે કે લાંબા સમયથી શિક્ષણ ક્ષેત્રે સેવા આપતા શિક્ષકોને માનવતાવાદી અભિગમ સાથે છૂટ આપવામાં આવવી જોઈએ.

આગળ શું?
આંદોલન 20 જૂન સુધી ચાલશે અને ત્યારબાદ શિક્ષક સંગઠનો સરકારને આવેદનપત્ર પાઠવી પોતાની માંગણીઓ રજૂ કરશે. હવે સરકાર આ મુદ્દે શું નિર્ણય લે છે અને આ આંદોલન કેટલું વ્યાપક બને છે તે જોવું રહ્યું.