કેનેડાના ટોરોન્ટોમાં સ્ટ્રીટ ફેસ્ટિવલ દરમિયાન ગોળીબાર, 2ના મોત, 3 ગંભીર રીતે ઘાયલ

કેનેડાના ટોરોન્ટોમાં યોજાયેલા લોકપ્રિય સ્ટ્રીટ ફેસ્ટિવલ દરમિયાન શનિવારે સાંજે થયેલા ગોળીબારની બનાવમાં બે લોકોના મોત થયા છે, જ્યારે ત્રણ અન્ય ગંભીર રીતે ઘાયલ થયા હોવાનું પોલીસ દ્વારા જણાવાયું છે. ઘટના બાદ સમગ્ર વિસ્તારમાં ભારે અફરાતફરીનો માહોલ સર્જાયો હતો.

ફેસ્ટિવલ દરમિયાન અચાનક શરૂ થયું ફાયરિંગ
અહેવાલો અનુસાર, ઘટના મિડટાઉન ટોરોન્ટોમાં યોજાયેલા વાર્ષિક લેટિન સાંસ્કૃતિક ઉત્સવ ‘સાલ્સા ઓન સેન્ટ ક્લેયર’ દરમિયાન બની હતી. શનિવારે રાત્રે આશરે 8 વાગ્યા બાદ સેન્ટ ક્લેયર એવેન્યુ વેસ્ટ અને અર્લિંગ્ટન એવેન્યુ નજીક અચાનક ગોળીબાર શરૂ થતાં લોકોમાં ગભરાટ ફેલાઈ ગયો અને સ્થળ પર નાસભાગ મચી ગઈ.

બેના મોત, ત્રણની હાલત ગંભીર
ટોરોન્ટો પોલીસના જણાવ્યા મુજબ, ઘટનાસ્થળેથી ગોળી વાગેલા પાંચ લોકોને હોસ્પિટલ ખસેડવામાં આવ્યા હતા. તેમાં બે લોકોને તબીબોએ મૃત જાહેર કર્યા હતા, જ્યારે ત્રણ ઘાયલોની સારવાર ચાલી રહી છે. તેમની હાલત ગંભીર હોવાનું જણાવાયું છે.

પોલીસે વિસ્તાર સીલ કર્યો
ઘટના બાદ ટોરોન્ટો પોલીસે સમગ્ર વિસ્તારને કોર્ડન કરીને તપાસ શરૂ કરી છે. સુરક્ષાના ભાગરૂપે લોકોને ઘટનાસ્થળથી દૂર રહેવાની અપીલ કરવામાં આવી છે. પોલીસે ઘટનાની તપાસ દરમિયાન આસપાસના વિસ્તારોમાં સુરક્ષા પણ વધારી છે.

હુમલાખોરની શોધખોળ ચાલુ
પોલીસના જણાવ્યા મુજબ, હુમલાખોર ઘટનાસ્થળેથી ફરાર થઈ ગયો હતો અને તેની શોધ માટે વિશેષ ટીમો કામગીરી કરી રહી છે. ઘટનાના કારણો અને હુમલાનો હેતુ હજુ સુધી સ્પષ્ટ થયો નથી. તપાસના ભાગરૂપે પોલીસ ઘટનાસ્થળના સીસીટીવી ફૂટેજની તપાસ કરી રહી છે તેમજ પ્રત્યક્ષદર્શીઓના નિવેદનોના આધારે વધુ માહિતી એકત્રિત કરી રહી છે. અધિકારીઓએ લોકોને અફવાઓથી દૂર રહેવા અને સત્તાવાર માહિતી પર જ વિશ્વાસ રાખવાની અપીલ કરી છે.