Bindia
પર્યાવરણ સંરક્ષણ અને હરિયાળા શહેરના સંકલ્પને સાકાર કરવા માટે અમદાવાદ મ્યુનિસિપલ કોર્પોરેશન (AMC) દ્વારા ભાડજ ખાતે આયોજિત મેગા વૃક્ષારોપણ અભિયાનમાં એક કલાકમાં 3 લાખ 61 હજાર રોપાઓ વાવી ગિનીસ વર્લ્ડ રેકોર્ડ સ્થાપિત કરવામાં આવ્યો છે. મિયાવાકી પદ્ધતિથી યોજાયેલા આ અભિયાનમાં 25 હજારથી વધુ સ્વયંસેવકો જોડાયા હતા.
91 હજાર ચોરસ મીટર વિસ્તારમાં મેગા અભિયાન
આ વિશ્વવિક્રમી અભિયાન ઉત્તર-પશ્ચિમ ઝોનના થલતેજ વોર્ડ હેઠળ ભાડજ ખાતે ગોતા-ગોધવી કેનાલ નજીક યોજાયું હતું. અંદાજે 91,006 ચોરસ મીટર વિસ્તારમાંથી 76,000 ચોરસ મીટર વિસ્તારમાં મિયાવાકી પદ્ધતિથી 35થી વધુ સ્થાનિક (Indigenous) પ્રજાતિના કુલ 3.61 લાખ રોપાઓનું માત્ર એક કલાકમાં વૃક્ષારોપણ કરવામાં આવ્યું.
અમિત શાહ સહિત મહાનુભાવોની ઉપસ્થિતિ
કાર્યક્રમમાં કેન્દ્રીય ગૃહ અને સહકાર મંત્રી તથા ગાંધીનગરના સાંસદ અમિત શાહની ઉપસ્થિતિ રહી હતી. તેમના ઉપરાંત ગુજરાતના મુખ્યમંત્રી, નાયબ મુખ્યમંત્રી, રાજ્ય સરકારના મંત્રીઓ, અમદાવાદના મેયર, મુખ્ય સચિવ, મ્યુનિસિપલ કમિશનર, કોર્પોરેશનના અધિકારીઓ અને અન્ય મહાનુભાવો પણ ઉપસ્થિત રહ્યા હતા.
25 હજારથી વધુ લોકોએ આપ્યો સહયોગ
વિશ્વવિક્રમી અભિયાનને સફળ બનાવવા માટે AMCના વિવિધ વિભાગો, સ્કૂલ બોર્ડ, BAPS સંસ્થા, CREDAI, પોલીસ વિભાગ, NCCના વિદ્યાર્થીઓ, વિવિધ સ્વૈચ્છિક સંસ્થાઓ, શૈક્ષણિક સંસ્થાઓ, સામાજિક સંગઠનો તેમજ શહેરના 25 હજારથી વધુ નાગરિકોએ ઉત્સાહપૂર્વક ભાગ લીધો હતો.
પર્યાવરણ માટે થશે લાંબા ગાળાનો ફાયદો
આ અભિયાનમાં વાવવામાં આવેલા સ્થાનિક પ્રજાતિના રોપાઓ ભવિષ્યમાં જૈવ વૈવિધ્યના સંવર્ધન, વાયુ પ્રદૂષણમાં ઘટાડો, કાર્બન શોષણ, તાપમાન નિયંત્રણ અને શહેરના હરિયાળા આવરણમાં વધારો કરવામાં મહત્વપૂર્ણ ભૂમિકા ભજવશે.
હરિયાળા અમદાવાદ તરફ વધુ એક ઐતિહાસિક પગલું
અમદાવાદ મ્યુનિસિપલ કોર્પોરેશનનું કહેવું છે કે આ વિશ્વવિક્રમ માત્ર રેકોર્ડ પૂરતો મર્યાદિત નથી, પરંતુ પર્યાવરણ પ્રત્યેની સામૂહિક પ્રતિબદ્ધતા અને ટકાઉ શહેરી વિકાસનું પ્રતીક છે. શહેરને વધુ હરિયાળું, સ્વચ્છ અને પર્યાવરણમૈત્રી બનાવવા માટે આગામી સમયમાં પણ આવા જનભાગીદારી આધારિત અભિયાનોને વધુ વેગ આપવામાં આવશે. આ ગિનીસ વર્લ્ડ રેકોર્ડ સાથે અમદાવાદે વૈશ્વિક સ્તરે પર્યાવરણ સંરક્ષણ ક્ષેત્રે નવી ઓળખ ઉભી કરી છે અને હરિયાળા ભવિષ્ય તરફ વધુ એક મહત્વપૂર્ણ પગલું ભર્યું છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
