ભારત માટે રાહત: LPG ટેન્કર ‘સર્વ શક્તિ’એ Strait of Hormuz સુરક્ષિત રીતે પાર કર્યું

મધ્ય પૂર્વમાં વધતા તણાવ વચ્ચે ભારત માટે રાહતના સમાચાર સામે આવ્યા છે. ભારત માટે ગેસ લઈને આવતું MT ‘સર્વ શક્તિ’ જહાજ સફળતાપૂર્વક સ્ટ્રેટ ઓફ હોર્મુઝ પાર કરી ચૂક્યું છે. સરકારના જણાવ્યા અનુસાર આ જહાજ 13 મેના રોજ વિશાખાપટ્ટનમ બંદરે પહોંચશે.

46 હજાર મેટ્રિક ટન LPG સાથે જહાજ આગળ વધ્યું
સૂત્રો મુજબ આ જહાજમાં અંદાજે 46,000 મેટ્રિક ટન LPG ભરાયેલું છે, જે ભારત માટે મહત્વપૂર્ણ ઊર્જા સપ્લાય માનવામાં આવે છે. જહાજ માર્શલ આઇલેન્ડના નામે રજિસ્ટર્ડ છે.

18 ભારતીય નાવિકો સુરક્ષિત
જહાજ પર કુલ 20 ક્રૂ સભ્યો છે, જેમાંથી 18 ભારતીયો છે. સરકાર દ્વારા ખાતરી આપવામાં આવી છે કે તમામ નાવિકો સંપૂર્ણપણે સુરક્ષિત છે. છેલ્લા 24 કલાક દરમિયાન કોઈ પણ ભારતીય જહાજ સાથે અનિચ્છનીય ઘટના નોંધાઈ નથી.

સરકારના સક્રિય પ્રયાસો
Ministry of Petroleum and Natural Gas, Ministry of External Affairs તેમજ વિદેશમાં ભારતીય દૂતાવાસો સતત પરિસ્થિતિ પર નજર રાખી રહ્યા છે. સાથે જ Directorate General of Shippingનો કંટ્રોલ રૂમ 24 કલાક સક્રિય છે અને સહાય માટે આવતા કોલ્સ અને ઈમેલ્સનો જવાબ આપી રહ્યો છે.

3,000થી વધુ નાવિકોને પરત લાવવામાં આવ્યા
ખાડી દેશોમાંથી અત્યાર સુધીમાં આશરે 3,000 ભારતીય નાવિકોને સુરક્ષિત રીતે પરત લાવવામાં આવ્યા છે. દેશમાં બંદરો પર કામગીરી સામાન્ય છે અને ક્યાંય ખાસ વિલંબ કે અવરોધ જોવા મળતો નથી.

“પરિસ્થિતિ માટે સંપૂર્ણ તૈયાર”
પેટ્રોલિયમ મંત્રાલયે જણાવ્યું છે કે કોઈ પણ પરિસ્થિતિમાં સમુદ્રી સુરક્ષા જાળવી રાખવા અને જહાજોની અવરજવર ચાલુ રાખવા માટે સરકાર સંપૂર્ણ રીતે તૈયાર છે.