Bindia
વડાપ્રધાન નરેન્દ્ર મોદી તેમના ત્રણ દિવસીય સેશેલ્સ પ્રવાસ દરમિયાન રવિવારે મોરીશિયસના વડાપ્રધાન નવીનચંદ્ર રામગુલામ સાથે મહત્વપૂર્ણ બેઠક કરી હતી. આ બેઠક દરમિયાન બંને દેશો વચ્ચેના દ્વિપક્ષીય સંબંધો વધુ મજબૂત બનાવવા તેમજ દરિયાઈ સુરક્ષા, વેપાર, વિકાસ સહકાર અને લોકો વચ્ચેના સંબંધોને વિસ્તૃત કરવા અંગે ચર્ચા કરવામાં આવી હતી.
અનેક મહત્વપૂર્ણ મુદ્દાઓ પર ચર્ચા
બંને નેતાઓએ દરિયાઈ સુરક્ષા, ક્ષમતા નિર્માણ, વેપાર, વિકાસ સહકાર અને હિંદ મહાસાગર ક્ષેત્રમાં પરસ્પર સહયોગ વધારવા અંગે વિસ્તૃત ચર્ચા કરી હતી. બેઠકમાં ભારત અને મોરીશિયસ વચ્ચે ચાલી રહેલી વિવિધ વિકાસ યોજનાઓની પણ સમીક્ષા કરવામાં આવી હતી.
ફરી મળવાનો અવસર મળ્યાનો PM મોદીનો ઉલ્લેખ
વડાપ્રધાન મોદીએ સોશિયલ મીડિયા પર બેઠક અંગે માહિતી આપતાં જણાવ્યું કે વર્ષના પ્રારંભમાં યોજાયેલી AI સમિટ બાદ હવે ફરી સેશેલ્સમાં મોરીશિયસના વડાપ્રધાન સાથે મુલાકાત કરવાનો અવસર મળ્યો છે. તેમણે ભારત-મોરીશિયસ વચ્ચેની ઉન્નત વ્યૂહાત્મક ભાગીદારીમાં વિવિધ ક્ષેત્રોમાં થઈ રહેલી પ્રગતિ અંગે સંતોષ વ્યક્ત કર્યો અને ભવિષ્યમાં સહકાર વધુ મજબૂત બનાવવાની પ્રતિબદ્ધતા વ્યક્ત કરી.
વિદેશ મંત્રાલયે આપી માહિતી
વિદેશ મંત્રાલયના પ્રવક્તા રણધીર જયસ્વાલે જણાવ્યું કે બેઠક દરમિયાન વિકાસ સહકાર, સમુદ્રી સુરક્ષા, વેપાર અને ક્ષેત્રીય સહયોગ સહિતના તમામ મહત્વપૂર્ણ મુદ્દાઓની સમીક્ષા કરવામાં આવી હતી. તેમણે જણાવ્યું કે ભારતની ‘નેબરહુડ ફર્સ્ટ’ નીતિ અને ગ્લોબલ સાઉથ પ્રત્યેની પ્રતિબદ્ધતા અંતર્ગત બંને દેશો વચ્ચે સહયોગ વધારવા પર ભાર મૂકવામાં આવ્યો છે.
સેશેલ્સના સર્વોચ્ચ સન્માનથી PM મોદી સન્માનિત
સેશેલ્સ પ્રવાસ દરમિયાન વડાપ્રધાન મોદીને દેશના સર્વોચ્ચ નાગરિક સન્માન **’ગાર્ડિયન ઓફ ધ બ્લુ હોરીઝન’**થી નવાજવામાં આવ્યા હતા. આ સન્માન સ્વીકારતા તેમણે સેશેલ્સ સરકાર અને ત્યાંની જનતાનો આભાર વ્યક્ત કર્યો હતો. સાથે જ આ એવોર્ડ જળવાયુ પરિવર્તન સામે લડી રહેલા અને પર્યાવરણ સંરક્ષણ માટે કાર્યરત તમામ દેશોને સમર્પિત કર્યો હતો.
ભારત-સેશેલ્સ સંબંધો પર ભાર
સેશેલ્સની નેશનલ અસેમ્બલીને સંબોધિત કરતાં વડાપ્રધાન મોદીએ જણાવ્યું કે ભારત અને સેશેલ્સ વચ્ચેના સંબંધો પાંચ દાયકાથી પણ વધુ જૂના છે. તેમણે કહ્યું કે હિંદ મહાસાગર બંને દેશોને અલગ કરતો નથી, પરંતુ પરસ્પર મિત્રતા અને સહયોગથી જોડે છે. બંને દેશો વિકાસ, સુરક્ષા અને સમૃદ્ધિ માટે સાથે મળીને આગળ વધવાની પ્રતિબદ્ધતા ધરાવે છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
