Bindia
2026ના T20 વર્લ્ડ કપને લઈને મોટો વિવાદ સામે આવ્યો છે. પાકિસ્તાન સરકારે સત્તાવાર રીતે જાહેરાત કરી છે કે પાકિસ્તાનની ટીમ 2026ના T20 વર્લ્ડ કપમાં ભાગ લેશે, પરંતુ ભારત સામેની મેચનો બહિષ્કાર કરશે. આ નિર્ણયને કારણે ક્રિકેટ જગતમાં ચર્ચાનો માહોલ ઉભો થયો છે.
T20 વર્લ્ડ કપ 2026ની શરૂઆત 7 ફેબ્રુઆરીથી થવાની છે. ભારત અને પાકિસ્તાન વચ્ચે 15 ફેબ્રુઆરીએ કોલંબોમાં મેચ યોજાવાની હતી, પરંતુ હવે પાકિસ્તાન સરકારે પોતાની ટીમને ભારત સામે ન રમવાનો આદેશ આપ્યો છે. 2 ફેબ્રુઆરીએ સરકારના સત્તાવાર સોશિયલ મીડિયા હેન્ડલ પરથી આ નિર્ણય જાહેર કરવામાં આવ્યો હતો.
આ અગાઉ પાકિસ્તાન ક્રિકેટ બોર્ડના વડા મોહસીન નકવીએ જણાવ્યું હતું કે પાકિસ્તાન વર્લ્ડ કપમાં ભાગ લેશે કે નહીં તેનો નિર્ણય સરકાર લેશે. હવે સરકારના આદેશથી સ્પષ્ટ થયું છે કે પાકિસ્તાન ટૂર્નામેન્ટમાં રમશે, પરંતુ ભારત સામેની મેચમાં ભાગ નહીં લે.
ઉલ્લેખનીય છે કે બાંગ્લાદેશે અગાઉ 2026ના T20 વર્લ્ડ કપમાંથી પોતાનું નામ પાછું ખેંચ્યું હતું. બાંગ્લાદેશે ICC પાસે માંગ કરી હતી કે તેની તમામ મેચો ભારતને બદલે શ્રીલંકામાં યોજવામાં આવે, પરંતુ ICC દ્વારા આ માંગ નકારવામાં આવતા બાંગ્લાદેશે ટૂર્નામેન્ટમાંથી ખસી જવાનું નક્કી કર્યું હતું. બાદમાં ICC એ બાંગ્લાદેશની જગ્યાએ સ્કોટલેન્ડને ટૂર્નામેન્ટમાં સામેલ કર્યું હતું.
ICCના આ નિર્ણયથી પાકિસ્તાન અસંતુષ્ટ હતું અને તેણે ખુલ્લેઆમ વિરોધ વ્યક્ત કર્યો હતો. અંતે, પાકિસ્તાન સરકારે ભારત સામેની મેચનો બહિષ્કાર કરવાનો નિર્ણય લીધો છે. પરિણામે, ભારતને આ મેચ રમ્યા વિના જ બે પોઈન્ટ મળશે.
પાકિસ્તાન 7 ફેબ્રુઆરીએ નેધરલેન્ડ્સ સામે મેચ રમીને 2026ના T20 વર્લ્ડ કપમાં પોતાના અભિયાનની શરૂઆત કરશે. ગ્રુપ Aમાં ભારત, પાકિસ્તાન, યુનાઇટેડ સ્ટેટ્સ, નેધરલેન્ડ્સ અને નામિબિયા સામેલ છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
