જલંધરમાં BSF હેડક્વાર્ટર બહાર સ્કૂટીમાં જોરદાર વિસ્ફોટ, વિસ્તારમાં ફેલાઈ દહેશત

પંજાબના જલંધરમાં મંગળવારે રાત્રે થયેલા જોરદાર વિસ્ફોટે શહેરમાં સનસનાટી મચાવી દીધી છે. Border Security Force (BSF) હેડક્વાર્ટરની બહાર લગભગ રાત્રે 8 વાગ્યે એક સ્કૂટીમાં અચાનક વિસ્ફોટ થયો હતો. ધડાકો એટલો પ્રચંડ હતો કે તેનો અવાજ લગભગ એક કિલોમીટર સુધી સંભળાયો હતો, જેના કારણે આસપાસના વિસ્તારમાં અફરાતફરીનો માહોલ સર્જાયો હતો.

પ્રાથમિક માહિતી મુજબ, વિસ્ફોટ સ્કૂટીમાં થયો હતો, જે સંપૂર્ણપણે તૂટી પડી હતી. ઘટનામાં એક વ્યક્તિ ઘાયલ થયો હોવાની માહિતી મળી રહી છે, જોકે તેની ઓળખ હજુ સુધી જાહેર કરવામાં આવી નથી. ઘટના બાદ તરત જ પોલીસ, ફોરેન્સિક ટીમો અને BSFના જવાનો ઘટનાસ્થળે દોડી આવ્યા હતા અને સમગ્ર વિસ્તારને સીલ કરી તપાસ શરૂ કરી દીધી હતી. ફાયર બ્રિગેડે આગ પર કાબૂ મેળવ્યો હતો.

સ્થાનિક સૂત્રો મુજબ, ગુરપ્રીત નામનો એક યુવક સ્કૂટી પાર્ક કરીને BSF હેડક્વાર્ટરમાં પાર્સલ આપવા ગયો હતો. તે દરમિયાન લગભગ 8:15 વાગ્યે સ્કૂટીમાં વિસ્ફોટ થયો હતો. કહેવાય છે કે આ સ્કૂટી એક ઇ-કોમર્સ કંપનીના ડિલિવરી બોયની હતી, પરંતુ આ અંગે હજી સત્તાવાર પુષ્ટિ થઈ નથી. પોલીસ હાલમાં આસપાસના સીસીટીવી કેમેરાના ફૂટેજ તપાસી રહી છે અને વિસ્ફોટના ચોક્કસ કારણો જાણવા પ્રયાસ કરી રહી છે. શરૂઆતમાં તેને સામાન્ય વિસ્ફોટ માનવામાં આવતો હતો, પરંતુ હવે સુરક્ષા એજન્સીઓ આ ઘટનાને આતંકી હુમલાના એંગલથી પણ તપાસી રહી છે. કેટલાક અહેવાલોમાં ગ્રેનેડ હુમલાની આશંકા પણ વ્યક્ત કરવામાં આવી છે.

સૂત્રોના જણાવ્યા અનુસાર, તપાસ એજન્સીઓ પાકિસ્તાન આધારિત તત્વો અને પ્રતિબંધિત સંગઠનોની સંડોવણીની પણ તપાસ કરી રહી છે. ખાસ કરીને Babbar Khalsa International (BKI) જેવા સંગઠનો પર નજર રાખવામાં આવી રહી છે, જેમના પર ભૂતકાળમાં આવા હુમલાઓના આરોપ લાગ્યા છે.
આ ઘટના પંજાબમાં સુરક્ષા દળો અને મહત્વપૂર્ણ સંસ્થાઓને નિશાન બનાવતી ઘટનાઓની એક શ્રેણીનો ભાગ હોઈ શકે છે તેવી આશંકા વ્યક્ત કરવામાં આવી રહી છે. હાલ સમગ્ર વિસ્તારમાં સુરક્ષા વધારી દેવામાં આવી છે અને તપાસ તેજ ગતિએ આગળ વધી રહી છે.