દિલ્હીની ગરમી વચ્ચે માર્કો રૂબિયોની ટિપ્પણીથી કાર્યક્રમમાં હાસ્યનો માહોલ

દિલ્હીની કડકડતી ગરમીનો અનુભવ હવે અમેરિકાના વિદેશ મંત્રી માર્કો રૂબિયોને પણ થયો છે. યુએસ એમ્બેસી સપોર્ટ એનેક્સ બિલ્ડિંગના ઉદ્ઘાટન કાર્યક્રમ દરમિયાન રૂબિયોએ પોતાના ભાષણમાં હળવી મજાક સાથે કહ્યું કે દિલ્હીની ગરમી તેમને પણ ભારે પડી રહી છે.

કાર્યક્રમ દરમિયાન તેમણે કહ્યું કે તેઓ માયામીથી આવે છે, જ્યાં ભેજવાળી ગરમી સામાન્ય બાબત છે, પરંતુ દિલ્હીની ગરમી સંપૂર્ણપણે અલગ અનુભવ છે. રૂબિયોએ મજાકિયા અંદાજમાં પૂછ્યું, “અત્યારે તો સમય થઈ ગયો છે, શું હવે સુધી ઠંડક ન થવી જોઈએ?” તેમના આ નિવેદન બાદ કાર્યક્રમમાં હાજર લોકો હસી પડ્યા અને માહોલ હળવો બની ગયો.

રૂબિયોએ જણાવ્યું કે ગરમીના કારણે તેઓ પોતાનું ભાષણ ટૂંકું રાખવા માંગે છે. જોકે, તેમણે ભારત અને અમેરિકા વચ્ચેના સંબંધોને ખૂબ મહત્વપૂર્ણ ગણાવ્યા. તેમણે કહ્યું કે ઈન્ડો-પેસિફિક ક્ષેત્રમાં ભારત અમેરિકાનો મુખ્ય વ્યૂહાત્મક ભાગીદાર છે અને બંને દેશો વચ્ચેના સંબંધો આગામી સમયમાં વધુ મજબૂત બનશે.

તેમણે વડાપ્રધાન નરેન્દ્ર મોદી સાથે થયેલી મુલાકાતનો પણ ઉલ્લેખ કર્યો અને જણાવ્યું કે હાલ ભારત-અમેરિકા સંબંધો મજબૂત સ્થિતિમાં છે. સાથે જ અમેરિકાના રાષ્ટ્રપતિ ડોનાલ્ડ ટ્રમ્પ અને વડાપ્રધાન મોદી વચ્ચેના સારા સંબંધોને પણ તેમણે મહત્વપૂર્ણ ગણાવ્યા.

રૂબિયોએ વધુમાં કહ્યું કે ભારતીય કંપનીઓએ અમેરિકામાં 20 અબજ ડોલરથી વધુનું રોકાણ કર્યું છે અને બંને દેશો વચ્ચે દ્વિપક્ષીય વેપારને ભવિષ્યમાં 500 અબજ ડોલર સુધી પહોંચાડવાનો લક્ષ્ય રાખવામાં આવ્યો છે.

કાર્યક્રમ દરમિયાન અમેરિકી દૂતાવાસના નવા સપોર્ટ એનેક્સ બિલ્ડિંગનું સત્તાવાર ઉદ્ઘાટન પણ કરવામાં આવ્યું, જેને ભારત-અમેરિકા સહકારના નવા પ્રતિક તરીકે જોવામાં આવી રહ્યું છે.