મશહદમાં દફનાવવામાં આવશે ખામેનીને, નવા સુપ્રીમ લીડરની જાહેરાત આવતા સપ્તાહે શક્ય

ઈરાનના સુપ્રીમ લીડર અયાતુલ્લા અલી ખામેનીને મશહદમાં દફનાવવામાં આવશે, જોકે અંતિમ વિધિનો દિવસ અને તારીખ હજી નક્કી કરવામાં આવી નથી. ઈરાનની સરકારી ન્યૂઝ એજન્સી ‘ફાર્સ’ મુજબ, ખામેનીને ઈમામ રઝાની દરગાહ નજીક સુપુર્દ-એ-ખાક કરવામાં આવશે. નોંધનીય છે કે ખામેનીનો જન્મ 1939માં મશહદમાં જ થયો હતો.

અહેવાલો મુજબ, નવા સુપ્રીમ લીડરની જાહેરાત ખામેનીને દફનાવ્યા પછી જ કરવામાં આવશે. મંગળવારે કોમ શહેરમાં ‘એસેમ્બલી ઓફ એક્સપર્ટ્સ’ દ્વારા સુપ્રીમ લીડરની પસંદગી માટે મતદાન થયાની માહિતી સામે આવી હતી. 88 સભ્યોની આ સંસ્થા દેશના સર્વોચ્ચ ધાર્મિક નેતાની પસંદગી માટે જવાબદાર છે. 28 ફેબ્રુઆરીએ યુએસ અને ઇઝરાયેલના સંયુક્ત હુમલામાં ખામેનીના મોત થયા હોવાનું દાવો કરવામાં આવ્યું હતું, ત્યારથી સુપ્રીમ લીડરનું પદ ખાલી છે.

બીજી તરફ, ઈરાની વિપક્ષ સાથે જોડાયેલા ‘ઈરાન ઈન્ટરનેશનલ’એ દાવો કર્યો છે કે ઇસ્લામિક રેવોલ્યૂશનરી ગાર્ડ કોર્પ્સ (IRGC)ના દબાણ હેઠળ ખામેનીના પુત્ર મોજતબા ખામેનીને આગામી સુપ્રીમ લીડર તરીકે પસંદ કરવામાં આવ્યા છે. જોકે આ અંગે સત્તાવાર પુષ્ટિ મળી નથી.

આ દરમિયાન, ઈઝરાયેલ ડિફેન્સ ફોર્સ (IDF)એ દાવો કર્યો છે કે છેલ્લા ચાર દિવસમાં ઈઝરાયેલી હવાઈ હુમલાઓ દરમિયાન ઈરાનના 300થી વધુ બેલેસ્ટિક મિસાઈલ લોન્ચરો નષ્ટ કરી દેવામાં આવ્યા છે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in