દેશના અનેક રાજ્યોમાં ભારે વરસાદનો ખતરો, 60 કિમીની ઝડપે પવન ફૂંકાવાની આગાહી

ભારતીય હવામાન વિભાગ (IMD) દ્વારા દેશભરના હવામાનને લઈને મહત્વપૂર્ણ આગાહી જાહેર કરવામાં આવી છે. 25 જૂનના રોજ દેશના મોટાભાગના રાજ્યોમાં મધ્યમથી અતિભારે વરસાદ પડવાની શક્યતા વ્યક્ત કરવામાં આવી છે. અનેક વિસ્તારોમાં ગાજવીજ, તેજ પવન અને વીજળી પડવાની ઘટનાઓ બનવાની સંભાવના હોવાથી વહીવટી તંત્રને સાવચેત રહેવા સૂચના આપવામાં આવી છે.

ઉત્તર ભારતમાં ભારે વરસાદનું એલર્ટ
હવામાન વિભાગના જણાવ્યા મુજબ જમ્મુ-કાશ્મીર, લદ્દાખ, હિમાચલ પ્રદેશ અને ઉત્તરાખંડના પહાડી વિસ્તારોમાં ભારે વરસાદની શક્યતા છે. હરિયાણા, ચંદીગઢ, દિલ્હી, પશ્ચિમ અને પૂર્વ ઉત્તર પ્રદેશ તેમજ રાજસ્થાનના અનેક વિસ્તારોમાં ગાજવીજ સાથે વરસાદી માહોલ રહેશે. ખાસ કરીને દિલ્હી, હરિયાણા અને ચંદીગઢમાં 50થી 60 કિમી પ્રતિ કલાકની ઝડપે પવન ફૂંકાઈ શકે છે. કેટલાક વિસ્તારોમાં ધૂળની ડમરીઓ અને વાવાઝોડા જેવી સ્થિતિ સર્જાઈ શકે છે.

મધ્ય ભારત અને પૂર્વીય રાજ્યોમાં પણ વરસાદી માહોલ
મધ્ય પ્રદેશ, છત્તીસગઢ અને વિદર્ભ વિસ્તારમાં ભારે વરસાદ સાથે વીજળીના કડાકા-ભડાકાની શક્યતા છે. વિદર્ભના કેટલાક જિલ્લાઓમાં અતિભારે વરસાદની આગાહી કરવામાં આવી છે. બિહાર, ઝારખંડ અને ઓડિશામાં પણ ભારે વરસાદ અને આકાશી વીજળીનું એલર્ટ જાહેર કરાયું છે. પશ્ચિમ બંગાળના હિમાલયન વિસ્તારો, સિક્કિમ તેમજ અંડમાન-નિકોબાર દ્વીપસમૂહમાં પણ ભારે વરસાદની ચેતવણી આપવામાં આવી છે.

પૂર્વોત્તર ભારતમાં અતિભારે વરસાદ ચાલુ રહેશે
આસામ, અરુણાચલ પ્રદેશ, મેઘાલય, નાગાલેન્ડ, મણિપુર અને ત્રિપુરામાં ચોમાસું સંપૂર્ણ રીતે સક્રિય બન્યું છે. આ રાજ્યોમાં આગામી દિવસોમાં પણ અતિભારે વરસાદનો દોર યથાવત રહેવાની શક્યતા છે.

ગુજરાત, મહારાષ્ટ્ર અને ગોવામાં વરસાદી માહોલ
પશ્ચિમ ભારતના ગુજરાત, મધ્ય મહારાષ્ટ્ર, કોંકણ અને ગોવામાં આવતીકાલે સારા વરસાદની શક્યતા છે. કોંકણ અને ગોવાના દરિયાકાંઠાના વિસ્તારોમાં વાવાઝોડા, વીજળી અને દરિયામાં ઊંચા મોજાં ઊછળવાની સંભાવના હોવાથી માછીમારોને ખાસ સાવચેત રહેવા સૂચના આપવામાં આવી છે.

દક્ષિણ ભારતમાં પણ વરસાદની આગાહી
તમિલનાડુ, પુડુચેરી, કરાઈકલ, આંધ્ર પ્રદેશ, યનામ અને રાયલસીમામાં હળવાથી મધ્યમ વરસાદ પડી શકે છે. જ્યારે કેરળ, માહે અને તેલંગાણામાં ભારે વરસાદનું એલર્ટ જાહેર કરવામાં આવ્યું છે. લક્ષદ્વીપ અને કેરળમાં વાવાઝોડા અને આકાશી વીજળીની સંપૂર્ણ શક્યતા વ્યક્ત કરવામાં આવી છે.

તાપમાનમાં આવશે ઘટાડો
ચોમાસાની સક્રિયતાના કારણે મહારાષ્ટ્રમાં મહત્તમ તાપમાનમાં આગામી દિવસોમાં 2થી 4 ડિગ્રી સેલ્સિયસ સુધીનો ઘટાડો નોંધાઈ શકે છે. જોકે ત્યારબાદ ફરીથી તાપમાનમાં વધારો થવાની સંભાવના છે. બીજી તરફ પૂર્વી મધ્ય પ્રદેશના કેટલાક વિસ્તારોમાં હજુ પણ ગરમી અને લૂની અસર યથાવત રહેવાની શક્યતા છે.

છેલ્લા 24 કલાકનું હવામાન
છેલ્લા 24 કલાક દરમિયાન ઉત્તર પ્રદેશ, વિદર્ભ, પૂર્વી મધ્ય પ્રદેશ, મધ્ય મહારાષ્ટ્ર અને તેલંગાણાના કેટલાક વિસ્તારોમાં મહત્તમ તાપમાન 40થી 43 ડિગ્રી સેલ્સિયસ વચ્ચે નોંધાયું હતું. જ્યારે દેશના મોટાભાગના વિસ્તારોમાં તાપમાન 40 ડિગ્રીથી નીચે રહ્યું હતું.

ઉત્તર પ્રદેશમાં ટૂંક સમયમાં ચોમાસાની એન્ટ્રી
હવામાન વિભાગના જણાવ્યા અનુસાર આગામી 2થી 3 દિવસમાં ઉત્તર પ્રદેશના મોટાભાગના વિસ્તારોમાં ચોમાસું સત્તાવાર રીતે પ્રવેશ કરશે. જેના કારણે લાંબા સમય સુધી વરસાદી માહોલ રહેશે અને લોકોને કાળઝાળ ગરમીથી રાહત મળશે.