દેડિયાપાડા સહિત અનેક વિસ્તારોમાં કરા સાથે માવઠું, ભર ઉનાળે ચોમાસા જેવો માહોલ

ગુજરાતમાં ભર ઉનાળે અચાનક વરસાદી માહોલ સર્જાતા લોકોમાં આશ્ચર્ય જોવા મળી રહ્યું છે. રાજ્યના સૌરાષ્ટ્ર અને દક્ષિણ ગુજરાતના અનેક વિસ્તારોમાં કમોસમી વરસાદ વરસ્યો છે. ખાસ કરીને નર્મદા જિલ્લાના સાગબારા અને દેડિયાપાડા વિસ્તારમાં કરા સાથે માવઠું થતાં વાતાવરણમાં ઠંડક પ્રસરી ગઈ હતી.

દેડિયાપાડામાં કરા સાથે વરસાદ
નર્મદા જિલ્લાના દેડિયાપાડા તાલુકા સહિત આસપાસના વિસ્તારોમાં કરા સાથે કમોસમી વરસાદ પડ્યો હતો. ભારે પવન અને વરસાદને કારણે અનેક વિસ્તારોમાં રસ્તાઓ પર પાણી ફરી વળ્યા હતા. ભર ઉનાળે ચોમાસા જેવી સ્થિતિ સર્જાતા સ્થાનિક લોકો આશ્ચર્યચકિત બન્યા હતા.

સાયક્લોનિક સર્ક્યુલેશનના કારણે બદલાયું વાતાવરણ
હવામાન વિભાગના જણાવ્યા અનુસાર રાજ્યમાં સર્જાયેલા સાયક્લોનિક સર્ક્યુલેશન અને સક્રિય ટ્રફ લાઇનના કારણે વાતાવરણમાં અસ્થિરતા જોવા મળી રહી છે. જેના પરિણામે આગામી કલાકોમાં પણ અનેક જિલ્લાઓમાં ગાજવીજ સાથે હળવાથી મધ્યમ વરસાદની શક્યતા વ્યક્ત કરવામાં આવી છે.

આ જિલ્લાઓમાં વરસાદની આગાહી
હવામાન વિભાગે સૌરાષ્ટ્રના રાજકોટ, જૂનાગઢ, ગીર સોમનાથ, અમરેલી, ભાવનગર અને બોટાદ જિલ્લામાં હળવા વરસાદની આગાહી કરી છે.
તે ઉપરાંત પૂર્વ અને દક્ષિણ ગુજરાતના દાહોદ, છોટા ઉદેપુર, નર્મદા, તાપી અને ડાંગ જિલ્લામાં પણ ગાજવીજ અને પવન સાથે કમોસમી વરસાદ પડી શકે છે.

ખેડૂતોમાં ચિંતા
અચાનક બદલાયેલા વાતાવરણને કારણે ખેડૂતોમાં ચિંતા વધી છે. ખાસ કરીને પાક કાપણી અને કૃષિ કામગીરી વચ્ચે પડતા માવઠાથી નુકસાન થવાની ભીતિ વ્યક્ત કરવામાં આવી રહી છે. બીજી તરફ ગરમીથી કંટાળેલા લોકોને વરસાદથી થોડી રાહત અનુભવાઈ છે.