Bindia
ગુજરાતમાં એપ્રિલ-2026માં યોજાનારી સ્થાનિક સ્વરાજ્ય સંસ્થાઓની ચૂંટણીઓ પહેલાં રાજકીય માહોલ ગરમાઈ રહ્યો છે. ચૂંટણી માટે કોંગ્રેસે પોતાનું સંગઠન મજબૂત કરવા અને પ્રચાર અભિયાન તેજ કરવા માટે 40 સ્ટાર પ્રચારકોની સત્તાવાર યાદી જાહેર કરી છે.
ગુજરાત પ્રદેશ કોંગ્રેસ સમિતિ દ્વારા જાહેર કરાયેલી આ યાદી રાજ્ય ચૂંટણી પંચને પણ સોંપવામાં આવી છે. પક્ષના પ્રદેશ પ્રમુખ અમિત ચાવડાએ આ યાદી રજૂ કરી હોવાનું જાણવા મળે છે. આ પ્રચારકો રાજ્યના વિવિધ જિલ્લાઓ અને શહેરોમાં જઈને કોંગ્રેસના ઉમેદવારો માટે પ્રચારની જવાબદારી સંભાળશે.
આ યાદીમાં રાષ્ટ્રીય અને પ્રદેશ સ્તરના અનુભવી નેતાઓ સાથે યુવા ચહેરાઓનું મિશ્રણ જોવા મળે છે. મુખ્ય નામોમાં મુકુલ વાસનિક, અમિત ચાવડા, શક્તિસિંહ ગોહિલ, ભરતસિંહ સોલંકી અને જગદીશ ઠાકોરનો સમાવેશ થાય છે.
સાંસદ અને ધારાસભ્યોમાંથી ગેનીબેન ઠાકોર, જીજ્ઞેશ મેવાણી, શૈલેષ પરમાર, અનંત પટેલ અને ઈમરાન ખેડાવાલા જેવા નેતાઓને પણ સ્ટાર પ્રચારક તરીકે સ્થાન આપવામાં આવ્યું છે. તે ઉપરાંત પરેશ ધાનાણી, તુષાર ચૌધરી, સિદ્ધાર્થ પટેલ અને યુથ કોંગ્રેસના શ્રીનિવાસ બી.વી. જેવા અગ્રણી નેતાઓને પણ પ્રચારની જવાબદારી સોંપવામાં આવી છે.
રાજકીય વિશ્લેષકોના જણાવ્યા મુજબ કોંગ્રેસે આ યાદીમાં અનુભવી અને યુવા નેતાઓનું સંતુલન જાળવીને સ્થાનિક મુદ્દાઓ સાથે જ્ઞાતિગત સમીકરણોને પણ ધ્યાનમાં લીધા છે. આવનારા દિવસોમાં ચૂંટણી પ્રચાર વધુ તેજ બનવાની શક્યતા છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
