હોર્મુઝમાં 20% ટોલ ટેક્સના ટ્રમ્પના એલાન પર બ્રાઝિલ ભડક્યું, રાષ્ટ્રપ્રમુખ લૂલાએ કરી આકરી ટીકા

અમેરિકાના રાષ્ટ્રપતિ ડોનાલ્ડ ટ્રમ્પ દ્વારા સ્ટ્રેટ ઓફ હોર્મુઝમાંથી પસાર થતા માલવાહક જહાજો પર 20 ટકા ટોલ ટેક્સ વસૂલવાની જાહેરાત બાદ આંતરરાષ્ટ્રીય સ્તરે વિરોધના સૂર ઉઠ્યા છે. બ્રાઝિલના રાષ્ટ્રપ્રમુખ લૂઈસ ઈનાસિયો લૂલા ડા સિલ્વાએ ટ્રમ્પના આ પ્રસ્તાવની આકરી ટીકા કરતાં તેને આંતરરાષ્ટ્રીય નિયમોની ભાવનાના વિરુદ્ધ ગણાવ્યો છે.

ટ્રમ્પના નિર્ણયને ગણાવ્યો ‘ડકેતી’ સમાન
ટ્રમ્પે જણાવ્યું હતું કે અમેરિકા હવે સ્ટ્રેટ ઓફ હોર્મુઝમાં સુરક્ષા સુનિશ્ચિત કરશે અને તેના બદલામાં ત્યાંથી પસાર થતા કાર્ગો જહાજો પાસેથી 20 ટકા ચાર્જ વસૂલશે. આ નિવેદન પર પ્રતિક્રિયા આપતા બ્રાઝિલના રાષ્ટ્રપ્રમુખ લૂલાએ કહ્યું કે, “જૂના સમયમાં આવી કાર્યવાહી ડકેતી તરીકે ઓળખાતી હતી.”

‘અમેરિકા દરિયાઈ લૂંટારું ન બને’
લૂલાએ જણાવ્યું કે અમેરિકા જેવા શક્તિશાળી દેશે આંતરરાષ્ટ્રીય જળમાર્ગો પર એકતરફી આર્થિક નિયંત્રણ લાદવાનો પ્રયાસ ન કરવો જોઈએ. તેમના મતે સ્ટ્રેટ ઓફ હોર્મુઝ વૈશ્વિક વેપાર માટે મહત્વપૂર્ણ જળમાર્ગ છે અને તે હંમેશા તમામ દેશો માટે મુક્ત નેવિગેશન માટે ખુલ્લો રહ્યો છે. તેમણે આરોપ લગાવ્યો કે ટ્રમ્પ સરકાર વૈશ્વિક સંકટમાંથી આર્થિક લાભ મેળવવાનો પ્રયાસ કરી રહી છે.

ટ્રમ્પનું સોશિયલ મીડિયા નિવેદન
ડોનાલ્ડ ટ્રમ્પે સોશિયલ મીડિયા પર લખ્યું હતું કે અમેરિકા હવે “હોર્મુઝ સ્ટ્રેટના રક્ષક” તરીકે કામગીરી કરશે. તેમણે જણાવ્યું કે આ વિસ્તારની સુરક્ષા માટે તમામ કાર્ગો જહાજો પર 20 ટકા ચાર્જ વસૂલવામાં આવશે અને આ નિર્ણય તાત્કાલિક અમલમાં આવશે.

આંતરરાષ્ટ્રીય સ્તરે વધી શકે છે ચર્ચા
હોર્મુઝ સ્ટ્રેટ વિશ્વના સૌથી મહત્વપૂર્ણ તેલ પરિવહન માર્ગોમાંનો એક છે. આવા મહત્વના જળમાર્ગ પર કોઈપણ પ્રકારના નવા શુલ્ક અથવા નિયંત્રણની જાહેરાત વૈશ્વિક વેપાર, તેલ બજાર અને આંતરરાષ્ટ્રીય રાજદ્વારી પર અસર કરી શકે છે. ટ્રમ્પના પ્રસ્તાવને લઈને વિવિધ દેશોની પ્રતિક્રિયાઓ સામે આવવાની શક્યતા છે.

 

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276