Bindia
રાજ્યમાં ઠંડીનું પ્રમાણ ઘટવાની સાથે ગરમીના પ્રમાણમાં વધારો નોંધાઈ રહ્યો છે. એટલે કે, લઘુત્તમ તાપમાન ઘટી રહ્યું છે અને બીજી તરફ મહત્તમ તાપમાનમાં વધારો નોંધાઈ રહ્યો છે. રાજ્યમાં સૌથી નીચું લઘુત્તમ તાપમાન હવે 10ની ઉપર નોંધાઈ રહ્યું છે. બપોરના સમયે તાપમાનનો પારો 35ને પાર કરી રહ્યો છે. આગામી સમયમાં લઘુત્તમ અને મહત્તમ તાપમાનમાં વધારો થવાની સંભાવનાઓ હવામાન વિભાગ દ્વારા વ્યક્ત કરવામાં આવી રહી છે. આ સિવાય ગુજરાતમાં ક્યાંય માવઠાની કે કોઈ મોટી ચેતવણીની સંભાનાઓ હવામાન વિભાગે વ્યક્ત કરી નથી.
ગુજરાતના હવામાન વિભાગ દ્વારા શુક્રવારે બપોરે જે આગાહી કરી હતી તેમાં ત્રણ દિવસ સુધી લઘુત્તમ અને મહત્તમ તાપમાનમાં કોઈ મોટા ફેરફાર ન થવાની આગાહી કી હતી. જોકે, આ પછી તાપમાનમાં વધારો થવાની સંભાવનાઓ વ્યક્ત કરી છે. આમ ધીમે-ધીમે લઘુત્તમ અને મહત્તમ તાપમાનમાં વધારો નોંધાઈ રહ્યો છે.
હવામાન વિભાગે 14મી ફેબ્રુઆરીએ કરેલી આગાહીમાં રાજ્યમાં સૌથી નીચું નલિયામાં 12 ડિગ્રી સેલ્સિયસ લઘુત્તમ તાપમાન નોંધાયું હતું, જ્યારે સૌથી ઊંચું મહત્તમ તાપમાન વેરાવળમાં 36 ડિગ્રી સેલ્સિયસ નોંધાયું હતું. અમદાવાદમાં મહત્તમ તાપમાન 32 અને લઘુત્તમ તાપમાન 16 ડિગ્રી સેલ્સિયસ નોંધાયું હતું.
હવામાન વિભાગ દ્વારા જે આગાહી કરવામાં આવી છે તેમાં 7 દિવસ સુધી એટલે કે 21મી ફેબ્રુઆરી સુધી વરસાદની સંભાવનાઓ ન હોવાનું જણાવ્યું છે, આ સાથે જ કોઈ ચેતવણી ન હોવાનું પણ જણાવવામાં આવ્યું છે. ફેબ્રુઆરી મધ્ય ભાગમાં પહોંચ્યો છે. અને તેના અંત સુધીમાં હવે મહત્તમ તાપમાનમાં ફેરફારો થવાની શરુઆત થઈ ગઈ છે. માર્ચની શરુઆતથી તાપમાનમાં વધારો થઈને તે સમગ્ર રાજ્યમાં 37ની આસપાસ પહોંચી શકે છે.
