Bindia
રાજકોટ શહેરમાં ફરી એકવાર ખૂની ખેલ ખેલાયો છે. પ્રેમિકાની અન્ય યુવક સાથે સગાઈ નક્કી થઈ જતા પ્રેમી દ્વારા યુવતીને ચારથી વધુ છરીના ઘા ઝીંકીને હત્યાનો પ્રયાસ કરવામાં આવ્યો હતો. પોતાની પ્રેમિકાને છરીના ઘા ઝીંક્યા બાદ પ્રેમી દ્વારા પોતાને પણ છરીના ઘા ઝીંકી આત્મહત્યાનો પ્રયાસ કરવામાં આવ્યો હતો.ત્યારે હાલ સારવાર અર્થે બંનેને હોસ્પિટલ ખાતે ખસેડવામાં આવ્યા હોવાનું સામે આવ્યું છે. રાજકોટ શહેરના જંગલેશ્વર વિસ્તારમાં સંજય મકવાણા નામના વ્યક્તિ દ્વારા પોતાની પ્રેમિકા પર જીવલેણ હુમલો કરવામાં આવ્યો હતો.
છાતીના વચ્ચેના ભાગે બે ઘા, ડાબા પગના સાથળના ભાગે, પેટના ભાગે તેમજ જમણા હાથમાં કોણીથી નીચેના ભાગે આડેધડ છરીના ઘા મારી ગંભીર ઈજાઓ પહોંચાડી મોત નીપજાવવાની કોશિશ કરી હોવાનું સામે આવ્યું છે. તેમજ ત્યારબાદ સંજય મકવાણા દ્વારા પોતાને પણ છરીના ઘા ઝીંકી આત્મહત્યાનો પ્રયાસ કરવામાં આવ્યો છે. યુવતીની મોટી બહેન દ્વારા ભક્તિનગર પોલીસ સ્ટેશન ખાતે સંજય મકવાણા વિરુદ્ધ કલમ 109 (1), 118(2) સહિતની કલમ હેઠળ ગુનો નોંધાવામાં આવ્યો છે.
પોલીસને આપેલી ફરિયાદમાં જણાવાયું છે કે, “સંજય મકવાણા અને મારી નાની બહેન વચ્ચે છેલ્લા પાંચ-છ વર્ષથી પ્રેમ સંબંધ છે. મારી બહેન સંજય સાથે લગ્ન કરશે તેવું સંજયને કહ્યું હતું. પરંતુ તાજેતરમાં જ મારી બહેનની સગાઈ માંગરોળ ખાતે નક્કી થઈ હતી. જે બાબતની જાણ સંજયને થઈ જતા તે બાબતનો ખાર રાખીને સંજય દ્વારા મારી બહેનનું મોત નીપજાવવાની કોશિશ કરવામાં આવી છે.” પોલીસે હાલ તો પ્રેમી વિરુદ્ધ ફરિયાદ નોંધી છે. અને વધુ તપાસ હાથ ધરી છે.
