છ વર્ષ બાદ ભારત-મ્યાનમાર સરહદે ફરી શરૂ થશે સરહદી વેપાર, 20 જુલાઈથી પેંગસાઉ પાસ પર ટ્રેડને મળશે ગતિ

ભારત અને મ્યાનમાર વચ્ચે છ વર્ષથી બંધ રહેલો સરહદી વેપાર ફરી શરૂ થવા જઈ રહ્યો છે. બંને દેશોના વેપારી સંગઠનો વચ્ચે થયેલી બેઠક બાદ 20 જુલાઈથી અરુણાચલ પ્રદેશના પેંગસાઉ પાસ મારફતે બોર્ડર ટ્રેડ ફરી શરૂ કરવાનો નિર્ણય લેવામાં આવ્યો છે. કોવિડ-19 મહામારી દરમિયાન આ વેપાર સ્થગિત કરવામાં આવ્યો હતો.

20 જુલાઈથી શરૂ થશે બોર્ડર ટ્રેડ
સ્થાનિક વેપારી પ્રતિનિધિઓ અને મ્યાનમારના તેમના સમકક્ષો વચ્ચે 9 જુલાઈએ અરુણાચલ પ્રદેશના ચાંગલાંગ જિલ્લામાં બેઠક યોજાઈ હતી. આ બેઠકમાં સરહદી વેપાર ફરી શરૂ કરવા અંગે અંતિમ સહમતી બન્યા બાદ 20 જુલાઈથી વેપાર શરૂ કરવાનો નિર્ણય લેવાયો છે. ‘ફ્રી મૂવમેન્ટ રિજીમ’ હેઠળ સરહદની બંને બાજુએ 10 કિલોમીટરના વિસ્તારમાં રહેતા લોકોને સ્થાનિક સ્તરે વેપાર અને સરહદ પાર લેવડ-દેવડ કરવાની મંજૂરી આપવામાં આવે છે.

કોવિડ બાદ ફરી મળશે વેપારને વેગ
3 ફેબ્રુઆરી, 2020ના રોજ કોવિડ-19 મહામારીને કારણે બંધ કરાયેલ ટ્રેડ રૂટ હવે ફરી કાર્યરત બનશે. સ્થાનિક વેપારીઓનું માનવું છે કે આ નિર્ણયથી લાંબા સમયથી અસરગ્રસ્ત વેપારને નવી ગતિ મળશે અને સરહદી વિસ્તારોના લોકોની આજીવિકામાં સુધારો થશે. સ્થાનિક વેપારી સંગઠનના પ્રમુખ જોંગખમ મોરાંગે આશા વ્યક્ત કરી કે વેપાર શરૂ થતાં મહામારી દરમિયાન થયેલા આર્થિક નુકસાનની ભરપાઈ કરવામાં મદદ મળશે.

સ્થાનિક અર્થતંત્રને મળશે પ્રોત્સાહન
સ્થાનિક ધારાસભ્ય લેસમ સિમાઈએ જણાવ્યું કે સરહદી વેપાર ફરી શરૂ થવાથી નાના વેપારીઓ માટે નવી તકો ઊભી થશે અને સ્થાનિક અર્થતંત્રને પણ વેગ મળશે. બોર્ડર હાટ દર મહિનાની 10, 20 અને 30 તારીખે યોજાશે.

લિપુલેખ પાસ પર વેપાર શરૂ થવામાં હજુ વિલંબ
બીજી તરફ, ભારત-ચીન સરહદ પર આવેલા લિપુલેખ પાસ મારફતે વેપાર હજુ શરૂ થઈ શક્યો નથી. અહેવાલો અનુસાર, ચીની અધિકારીઓએ તિબેટના તકલાકોટ ખાતે નવા બજાર અને વેરહાઉસનું કામ પૂર્ણ ન થાય ત્યાં સુધી ભારતીય વેપારીઓને રાહ જોવાનું જણાવ્યું છે. ધારચુલાના SDM અને ટ્રેડ ઓફિસર આશિષ જોશીના જણાવ્યા મુજબ, ચીની અધિકારીઓ તરફથી મળેલા સંદેશમાં જણાવાયું છે કે જરૂરી માળખાકીય સુવિધાઓનું કામ પૂર્ણ થયા બાદ વેપાર શરૂ કરવાની નવી તારીખ જાહેર કરવામાં આવશે. લિપુલેખ માર્ગે સરહદી વેપાર પણ કોવિડ-19 દરમિયાન વર્ષ 2020માં સ્થગિત કરવામાં આવ્યો હતો અને તેના પુનઃપ્રારંભ અંગે વેપારીઓ હવે નવી તારીખની રાહ જોઈ રહ્યા છે.