ભારે વરસાદને લઈ DyCM હર્ષ સંઘવીની ઉચ્ચસ્તરીય સમીક્ષા બેઠક, કહ્યું- નાગરિકોની સુરક્ષા અમારી સર્વોચ્ચ પ્રાથમિકતા

ગુજરાતમાં છેલ્લા 24 કલાક દરમિયાન અનેક જિલ્લાઓમાં ભારેથી અતિભારે વરસાદ બાદ રાજ્ય સરકાર એલર્ટ મોડમાં આવી ગઈ છે. પરિસ્થિતિની સમીક્ષા કરવા માટે ગાંધીનગર ખાતે નાયબ મુખ્યમંત્રી હર્ષ સંઘવીની અધ્યક્ષતામાં ઉચ્ચસ્તરીય બેઠક યોજાઈ હતી, જેમાં વરસાદથી પ્રભાવિત જિલ્લાઓના અધિકારીઓ સાથે વીડિયો કોન્ફરન્સ મારફતે ચર્ચા કરવામાં આવી હતી.

અનેક જિલ્લાઓના અધિકારીઓ સાથે સમીક્ષા
બેઠક દરમિયાન સુરત, નવસારી, વલસાડ, ભાવનગર, દાહોદ, પંચમહાલ, મહીસાગર, મહેસાણા, સુરેન્દ્રનગર, અમદાવાદ, અમરેલી, ડાંગ, તાપી, જૂનાગઢ અને ગીર સોમનાથ સહિતના જિલ્લાઓના કલેક્ટર, પોલીસ અધિક્ષક, જિલ્લા વિકાસ અધિકારીઓ અને મહાનગરોના કમિશનરો પાસેથી ગ્રાઉન્ડ લેવલની સ્થિતિ અંગે માહિતી લેવામાં આવી.

24×7 એલર્ટ રહેવા સૂચના
નાયબ મુખ્યમંત્રીએ તમામ જિલ્લા વહીવટી તંત્રને 24 કલાક કાર્યરત રહેવા અને કંટ્રોલ રૂમ સતત સક્રિય રાખવાના નિર્દેશ આપ્યા છે. ભારે વરસાદને ધ્યાનમાં રાખીને દરેક પરિસ્થિતિમાં ઝડપી પ્રતિસાદ આપવા અધિકારીઓને સૂચના આપવામાં આવી છે.

NDRF-SDRF ટીમોને તૈયાર રહેવા આદેશ
નીચાણવાળા અને પૂરની સંભાવના ધરાવતા વિસ્તારોમાં જરૂર મુજબ NDRF અને SDRFની ટીમોને તાત્કાલિક તૈનાત કરવા સૂચના આપવામાં આવી છે. સાથે જ જોખમી વિસ્તારોમાંથી લોકોને સમયસર સુરક્ષિત સ્થળોએ સ્થળાંતરિત કરી ભોજન, પીવાનું પાણી અને આરોગ્ય સેવાઓ ઉપલબ્ધ કરાવવા પણ નિર્દેશ આપવામાં આવ્યા છે.

રોડ, વીજળી અને સંચાર વ્યવસ્થા પર નજર
સરકારે ભારે વરસાદ દરમિયાન જનજીવન પર ઓછી અસર પડે તે માટે માર્ગ વ્યવસ્થા, વીજ પુરવઠો અને સંચાર સેવાઓ પર સતત નજર રાખવા સંબંધિત વિભાગોને સૂચના આપી છે.

‘નાગરિકોની સુરક્ષા પ્રથમ પ્રાથમિકતા’
નાયબ મુખ્યમંત્રી હર્ષ સંઘવીએ જણાવ્યું કે રાજ્ય સરકાર સમગ્ર પરિસ્થિતિ પર સતત નજર રાખી રહી છે. આપત્તિ સમયે નાગરિકોની સુરક્ષા અને જરૂરી સુવિધાઓ પૂરી પાડવી સરકારની સર્વોચ્ચ પ્રાથમિકતા છે. તમામ જિલ્લા તંત્રને પરસ્પર સંકલન સાથે ઝડપી અને અસરકારક કામગીરી કરવા માટે જરૂરી તમામ સૂચનાઓ આપવામાં આવી છે.