યુક્રેનનો રશિયા પર મોટો ડ્રોન હુમલો, ઓઈલ રિફાઈનરીમાં ભીષણ આગ; અલગ-અલગ ઘટનાઓમાં 3ના મોત

રશિયા અને યુક્રેન વચ્ચેનો સંઘર્ષ વધુ ઉગ્ર બનતો જઈ રહ્યો છે. રવિવારે યુક્રેને રશિયાના અનેક વિસ્તારોમાં લાંબા અંતરના ડ્રોન હુમલા કર્યા હોવાનું સામે આવ્યું છે. આ હુમલામાં દક્ષિણ રશિયાની એક મોટી ઓઈલ રિફાઈનરીમાં ભીષણ આગ લાગી હતી. વિવિધ હુમલા અને સંબંધિત ઘટનાઓમાં કુલ ત્રણ લોકોના મોત થયાના અહેવાલ છે.

સ્લાવ્યાંસ્ક ઓઈલ રિફાઈનરીમાં લાગી આગ
રશિયાના ક્રાસ્નોડાર ક્ષેત્રના ગવર્નરના જણાવ્યા અનુસાર, સ્લાવ્યાંસ્ક-ના-કુબાન શહેરમાં આવેલી ઓઈલ રિફાઈનરી પર યુક્રેની ડ્રોનનો કાટમાળ પડતા આગ ભભૂકી ઊઠી હતી. આ રિફાઈનરી દર વર્ષે અંદાજે 40 લાખ ટન ક્રૂડ ઓઈલ પ્રોસેસ કરવાની ક્ષમતા ધરાવે છે. આગ બાદ ફાયર બ્રિગેડની ટીમોએ આગ પર કાબૂ મેળવવા માટે કામગીરી હાથ ધરી હતી.

બીજી રિફાઈનરીને પણ બનાવાઈ નિશાન
અહેવાલો અનુસાર, યુક્રેને રશિયાના યારોસ્લાવ વિસ્તારમાં આવેલી બીજી ઓઈલ રિફાઈનરીને પણ નિશાન બનાવી હતી. આ વિસ્તાર સરહદથી લગભગ 700 કિલોમીટર દૂર આવેલો છે. હુમલા બાદ સુરક્ષાના પગલાંરૂપે કેટલાક રસ્તાઓ અને એરપોર્ટની કામગીરીને અસ્થાયી રીતે બંધ કરવામાં આવી હતી.

ઈંધણ સપ્લાય પર અસર
યુક્રેનના સતત હુમલાઓને કારણે રશિયામાં ઈંધણ સપ્લાય પર અસર જોવા મળી રહી છે. અહેવાલો મુજબ, રશિયાના કબજા હેઠળના ક્રિમિયામાં પેટ્રોલના વેચાણ પર નિયંત્રણ મૂકવામાં આવ્યું છે. સાઈબેરીયાના ઈરકુત્સ્ક વિસ્તારમાં ઈંધણની અછતને કારણે સરકારી પેટ્રોલ પંપ પરથી પ્રતિ વ્યક્તિ રોજના માત્ર 50 લિટર પેટ્રોલ વેચવાની મર્યાદા નક્કી કરવામાં આવી છે. ખાનગી પેટ્રોલ પંપોએ પણ સપ્લાયમાં વિક્ષેપને કારણે વેચાણ મર્યાદિત કર્યું હોવાનું જણાવાયું છે.

બંને દેશોના ભારે ડ્રોન અને મિસાઈલ હુમલા
છેલ્લા 24 કલાક દરમિયાન બંને દેશોએ એકબીજા પર ભારે ડ્રોન અને મિસાઈલ હુમલા કર્યા હોવાના દાવા કર્યા છે. રશિયાના રક્ષા મંત્રાલયે જણાવ્યું કે ક્રિમિયા અને બ્લેક સી વિસ્તારમાં યુક્રેનના 213 ડ્રોનને તોડી પાડવામાં આવ્યા છે. બીજી તરફ, યુક્રેને દાવો કર્યો છે કે રશિયાએ 142 ડ્રોન અને 8 મિસાઈલથી હુમલો કર્યો હતો, જેમાંથી યુક્રેનની એરફોર્સે 125 ડ્રોન અને 7 મિસાઈલને હવામાં જ નષ્ટ કરી દીધી હતી.