ગુજરાતમાં પ્રી-મોન્સૂન એક્ટિવિટી તેજ, દક્ષિણ ગુજરાતમાં ભારે વરસાદનું યલો એલર્ટ

ગુજરાતમાં હજુ સત્તાવાર રીતે ચોમાસાના આગમનની રાહ જોવાઈ રહી છે, પરંતુ રાજ્યમાં પ્રી-મોન્સૂન એક્ટિવિટી જોર પકડી રહી છે. ટ્રફ સિસ્ટમ સક્રિય થતાં આગામી છ દિવસ દરમિયાન રાજ્યના વિવિધ વિસ્તારોમાં ગાજવીજ, તેજ પવન અને વરસાદી માહોલ રહેવાની શક્યતા વ્યક્ત કરવામાં આવી છે.

દક્ષિણ ગુજરાતમાં ભારે વરસાદની આગાહી
ભારતીય હવામાન વિભાગ (IMD) દ્વારા 22 જૂન માટે દક્ષિણ ગુજરાતના સુરત, નવસારી, વલસાડ અને ડાંગ જિલ્લામાં ભારે વરસાદનું યલો એલર્ટ જાહેર કરવામાં આવ્યું છે. આ વિસ્તારોમાં કેટલાક સ્થળોએ મધ્યમથી ભારે વરસાદ નોંધાઈ શકે છે.

23 જૂને સૌરાષ્ટ્ર સહિત અનેક જિલ્લાઓમાં વરસાદ
IMDની આગાહી મુજબ 23 જૂને અમદાવાદ, ખેડા, આણંદ, પંચમહાલ, દાહોદ, મહીસાગર, રાજકોટ, જૂનાગઢ, અમરેલી, ભાવનગર, બોટાદ અને ગીર સોમનાથ જિલ્લામાં છૂટાછવાયા સ્થળોએ હળવાથી મધ્યમ વરસાદ પડી શકે છે. દક્ષિણ ગુજરાતના તમામ જિલ્લાઓમાં પણ વરસાદી માહોલ રહેવાની સંભાવના છે. આ ઉપરાંત ઉત્તર ગુજરાત અને સૌરાષ્ટ્રના કેટલાક વિસ્તારોમાં 40થી 50 કિલોમીટર પ્રતિ કલાકની ઝડપે પવન ફૂંકાવા સાથે મેઘગર્જના થવાની શક્યતા છે.

24થી 26 જૂન દરમિયાન પણ વરસાદી માહોલ
હવામાન વિભાગના અનુમાન મુજબ 24થી 26 જૂન દરમિયાન સુરત, નવસારી, વલસાડ, ડાંગ, તાપી તેમજ સૌરાષ્ટ્રના અમરેલી, ભાવનગર અને ગીર સોમનાથ જિલ્લામાં ગાજવીજ સાથે છૂટોછવાયો વરસાદ પડી શકે છે. જેના કારણે અનેક વિસ્તારોમાં ગરમીમાંથી આંશિક રાહત મળવાની આશા છે.

અમદાવાદમાં બફારો યથાવત્
અમદાવાદ શહેર અને આસપાસના વિસ્તારોમાં આગામી દિવસોમાં આકાશ સામાન્ય રીતે વાદળછાયું રહેવાની શક્યતા છે. સાંજ અથવા રાત્રિના સમયે હળવા વરસાદી ઝાપટાં પડી શકે છે. જોકે તાપમાનમાં કોઈ ખાસ ઘટાડો થવાની સંભાવના નથી. મહત્તમ તાપમાન આશરે 41 ડિગ્રી સેલ્સિયસ રહેતાં બફારો અને ઉકળાટ યથાવત્ રહેવાની શક્યતા છે.

દેશમાં ચોમાસાની આગળ વધતી ગતિ
IMDના જણાવ્યા અનુસાર નૈઋત્યનું ચોમાસું દેશના અનેક વિસ્તારોમાં ઝડપથી આગળ વધી રહ્યું છે. 22 જૂન સુધીમાં ચોમાસું મધ્ય અરબી સમુદ્ર, મહારાષ્ટ્ર, તેલંગાણા, કર્ણાટક, છત્તીસગઢ, ઓડિશા, ઝારખંડ અને બિહારના વધુ વિસ્તારોમાં પહોંચી ગયું છે. આગામી 48 કલાક દરમિયાન મુંબઈ સહિત મહારાષ્ટ્રના બાકીના વિસ્તારોમાં પણ ચોમાસું સક્રિય થવા માટે અનુકૂળ પરિસ્થિતિઓ સર્જાઈ રહી છે.