AMC ઉત્તર ઝોન: મ્યુનિ. પોલ ચણી લેવાયા બાદ વોર્ડ ઇન્સ્પેક્ટર વરૂણ રાવલને નાછૂટકે આપી શો-કોઝ નોટિસ!

– સાતેય ઝોનમાં ગેરકાયદે બાંધકામોની તપાસ થાય તો આખું એસ્ટેટ તંત્ર નોટિસને પાત્ર: ઉચ્ચ અધિકારીઓ કેમ મૌન?

પંકજ મકવાણા – અમદાવાદ: અમદાવાદ મહાનગરપાલિકાના ઉત્તર ઝોનમાં એસ્ટેટ-TDO વિભાગ અને સ્થાનિક ભૂમાફિયાઓની મિલીભગતનો વધુ એક જીવતો-જાગતો પુરાવો સામે આવ્યો છે! સરદારનગર વિસ્તારમાં ગેરકાયદે બાંધકામની આડમાં મ્યુનિસિપલ કોર્પોરેશનના આખેઆખા સ્ટ્રીટ લાઈટ પોલને પણ દિવાલમાં ચણી લેવાના અજીબોગરીબ બાંધકામનો પર્દાફાશ થયો છે. ચારેકોરથી ઘેરાયેલા વહીવટી તંત્રએ આખરે આ મામલે નાછૂટકે કુબેરનગર વોર્ડના ટીડીઓ ઇન્સ્પેક્ટર વરૂણ રાવલને શો-કોઝ નોટિસ ફટકારીને સંતોષ માન્યો છે.

ચોંકાવનારી મોડસ ઓપરેન્ડી: પોલ પર જ આરસીસી ધાબું ભરી દીધું!

ઉત્તર ઝોન એસ્ટેટ ખાતાના સત્તાવાર વિશ્વસનીય સૂત્રોના જણાવ્યા અનુસાર, કુબેરનગર વોર્ડ હેઠળ આવતી સરદારનગર ટાઉનશીપમાં ગુલશન પાર્ટી પ્લોટની બાજુમાં, માયા સિનેમાની સામે આ ગેરરીતિ આચરવામાં આવી છે. ઢાલુમલ કલ્યાણી નામના આસામી દ્વારા કરવામાં આવેલા ગેરકાયદે બાંધકામમાં તંત્રની આંખ સામે મ્યુનિસિપલ કોર્પોરેશનના લાઈટ પોલને ગળી જવામાં આવ્યો હતો. આ પોલને કવર કરી તેની ઉપર આરસીસી (RCC) ધાબું પણ ભરી દેવાયું હોવાના અહેવાલોથી ઉત્તર ઝોનના એસ્ટેટ ખાતામાં ભારે ખળભળાટ મચી ગયો છે.

ઉચ્ચ અધિકારીઓની ભૂમિકા શંકાના દાયરામાં!

સૂત્રોએ બંધ બારણે સ્વીકાર્યું છે કે, કુબેરનગર, સરદારનગર અને નરોડા જેવા સંવેદનશીલ વિસ્તારોમાં સ્થાનિક રાજકારણીઓ અને એસ્ટેટ-ટીડીઓ વિભાગના મેળાપીપણાથી જ આવા ગેરકાયદે બાંધકામો ધમધમી રહ્યા છે! સવાલ એ ઊભો થાય છે કે, શું ઉત્તર ઝોનના ડેપ્યુટી એસ્ટેટ ઓફિસર કે આસિસ્ટન્ટ એસ્ટેટ ઓફિસર આ ખુલ્લેઆમ ચાલતી ગેરકાયદે પ્રવૃત્તિઓથી અજાણ હતા? જો તેઓ અજાણ હોય, તો એ સાબિત થાય છે કે તેઓ વોર્ડમાં રાઉન્ડ લેવાની તસ્દી લેતા નથી અને જનતાની ફરિયાદો કચરાપેટીમાં નાખી રહ્યા છે!

માત્ર એકને જ નોટિસ કેમ? આખા તંત્ર સામે સવાલ

અમદાવાદના તમામ સાતેય ઝોનમાં આવેલા 48 વોર્ડમાં રહેણાક અને કોમર્શિયલ પ્રકારના ગેરકાયદે બાંધકામો બેરોકટોક ચાલી રહ્યા છે. વાસ્તવિકતા તો એ છે કે જો નિષ્પક્ષ તપાસ થાય, તો એસ્ટેટ-ટીડીઓ ખાતાના તમામ કર્મચારીઓ અને અધિકારીઓને શો-કોઝ નોટિસ આપવી પડે તેવી સ્થિતિ છે. પરંતુ કમનસીબી એ છે કે, મ્યુનિસિપલ કમિશનરથી માંડીને ડેપ્યુટી કમિશનર સુદ્ધાં આ ગંભીર ભ્રષ્ટાચાર સામે આંખ આડા કાન કરી રહ્યા છે, જે સમગ્ર વહીવટી તંત્રની દાનત સામે મોટા સવાલો ઊભા કરે છે.