‘લોકતંત્રની તાકાતે ચા વાળાને વડાપ્રધાન બનાવ્યો’: પેરિસમાં ભારતીય સમુદાયને સંબોધતા PM મોદી

વડાપ્રધાન નરેન્દ્ર મોદીએ ગુરુવારે ફ્રાન્સની રાજધાની પેરિસમાં ભારતીય સમુદાયને સંબોધન કરતાં ભારતના લોકતંત્રની શક્તિ, વિકાસયાત્રા અને વૈશ્વિક સ્તરે દેશની વધતી પ્રતિષ્ઠાનો ઉલ્લેખ કર્યો હતો. તેમણે કહ્યું કે ભારતના લોકતંત્રની સૌથી મોટી તાકાત એ છે કે એક સામાન્ય ‘ચા વાળાને’ દેશના વડાપ્રધાન પદ સુધી પહોંચાડવાની શક્તિ તેમાં છે.

‘12 વર્ષ સુધી સેવા કરવાનો મોકો લોકતંત્રની જીત’
ભારતીય સમુદાયને સંબોધતા વડાપ્રધાન મોદીએ જણાવ્યું કે સતત 12 વર્ષ સુધી દેશના ચૂંટાયેલા વડાપ્રધાન તરીકે સેવા આપવાનો અવસર તેમના જીવનનું સૌથી મોટું સૌભાગ્ય છે. તેમણે કહ્યું કે આ કોઈ વ્યક્તિગત સિદ્ધિ નથી, પરંતુ ભારતના મજબૂત અને જીવંત લોકતંત્રની જીત છે. તેમણે ઉમેર્યું કે દેશની જનતાએ તેમના પર જે વિશ્વાસ મૂક્યો છે તે વિકાસ અને જનકલ્યાણ માટે સતત પ્રેરણા આપે છે.

છેલ્લા 12 વર્ષમાં GDP બમણી થઈ
દેશની આર્થિક પ્રગતિ અંગે વાત કરતાં વડાપ્રધાને જણાવ્યું કે છેલ્લા 12 વર્ષ દરમિયાન ભારતની GDPમાં નોંધપાત્ર વધારો થયો છે અને દેશની અર્થવ્યવસ્થા બમણી થઈ છે. તેમણે જણાવ્યું કે આ સમયગાળા દરમિયાન દેશમાં એરપોર્ટોની સંખ્યા પણ લગભગ બમણી થઈ ગઈ છે, જેના કારણે કનેક્ટિવિટી અને આર્થિક પ્રવૃત્તિઓને નવી ગતિ મળી છે. વડાપ્રધાને દાવો કર્યો કે છેલ્લા કેટલાક વર્ષોમાં 25 કરોડથી વધુ લોકો ગરીબી રેખાથી બહાર આવ્યા છે અને સરકારની વિવિધ કલ્યાણકારી યોજનાઓનો લાભ સમાજના અંતિમ વ્યક્તિ સુધી પહોંચાડવાનો પ્રયાસ કરવામાં આવ્યો છે.

મહિલાઓ આજે અનેક ક્ષેત્રોમાં નેતૃત્વ કરી રહી છે
મહિલા સશક્તિકરણ અંગે વાત કરતાં પીએમ મોદીએ જણાવ્યું કે આજે ભારતીય મહિલાઓ શિક્ષણ, વિજ્ઞાન, ઉદ્યોગ, રમતગમત અને સ્ટાર્ટઅપ સહિતના અનેક ક્ષેત્રોમાં સફળતાપૂર્વક નેતૃત્વ કરી રહી છે. તેમણે કહ્યું કે મહિલાઓની ભાગીદારી વધવાથી દેશના વિકાસને નવી દિશા મળી રહી છે.

‘પેરિસ પ્રકાશ અને રંગોનું શહેર છે’
ફ્રાન્સમાં વસતા ભારતીય સમુદાયના યોગદાનની પ્રશંસા કરતાં વડાપ્રધાન મોદીએ કહ્યું કે પેરિસ પ્રકાશ અને રંગોનું શહેર તરીકે વિશ્વભરમાં જાણીતું છે, પરંતુ અહીં રહેતા ભારતીયોએ તેને વધુ રંગીન બનાવ્યું છે. તેમણે જણાવ્યું કે પેરિસમાં ભારતના વિવિધ રાજ્યો અને સંસ્કૃતિઓનું પ્રતિનિધિત્વ જોવા મળે છે. અહીં તમિલ, પંજાબી, ગુજરાતી, મરાઠી અને બંગાળી સહિત વિવિધ સમાજના લોકો વસવાટ કરે છે અને ભારતની સંસ્કૃતિને વૈશ્વિક સ્તરે પ્રસરાવી રહ્યા છે.

મોબાઈલ ઉત્પાદન ક્ષેત્રે ભારત વિશ્વમાં બીજા ક્રમે
વડાપ્રધાને જણાવ્યું કે ભારત આજે મોબાઈલ મેન્યુફેક્ચરિંગ ક્ષેત્રે વિશ્વમાં બીજા ક્રમે પહોંચ્યું છે. ટેક્નોલોજી, ડિજિટલ ઈનોવેશન અને સ્ટાર્ટઅપ ઈકોસિસ્ટમમાં ભારત ઝડપથી આગળ વધી રહ્યું છે. તેમણે ફ્રાન્સમાં વસતા ભારતીયોને ભારત-ફ્રાન્સ સંબંધોને વધુ મજબૂત બનાવવા બદલ અભિનંદન પાઠવ્યા અને 140 કરોડ ભારતીયોની શુભેચ્છાઓ પણ પહોંચાડી.

ભારતની વૈશ્વિક ભૂમિકા સતત મજબૂત બની રહી છે
પીએમ મોદીના સંબોધનમાં ભારતની આર્થિક પ્રગતિ, લોકશાહી મૂલ્યો, મહિલા સશક્તિકરણ અને વૈશ્વિક સ્તરે વધતી પ્રતિષ્ઠાનો ઉલ્લેખ મુખ્ય મુદ્દા તરીકે રહ્યો. તેમણે વિશ્વના વિવિધ દેશોમાં વસતા ભારતીયોને ભારતના વિકાસના મહત્વપૂર્ણ ભાગીદાર ગણાવ્યા.