Bindia
દેશની સૌથી મોટી એરલાઇન કંપની IndiGoની પેરન્ટ કંપની InterGlobe Aviationને માર્ચ 2026ના રોજ પૂર્ણ થયેલા ચોથા ત્રિમાસિક ગાળામાં મોટું નાણાકીય નુકસાન વેઠવું પડ્યું છે. કંપનીએ 29 મેના રોજ જાહેર કરેલા નાણાકીય પરિણામોમાં ₹2,536 કરોડની ચોખ્ખી ખોટ નોંધાવી છે. નોંધનીય છે કે ગયા વર્ષે આ જ ગાળામાં કંપનીએ ₹3,068 કરોડનો નફો કમાયો હતો. નબળા પરિણામોની અસર શેરબજારમાં પણ જોવા મળી હતી. પરિણામો જાહેર થયા બાદ ઇન્ડિગોના શેરમાં લગભગ 3 ટકાનો ઘટાડો નોંધાયો અને શેર ₹4,420 પર બંધ રહ્યો.
નુકસાન પાછળના મુખ્ય કારણો
કંપનીએ પોતાના નિવેદનમાં જણાવ્યું હતું કે અનેક પરિબળોના કારણે આ નુકસાન થયું છે. તેમાં મુખ્યત્વે ડોમેસ્ટિક ફ્લાઇટ્સમાં કેપેસિટી મર્યાદા, અમેરિકી ડોલર સામે રૂપિયાનું અવમૂલ્યન, એવિએશન ટર્બાઇન ફ્યુઅલ (ATF)ના સતત વધતા ભાવ અને ઓપરેશનલ ખર્ચમાં થયેલો વધારો સામેલ છે. આ ઉપરાંત કંપની પર ₹250 કરોડનો વન-ટાઇમ ખર્ચ પણ આવ્યો હતો, જેના કારણે નફાકારકતા પર વધુ દબાણ આવ્યું.
આવકમાં વધારો છતાં મુસાફરોની સંખ્યામાં ઘટાડો
જાન્યુઆરીથી માર્ચ 2026 દરમિયાન કંપનીની ઓપરેશનલ આવક વધીને ₹22,438 કરોડ રહી હતી, જ્યારે ગયા વર્ષે આ જ સમયગાળામાં તે ₹22,152 કરોડ હતી. જોકે, મિડલ ઈસ્ટમાં ચાલી રહેલા તણાવ અને યુદ્ધ જેવી પરિસ્થિતિઓના કારણે આંતરરાષ્ટ્રીય ફ્લાઇટ્સના શિડ્યૂલ પર અસર પડી હતી. તેના પરિણામે ઇન્ડિગોના મુસાફરોની સંખ્યા 1.1 ટકા ઘટીને 3.16 કરોડ રહી હતી. સાથે જ કંપનીનો લોડ ફેક્ટર પણ ઘટીને 85.8 ટકા પર આવી ગયો હતો.
નવા વિમાન અને એન્જિન ખરીદવાની તૈયારી
પડકારજનક સ્થિતિ વચ્ચે પણ ઇન્ડિગોએ પોતાના વિસ્તરણના આયોજનને ચાલુ રાખવાની જાહેરાત કરી છે. કંપનીના બોર્ડે તેની પેટાકંપની ‘ઇન્ટરગ્લોબ એવિએશન ફાઇનાન્સિયલ સર્વિસિસ (IFSC) પ્રાઇવેટ લિમિટેડ’ દ્વારા ફાઇનાન્સ લીઝ પેમેન્ટ્સના આંશિક પ્રી-પેમેન્ટને મંજૂરી આપી છે. કંપની તબક્કાવાર 450 મિલિયન ડોલર સુધીની ચુકવણી કરશે. આ રકમનો ઉપયોગ નવા વિમાન, એરક્રાફ્ટ એન્જિન અને સ્પેર પાર્ટ્સ ખરીદવા માટે કરવામાં આવશે. કંપનીનું માનવું છે કે આવનારા સમયમાં પોતાની એરક્રાફ્ટ માલિકી વધવાથી ઓપરેશનલ ખર્ચ ઘટાડવામાં મદદ મળશે.
“FY26 સમગ્ર એવિએશન સેક્ટર માટે પડકારજનક રહ્યું”
ઇન્ડિગોના મેનેજિંગ ડિરેક્ટર રાહુલ ભાટિયાએ જણાવ્યું હતું કે નાણાકીય વર્ષ 2026 સમગ્ર એવિએશન ઉદ્યોગ માટે ખૂબ જ પડકારજનક રહ્યું છે. તેમ છતાં કંપનીનો કોર બિઝનેસ મજબૂત રહ્યો છે. તેમણે ઉમેર્યું હતું કે સમગ્ર વર્ષ દરમિયાન કંપનીની ક્ષમતામાં 9.5 ટકા અને કુલ આવકમાં 6 ટકાથી વધુનો વધારો નોંધાયો છે. ઉપરાંત, વિદેશી હૂંડિયામણના ઉતાર-ચઢાવ અને અન્ય વિશેષ ખર્ચને બાદ કરીએ તો કંપનીએ લગભગ ₹7,500 કરોડનો નફો નોંધાવ્યો છે.
