80 કરોડ લોકોને મળશે મોટો ફાયદો, રાશન યોજનામાં સરકારે કર્યા 3 મોટા ફેરફાર

પ્રધાનમંત્રી નરેન્દ્ર મોદીની અધ્યક્ષતામાં મળેલી કેન્દ્રીય મંત્રીમંડળની બેઠકમાં દેશના કરોડો રાશનકાર્ડ ધારકો માટે મહત્વપૂર્ણ નિર્ણય લેવામાં આવ્યો છે. સરકારે પબ્લિક ડિસ્ટ્રીબ્યૂશન સિસ્ટમ (PDS)ને વધુ મજબૂત અને આધુનિક બનાવવા માટે ‘સાર્થક-PDS’ યોજના શરૂ કરવાની જાહેરાત કરી છે. આ યોજના હેઠળ આશરે ₹25,530 કરોડનો ખર્ચ કરવામાં આવશે, જેના કારણે દેશના લગભગ 80 કરોડ લાભાર્થીઓને સીધો ફાયદો મળશે.

PDS સિસ્ટમમાં થયા 3 મોટા ફેરફાર
કેન્દ્રીય મંત્રી અશ્વિની વૈષ્ણવે કેબિનેટ બેઠક બાદ યોજનાની વિગતો આપતા જણાવ્યું કે સરકાર દ્વારા રાશન વ્યવસ્થામાં ત્રણ મોટા સુધારા કરવામાં આવ્યા છે.

1. રાજ્ય સરકારોને મળશે નાણાકીય સહાય
સરકારે રાજ્ય સરકારોને અનાજ વિતરણ માટે નાણાકીય મદદ આપવાનો નિર્ણય લીધો છે. અત્યાર સુધી ફૂડ કોર્પોરેશન ઓફ ઇન્ડિયા (FCI)ના મોટા ગોડાઉનમાંથી જિલ્લાઓ, બ્લોક અને અંતે રાશનની દુકાનો સુધી અનાજ પહોંચાડવામાં રાજ્યોને ભારે ખર્ચનો સામનો કરવો પડતો હતો. હવે કેન્દ્ર સરકાર આ ખર્ચમાં સહાય કરશે, જેથી રાશન વિતરણ વ્યવસ્થા વધુ સરળ અને અસરકારક બની શકે.

2. રાશન ડીલરોનું કમિશન વધારાશે
સરકારે રાશન ડીલરો માટે પણ મહત્વપૂર્ણ નિર્ણય લીધો છે. લાંબા સમયથી ડીલરો કમિશન વધારવાની માંગ કરી રહ્યા હતા, જેને હવે સ્વીકારી લેવામાં આવી છે. કેન્દ્રીય મંત્રી અશ્વિની વૈષ્ણવે જણાવ્યું કે રાશન ડીલરોનું કમિશન વધારવાથી તેમની આવકમાં વધારો થશે અને રાશન વિતરણની પ્રક્રિયા વધુ સારી રીતે સંચાલિત થઈ શકશે.

3. PDS સિસ્ટમ બનશે ડિજિટલ અને સ્માર્ટ
સરકારે સમગ્ર રાશન સિસ્ટમને વધુ પારદર્શક અને આધુનિક બનાવવા માટે નવી ટેકનોલોજી તથા AIનો ઉપયોગ કરવાનો નિર્ણય લીધો છે. આ હેઠળ લાભાર્થીઓની નોંધણી, રાશન વિતરણ અને મોનીટરિંગ જેવી પ્રક્રિયાઓને ડિજિટલ બનાવવામાં આવશે. સરકારનું માનવું છે કે ટેકનોલોજીના ઉપયોગથી ગેરરીતિઓમાં ઘટાડો થશે અને સાચા લાભાર્થીઓ સુધી સહાય સરળતાથી પહોંચી શકશે.

‘સાર્થક-PDS’ યોજના શું બદલશે?
સરકારના જણાવ્યા મુજબ આ યોજના દ્વારા:
– રાશન વિતરણ વધુ પારદર્શક બનશે
– લાભાર્થીઓને સરળતાથી અનાજ મળશે
– રાજ્યો પરનો આર્થિક બોજ ઓછો થશે
– ડીલરોની આવકમાં વધારો થશે
– ટેકનોલોજીથી ગેરરીતિઓ રોકી શકાશે

કેન્દ્ર સરકારનો દાવો છે કે ‘સાર્થક-PDS’ યોજના દેશની જાહેર વિતરણ વ્યવસ્થાને વધુ મજબૂત બનાવશે અને કરોડો ગરીબ પરિવારોને વધુ સારી સુવિધા પૂરી પાડશે.