કેવી દેખાશે ભારતની પહેલી હાઈ સ્પીડ બુલેટ ટ્રેન? સામે આવી તસવીર, જાણો ખાસિયતો

ભારતીય રેલ્વેના ઇતિહાસમાં એક નવી ક્રાંતિ લાવવા જઈ રહેલી દેશની પ્રથમ હાઈ સ્પીડ બુલેટ ટ્રેનની તસવીર સામે આવી છે. રેલ્વે મંત્રાલયના ગેટ નંબર-4 પર બુલેટ ટ્રેનનું પોસ્ટર અને મોડેલ પ્રદર્શિત કરવામાં આવ્યું છે, જેને જોઈ લોકોમાં ભારે ઉત્સાહ જોવા મળી રહ્યો છે.

આ બુલેટ ટ્રેન મુંબઈ-અમદાવાદ હાઈ સ્પીડ રેલ કોરિડોર (MAHSR) પ્રોજેક્ટનો ભાગ છે. 508 કિલોમીટર લાંબા આ કોરિડોર પર ટ્રેન 320 કિમી પ્રતિ કલાકની ઝડપે દોડશે. જેના કારણે મુંબઈથી અમદાવાદ સુધીની મુસાફરી માત્ર બે કલાકમાં પૂર્ણ થઈ શકશે. હાલ આ અંતર કાપવામાં અંદાજે 6 થી 8 કલાકનો સમય લાગે છે.

જાપાનની ટેક્નોલોજીથી તૈયાર થશે પ્રોજેક્ટ
મુંબઈ-અમદાવાદ બુલેટ ટ્રેન પ્રોજેક્ટ જાપાનની ટેક્નિકલ અને નાણાકીય સહાયથી વિકસાવવામાં આવી રહ્યો છે. આ પ્રોજેક્ટમાં આધુનિક સુરક્ષા વ્યવસ્થા, હાઈ-ટેક સિગ્નલિંગ સિસ્ટમ અને ભૂકંપ પ્રતિરોધક ડિઝાઇનનો સમાવેશ કરવામાં આવ્યો છે.

બુલેટ ટ્રેનના 12 સ્ટેશન
આ હાઈ સ્પીડ કોરિડોરમાં કુલ 12 સ્ટેશન હશે:
– મુંબઈ
– થાણે
– વિરાર
– બોઇસર
– વાપી
– બિલીમોરા
– સુરત
– ભરૂચ
– વડોદરા
– આણંદ
– અમદાવાદ
– સાબરમતી

ઝડપથી આગળ વધી રહ્યું છે કામ
રેલ્વે મંત્રી અશ્વિની વૈષ્ણવએ તાજેતરમાં પ્રોજેક્ટની સમીક્ષા દરમિયાન જણાવ્યું હતું કે બુલેટ ટ્રેન ભારતને વિકસિત રાષ્ટ્ર બનાવવાની દિશામાં મહત્વપૂર્ણ પગલું છે. સુરત, વડોદરા અને અમદાવાદ સહિતના વિસ્તારોમાં વાયડક્ટ, બ્રિજ અને સ્ટેશનનું બાંધકામ ઝડપી ગતિએ ચાલી રહ્યું છે. મુંબઈમાં અંડરગ્રાઉન્ડ સ્ટેશન અને સમુદ્રની અંદર બનતી ટનલનું કામ પણ પ્રગતિમાં છે. નેશનલ હાઈ સ્પીડ રેલ કોર્પોરેશન લિમિટેડ (NHSRCL) દ્વારા આ સમગ્ર પ્રોજેક્ટ પર કામગીરી કરવામાં આવી રહી છે.

2017માં થયો હતો પ્રોજેક્ટનો શુભારંભ
બુલેટ ટ્રેન પ્રોજેક્ટનો ઔપચારિક શુભારંભ વર્ષ 2017માં વડાપ્રધાન નરેન્દ્ર મોદી અને જાપાનના તત્કાલીન વડાપ્રધાન શિન્ઝો આબે દ્વારા અમદાવાદમાં કરવામાં આવ્યો હતો. શરૂઆતમાં પ્રોજેક્ટ 2023 સુધી પૂર્ણ કરવાનો લક્ષ્ય હતો, પરંતુ કોરોના મહામારી અને અન્ય ટેક્નિકલ પડકારોને કારણે સમયરેખા લંબાઈ ગઈ હતી. હવે આ બુલેટ ટ્રેન 2027-28 સુધીમાં શરૂ થવાની સંભાવના વ્યક્ત કરવામાં આવી રહી છે.

“નવા ભારત”નું પ્રતીક બની બુલેટ ટ્રેન
સોશિયલ મીડિયા પર લોકો બુલેટ ટ્રેનને “નવા ભારત”નું પ્રતીક ગણાવી રહ્યા છે. રેલ્વે મંત્રાલય દ્વારા પ્રદર્શિત કરવામાં આવેલી તસવીર સામાન્ય લોકોમાં જાગૃતિ અને ઉત્સાહ વધારવાનું મહત્વપૂર્ણ માધ્યમ બની છે.