કચ્છના દરિયાકાંઠે ‘ઓપરેશન સિંદૂર’ દરમિયાન મોટી કાર્યવાહી, ડ્રોનના કાટમાળ અને બિનવારસી મિસાઈલ મળી

કચ્છના વ્યૂહાત્મક દરિયાકાંઠા વિસ્તારમાં સુરક્ષા એજન્સીઓ દ્વારા ચલાવવામાં આવેલા ‘ઓપરેશન સિંદૂર’ દરમિયાન મહત્વપૂર્ણ સફળતા મળી છે. સર્ચ ઓપરેશન દરમિયાન અલગ-અલગ ત્રણ સ્થળોએથી શંકાસ્પદ ડ્રોનના કાટમાળ (ડેબ્રિજ) મળી આવતા સુરક્ષા તંત્ર વધુ સતર્ક બન્યું છે.

દરિયાકાંઠે સઘન પેટ્રોલિંગ
ઘટનાને પગલે પશ્ચિમ કચ્છ પોલીસ અને અન્ય સુરક્ષા એજન્સીઓ દ્વારા સમગ્ર કોસ્ટલ બેલ્ટમાં સુરક્ષા વધારી દેવામાં આવી છે. દરિયાકાંઠાના વિસ્તારોમાં ફૂટ પેટ્રોલિંગ તેમજ બોટ પેટ્રોલિંગ વધુ તેજ કરવામાં આવ્યું છે. સુરક્ષા એજન્સીઓ દ્વારા શંકાસ્પદ હિલચાલ પર સતત નજર રાખવામાં આવી રહી છે.

છછીના દરિયાકાંઠેથી મિસાઈલ મળી
તપાસ દરમિયાન છછીના દરિયાકાંઠેથી એક બિનવારસી મિસાઈલ મળી આવતા સુરક્ષા તંત્રમાં ચકચાર મચી ગઈ છે. આ ઉપરાંત ખિદરત ટાપુ નજીકથી સોલાર આધારિત AIS (Automatic Identification System) પણ જપ્ત કરવામાં આવી છે. AIS સિસ્ટમનો ઉપયોગ સામાન્ય રીતે દરિયાઈ માર્ગે જહાજોની ઓળખ અને ટ્રેકિંગ માટે કરવામાં આવે છે. મળેલા ડ્રોનના અવશેષો અને મિસાઈલની એફએસએલ ટીમ દ્વારા ટેકનિકલ તપાસ શરૂ કરવામાં આવી છે.

1.55 કરોડનું ડ્રગ્સ પણ ઝડપાયું
સર્ચ ઓપરેશન દરમિયાન દરિયાકાંઠેથી મોટી માત્રામાં માદક પદાર્થો પણ જપ્ત કરવામાં આવ્યા છે. પોલીસને બિનવારસી હાલતમાં ચરસના આશરે 62 પેકેટ મળી આવ્યા છે. ચરસના આ જથ્થાની કિંમત અંદાજે રૂ.1.55 કરોડ હોવાનું પશ્ચિમ કચ્છ પોલીસે જણાવ્યું છે.

સુરક્ષા એજન્સીઓ હાઈ એલર્ટ પર
ડ્રોનના અવશેષો, મિસાઈલ અને ડ્રગ્સ મળ્યા બાદ સરહદી સુરક્ષા વધુ મજબૂત બનાવવામાં આવી છે. સુરક્ષા એજન્સીઓએ માછીમારો અને સ્થાનિક લોકોને કોઈપણ શંકાસ્પદ હિલચાલ અંગે તાત્કાલિક જાણ કરવા અપીલ કરી છે. કચ્છના દરિયાકાંઠા વિસ્તારમાં હાલ હાઈ એલર્ટ જાહેર કરીને સતત મોનિટરિંગ કરવામાં આવી રહ્યું છે.

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276