પશ્ચિમ બંગાળમાં ભાજપની ઐતિહાસિક જીત, સુવેન્દુ અધિકારી બનશે નવા મુખ્યમંત્રી

પશ્ચિમ બંગાળની રાજનીતિમાં મોટો પલટો આવ્યો છે. વિધાનસભા ચૂંટણીમાં ભારતીય જનતા પાર્ટીએ ભવ્ય જીત મેળવ્યા બાદ હવે નવી સરકારની રચનાને લઈને રાજકીય હલચલ તેજ બની છે. મળતી માહિતી મુજબ ભાજપના દિગ્ગજ નેતા સુવેન્દુ અધિકારીને રાજ્યના આગામી મુખ્યમંત્રી તરીકે પસંદ કરવામાં આવ્યા છે. સાંજે યોજાનારી વિધાનસભા પક્ષની બેઠક બાદ સત્તાવાર જાહેરાત થવાની શક્યતા વ્યક્ત કરવામાં આવી રહી છે.

સુવેન્દુ અધિકારીએ આ ચૂંટણીમાં મોટી રાજકીય સિદ્ધિ મેળવી છે. તેમણે ભવાનીપુર બેઠક પરથી મમતા બેનર્જીને હરાવીને રાજ્યની રાજનીતિમાં પોતાનું પ્રભુત્વ વધુ મજબૂત બનાવ્યું છે. સાથે સાથે નંદીગ્રામ બેઠક પરથી પણ તેમણે સતત બીજી વખત જીત મેળવી છે. 2021ની ચૂંટણીમાં પણ તેમણે મમતાને નંદીગ્રામમાં પરાજય આપ્યો હતો.

સૂત્રોના જણાવ્યા અનુસાર નવી સરકારમાં ગૃહ મંત્રાલય પણ સુવેન્દુ અધિકારી પાસે જ રહેશે. રાજ્યમાં બે નાયબ મુખ્યમંત્રી બનાવવાની ચર્ચા પણ જોરશોરથી ચાલી રહી છે.

જાણીતી અભિનેત્રી અને ભાજપ નેતા રૂપા ગાંગુલીને ડેપ્યુટી સીએમ તરીકે મહત્વપૂર્ણ જવાબદારી સોંપાઈ શકે છે. જ્યારે બીજા નાયબ મુખ્યમંત્રી તરીકે ઉત્તર બંગાળ અને ખાસ કરીને દાર્જિલિંગ વિસ્તારના એક નેતાને સ્થાન આપવામાં આવે તેવી શક્યતા વ્યક્ત કરવામાં આવી રહી છે.

294 બેઠકો ધરાવતી પશ્ચિમ બંગાળ વિધાનસભામાં ભાજપે 207 બેઠકો જીતીને સ્પષ્ટ બહુમતી મેળવી હોવાનું કહેવાઈ રહ્યું છે, જ્યારે તૃણમૂલ કોંગ્રેસ 80 બેઠકો સુધી સીમિત રહી છે. પરિણામે રાજ્યમાં સત્તા પરિવર્તન લગભગ નિશ્ચિત માનવામાં આવી રહ્યું છે.