કેન્દ્ર સરકારનો ગુજરાત માટે મોટો નિર્ણય: બે સેમિકન્ડક્ટર પ્લાન્ટ અને શિપ રિપેર ફેસિલિટીને મંજૂરી

વડાપ્રધાન નરેન્દ્ર મોદીની અધ્યક્ષતામાં યોજાયેલી કેન્દ્રીય કેબિનેટ બેઠકમાં ગુજરાત માટે મહત્વપૂર્ણ નિર્ણયો લેવામાં આવ્યા છે. આ નિર્ણયો હેઠળ રાજ્યમાં ₹3,900 કરોડથી વધુના રોકાણ સાથે બે નવા સેમિકન્ડક્ટર મેન્યુફેક્ચરિંગ યુનિટ સ્થાપવાની મંજૂરી આપવામાં આવી છે. સાથે જ વાડીનાર ખાતે આધુનિક શિપ રિપેર ફેસિલિટી સ્થાપવા માટે પણ લીલીઝંડી અપાઈ છે.

2,230 લોકોને મળશે રોજગારી
આ નવા સેમિકન્ડક્ટર પ્રોજેક્ટ્સ દ્વારા ભારત કમ્પાઉન્ડ સેમિકન્ડક્ટર આધારિત મિની અને માઇક્રો LED ડિસ્પ્લે ઉત્પાદન ક્ષેત્રે મહત્વપૂર્ણ પગલું ભરી રહ્યું છે. આ પ્રોજેક્ટ્સથી અંદાજે 2,230 કુશળ પ્રોફેશનલ્સ માટે રોજગારીની નવી તકો ઉભી થશે.

‘ઈન્ડિયા સેમિકન્ડક્ટર મિશન’ને વેગ
આ પ્રોજેક્ટ્સ India Semiconductor Mission હેઠળ મંજૂર કરવામાં આવ્યા છે. અત્યાર સુધીમાં આ મિશન અંતર્ગત કુલ 12 પ્રોજેક્ટ્સને મંજૂરી મળી છે, જેમાં કુલ રોકાણ ₹1.64 લાખ કરોડ સુધી પહોંચી ગયું છે. આ નિર્ણય ગુજરાતને વૈશ્વિક સેમિકન્ડક્ટર હબ તરીકે વિકસાવવાની દિશામાં મહત્વપૂર્ણ માનવામાં આવે છે.

વાડીનારમાં આધુનિક શિપ રિપેર સુવિધા
આ ઉપરાંત ગુજરાતના વાડીનાર ખાતે અત્યાધુનિક શિપ રિપેર ફેસિલિટી સ્થાપવાની મંજૂરી આપવામાં આવી છે. આ પ્રોજેક્ટ Deendayal Port Authority (DPA) અને Cochin Shipyard Limited (CSL) દ્વારા સંયુક્ત રીતે અમલમાં મુકવામાં આવશે. આ પ્રોજેક્ટ માટે અંદાજે ₹1,570 કરોડનું રોકાણ કરવામાં આવશે. આ સુવિધા શરૂ થતા દેશમાં જ મોટા જહાજોના ઉચ્ચ સ્તરના સમારકામ શક્ય બનશે, જેના કારણે વિદેશી શિપયાર્ડ પરની નિર્ભરતા ઘટશે અને વિદેશી મુદ્રાની બચત થશે.