પાકિસ્તાનમાં આતંકી લશ્કર કમાન્ડર શેખ યુસુફ આફ્રિદીની સરેઆમ હત્યા, જાણો સમગ્ર મામલો

પાકિસ્તાનના ખૈબર પખ્તુનખ્વા પ્રાંતના લાન્ડી કોટલ વિસ્તારમાં લશ્કર-એ-તૈયબાના કમાન્ડર શેખ યુસુફ આફ્રિદીની અજાણ્યા હુમલાખોરોએ ગોળી મારીને હત્યા કરી છે. આ ઘટનાથી આતંકી નેટવર્કમાં ખળભળાટ મચી ગયો છે.

અહેવાલો મુજબ, આફ્રિદી લશ્કર-એ-તૈયબામાં મહત્વપૂર્ણ ભૂમિકા ભજવતો હતો અને સાથે સાથે ઇસ્લામિક સ્ટેટ ખોરાસન પ્રાંત (ISKP) માટે લડવૈયાઓની ભરતી કરવાનું કામ પણ સંભાળતો હતો. તેના મોતને આતંકી સંગઠનો માટે મોટો ઝટકો માનવામાં આવી રહ્યો છે.

આતંકી નેટવર્કનો મુખ્ય કડી હતો
શેખ યુસુફ આફ્રિદી માત્ર એક આદિવાસી નેતા જ નહોતો, પરંતુ તે અહલે હદીસ વિચારધારાનો પ્રભાવશાળી ચહેરો માનવામાં આવતો હતો. તે ઝખા ખેલ જનજાતિનો પ્રભાવશાળી સભ્ય હતો અને ધાર્મિક આવરણ હેઠળ ઉગ્રવાદનું જાળું ફેલાવતો હતો. તે પર આરોપ હતો કે તે યુવાનોને ગેરમાર્ગે દોરીને તેમની ભરતી કરતો અને તેમને અફઘાનિસ્તાન મોકલી આતંકી પ્રવૃત્તિઓમાં જોડતો હતો.

આંતરિક વિખવાદનો સંકેત?
આ હત્યાને આતંકી સંગઠનો વચ્ચેના એક મહત્વના ‘સેતુ’ના અંત તરીકે જોવામાં આવી રહી છે. જાણકારોના મતે, આ પાછળ આતંકી સંગઠનો વચ્ચેની આંતરિક દુશ્મનાવટ અથવા વર્ચસ્વની લડાઈ હોઈ શકે છે. હાલમાં અફઘાનિસ્તાન અને પાકિસ્તાનના સરહદી વિસ્તારોમાં ISIS અને તાલિબાન વચ્ચે ઘર્ષણ ચાલી રહ્યું છે, જેને કારણે આવી ઘટનાઓ વધવાની શક્યતા છે.

સુરક્ષા એજન્સીઓ સતર્ક
હુમલાખોરો ઘટના સ્થળેથી ફરાર થઈ ગયા છે અને હજુ સુધી કોઈ સંગઠને આ હત્યાની જવાબદારી સ્વીકારી નથી. પાકિસ્તાની સુરક્ષા એજન્સીઓ દ્વારા તપાસ શરૂ કરવામાં આવી છે. આ ઘટનાને પગલે આસપાસના વિસ્તારોમાં તણાવ વધી ગયો છે અને સંભવિત વળતા હુમલાની ભીતિને ધ્યાનમાં રાખીને સુરક્ષા દળોને હાઈ એલર્ટ પર રાખવામાં આવ્યા છે.

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276