Bindia
તમિલનાડુના વિરુધુનગર જિલ્લામાં આવેલી ફટાકડા બનાવતી ફેક્ટરીમાં થયેલા જોરદાર વિસ્ફોટે મોટી દુર્ઘટના સર્જી છે. પ્રાથમિક માહિતી મુજબ આ અકસ્માતમાં અત્યાર સુધીમાં 19 લોકોના મોત થયા છે, જ્યારે ઓછામાં ઓછા 6 લોકો ઈજાગ્રસ્ત થયા છે.
આ ઘટના કટ્ટનારપટ્ટી વિસ્તારમાં આવેલી એક ક્રેકર યુનિટમાં બની હતી, જ્યાં અચાનક થયેલા બ્લાસ્ટે આજુબાજુના ચાર યુનિટોને પણ ઝપેટમાં લઈ લીધા હતા. વિસ્ફોટ એટલો ભીષણ હતો કે આસપાસની ઇમારતોને પણ ભારે નુકસાન પહોંચ્યું છે.
દુર્ઘટના બાદ વિસ્તારમાં અફરાતફરી મચી ગઈ હતી. ઘટનાસ્થળે ફાયર બ્રિગેડ, પોલીસ અને રાહત ટીમો તાત્કાલિક પહોંચી ગઈ હતી અને કાટમાળ નીચે દટાયેલા લોકોને બહાર કાઢવા માટે સતત પ્રયાસ કરી રહી છે. પ્રશાસને સમગ્ર વિસ્તારને ઘેરી લીધો છે અને સુરક્ષા વ્યવસ્થા કડક બનાવી છે.
આ દુર્ઘટનાને લઈને તમિલનાડુના મુખ્યમંત્રીએમ. કે. સ્ટાલિનએ દુખ વ્યક્ત કર્યું છે. તેમણે મૃતકોના પરિવારજનો પ્રત્યે સંવેદના વ્યક્ત કરીને કહ્યું કે રાજ્ય સરકાર આ મુશ્કેલ સમયમાં તેમની સાથે છે અને રાહત-બચાવ કાર્ય ઝડપથી પૂર્ણ કરવા સૂચના આપવામાં આવી છે.
હાલ વિસ્ફોટના ચોક્કસ કારણો જાણી શકાયા નથી, પરંતુ પ્રાથમિક આશંકા છે કે ફટાકડાના ઉત્પાદન દરમિયાન સુરક્ષાના ધોરણોની અવગણના થઈ હોઈ શકે છે. અધિકારીઓએ સમગ્ર મામલે તપાસના આદેશ આપી દીધા છે.
સ્થાનિક વહીવટીતંત્રના જણાવ્યા મુજબ રાહત અને બચાવ કામગીરી ઝડપી ગતિએ ચાલી રહી છે અને પરિસ્થિતિ પર સતત નજર રાખવામાં આવી રહી છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
