દેશમાં પેટ્રોલ-ડીઝલનો પૂરતો જથ્થો, અફવાઓથી દૂર રહેવા કેન્દ્રની અપીલ

પશ્ચિમ એશિયામાં ઉભી થયેલી અસ્થિર પરિસ્થિતિને ધ્યાનમાં રાખીને કેન્દ્ર સરકારે દેશના ઈંધણ પુરવઠા અંગે મહત્વપૂર્ણ સ્પષ્ટતા કરી છે. પેટ્રોલિયમ અને કુદરતી ગેસ મંત્રાલયે જણાવ્યું છે કે દેશભરના તમામ પેટ્રોલ પંપ પર પેટ્રોલ અને ડીઝલનો પૂરતો જથ્થો ઉપલબ્ધ છે અને કોઈપણ પ્રકારની અછતની સ્થિતિ નથી.

મંત્રાલયે નાગરિકોને અપીલ કરી છે કે તેઓ સોશિયલ મીડિયા અથવા અન્ય માધ્યમો પર ફેલાતી અફવાઓ પર વિશ્વાસ ન કરે અને અનાવશ્યક ગભરાટ ન ફેલાવે. સરકાર પરિસ્થિતિ પર સતત નજર રાખી રહી છે અને ઈંધણ પુરવઠો સુનિશ્ચિત રાખવા માટે તમામ જરૂરી પગલાં લેવામાં આવી રહ્યા છે.

LPG પુરવઠો પણ સ્થિર
મંત્રાલયના જણાવ્યા અનુસાર, આશરે 94,000 મેટ્રિક ટન LPG લઈને આવતા બે જહાજો સુરક્ષિત રીતે ભારત તરફ આગળ વધી રહ્યા છે. માર્ચ મહિનામાં જ ઘરેલુ, કોમર્શિયલ અને હોસ્ટેલ સહિતના ક્ષેત્રોમાં 2.9 લાખથી વધુ નવા ગેસ કનેક્શન આપવામાં આવ્યા છે, જે દેશના ગેસ વિતરણ તંત્રની મજબૂતી દર્શાવે છે.

ઉદ્યોગોને ગેસ પુરવઠો યથાવત
યુરિયા પ્લાન્ટ્સ માટે ગેસનો પુરવઠો સ્થિર રાખવામાં આવ્યો છે. છેલ્લા છ મહિનાની સરેરાશ મુજબ 70-75 ટકા પુરવઠો જાળવવામાં આવ્યો છે અને વધારાના LNG ની વ્યવસ્થા પણ કરવામાં આવી રહી છે જેથી ઉદ્યોગો પર કોઈ અસર ન પડે.

બંદરો પર કામગીરી સામાન્ય
દેશના તમામ બંદરો પર કામગીરી સામાન્ય રીતે ચાલુ છે. માલસામાનના પરિવહનમાં કોઈપણ પ્રકારની અવરોધ કે ભીડ જોવા મળી નથી, જે પુરવઠા સાંકળને મજબૂત બનાવે છે.

વિદેશમાં રહેલા ભારતીયોની સુરક્ષા પ્રાથમિકતા
સરકારે વધુમાં જણાવ્યું છે કે ગલ્ફ અને પશ્ચિમ એશિયામાં રહેલા ભારતીયોની સુરક્ષા તેની સર્વોચ્ચ પ્રાથમિકતા છે. ખાસ કરીને દરિયાઈ જહાજોમાં કાર્યરત ખલાસીઓ અને વિદ્યાર્થીઓ માટે ભારતીય મિશનો દ્વારા વિઝા, કોન્સ્યુલર અને લોજિસ્ટિક્સ સંબંધિત તમામ જરૂરી મદદ પૂરી પાડવામાં આવી રહી છે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in