રાષ્ટ્રપતિ દ્રૌપદી મુર્મુ બે દિવસ પોર્ટુગલની મુલાકાતે, સિટી કી ઓફ ઓનર’થી કરવામાં આવ્યા સન્માનિત

રાષ્ટ્રપતિ દ્રૌપદી મુર્મુ પોર્ટુગલની બે દિવસીય રાજકીય મુલાકાતે પહોંચ્યા છે. તેમણે રાજધાની લિસ્બનમાં ‘સિટી કી ઓફ ઓનર’થી સન્માનિત કરવામાં આવ્યા હતા. લિસ્બનના મેયર કાર્લોસ મોએડાસે એક ખાસ સમારોહમાં તેમને આ સન્માન અર્પણ કર્યું. રાષ્ટ્રપતિ મુર્મુની મુલાકાત દરમિયાન, તેમને કામારા મ્યુનિસિપલ ડી લિસ્બોઆ ખાતે ગાર્ડ ઓફ ઓનર આપવામાં આવ્યું હતું, જ્યાં ભારતીય સમુદાયના લોકોથી ખીચોખીચ ભરેલા હોલની સામે તેમને સન્માન આપવામાં આવ્યું હતું.

મેયર મોએડાસે સમારોહમાં જણાવ્યું હતું કે રાષ્ટ્રપતિ મુર્મુને ‘સિટી કી ઓફ ઓનર’ના રૂપમાં આ સન્માન આપવામાં આવ્યું હતું, જેનાથી તેઓ લિસ્બનના માનદ નાગરિક બન્યા. આ પ્રસંગે, રાષ્ટ્રપતિએ પરંપરાગત પોર્ટુગીઝ અભિવાદન ‘બોમ ડિયા’ થી પોતાના અભિવાદનની શરૂઆત કરી અને ભારત-પોર્ટુગલ સંબંધો પર પ્રકાશ પાડ્યો. તેમણે કહ્યું, “ભારત અને પોર્ટુગલ વચ્ચેના સાંસ્કૃતિક સંબંધો સદીઓથી મજબૂત રહ્યા છે, અને આપણા રોજિંદા જીવન પર તેનો ઊંડો પ્રભાવ રહ્યો છે.”

ભારત અને પોર્ટુગલ વચ્ચેના સંબંધોને મજબૂત બનાવવા પર ભાર
રાષ્ટ્રપતિ મુર્મુએ ભારત અને પોર્ટુગલ વચ્ચે સામૂહિક જવાબદારીની ભાવનાનો ઉલ્લેખ કર્યો અને કહ્યું કે આ ભાગીદારી બંને દેશોને પ્રાદેશિક અને બહુપક્ષીય મંચો પર કુદરતી ભાગીદાર બનાવે છે. તેમણે એમ પણ કહ્યું કે પોર્ટુગલ યુરોપિયન યુનિયન તેમજ લુસોફોન દેશો સાથે ભારતનો એક મહત્વપૂર્ણ ભાગીદાર છે. રાષ્ટ્રપતિએ એમ પણ કહ્યું કે પોર્ટુગલમાં ભારતીય સંસ્કૃતિ, કલા, યોગ, આયુર્વેદ અને ખોરાકની વધતી જતી લોકપ્રિયતા આ મજબૂત સાંસ્કૃતિક આકર્ષણનું સ્પષ્ટ ઉદાહરણ છે.

રાષ્ટ્રપતિએ ભારતીય સ્થળાંતર કરનારાઓને “આપણા સંબંધોનો પાયો” ગણાવ્યો અને કહ્યું કે તેઓ પોર્ટુગલના સમાજ અને અર્થતંત્રમાં મહત્વપૂર્ણ યોગદાન આપી રહ્યા છે. પોર્ટુગલમાં ભારતીય સમુદાયની સંખ્યા લગભગ 1,25,000 છે, જેમાં35,000 થી વધુ ભારતીય નાગરિકો અને 90,000 ભારતીય મૂળના લોકોનો સમાવેશ થાય છે. આમાંના મોટાભાગના સ્થળાંતર કરનારાઓના મૂળ ગુજરાત અને ગોવામાં છે.

ભારત-EU સંબંધોમાં વૃદ્ધિ
રાષ્ટ્રપતિ મુર્મુની આ મુલાકાત એવા સમયે થઈ રહી છે જ્યારે વૈશ્વિક સ્તરે આર્થિક પરિવર્તન આવી રહ્યા છે. ભારતની EU સાથે ભાગીદારી વધુ મજબૂત થઈ રહી છે, અને ભારત અને EU વચ્ચે આ વર્ષે મુક્ત વેપાર કરાર પર હસ્તાક્ષર થવાની સંભાવના છે. અગાઉ, ફેબ્રુઆરીમાં, યુરોપિયન કમિશનના પ્રમુખ ઉર્સુલા વોન ડેર લેયેન અને અન્ય યુરોપિયન પ્રતિનિધિઓએ ભારતની મુલાકાત લીધી હતી.

27 વર્ષ પછી ભારતીય રાષ્ટ્રપતિની પોર્ટુગલ મુલાકાત
આ મુલાકાત ભારતીય રાષ્ટ્રપતિ માટે ઐતિહાસિક છે, કારણ કે 27 વર્ષ પછી કોઈ ભારતીય રાષ્ટ્રપતિની પોર્ટુગલની આ પહેલી મુલાકાત છે. ઉપરાંત, આ મુલાકાત એવા સમયે થઈ રહી છે જ્યારે EU-ભારત સંબંધો એક નવી આર્થિક અને રાજકીય દિશા તરફ આગળ વધી રહ્યા છે. ભારત આ વર્ષના અંત સુધીમાં યુરોપિયન યુનિયન સાથે મુક્ત વેપાર કરાર પર હસ્તાક્ષર કરવાનું લક્ષ્ય રાખે છે, જે બંને દેશો વચ્ચેના વેપાર સંબંધોને વધુ મજબૂત બનાવશે.