Bindia
B INDIA : ગુજરાતના હવામાન અંગે નિષ્ણાત અંબાલાલ પટેલે રાજ્યના અનેક વિસ્તારોમાં કમોસમી વરસાદ અને કરા સાથેની આગાહી કરવામાં આવી છે શિયાળુ પાક તૈયાર થઈ જવાની સ્થિતિમાં છે તેવા સંજોગોમાં વાતાવરણમાં પલટો અને માવઠાની આગાહીએ ખેડૂતોની ચિંતા વધારી છે. તો બીજી બાજુ ફેબ્રુઆરીના પહેલા અઠવાડિયામાં અનેક લગ્નના મુહૂર્ત પણ છે જેના કારણે લગ્નવાળાના ઘરોમાં પણ ચિંતા છવાઇ છે.
વેસ્ટર્ન ડિસ્ટર્બન્સ, બંગાળના ઉપસાગર અને અરબ સાગરના ભેજના કારણે બેથી પાંચ ફેબ્રુઆરી ગુજરાતના વાતવાતમાં પલટો આવશે. કેટલાક ભાગોમાં ગાજવીજ ભારે પવન સાથે વરસાદની શકયતા રહેશે. માવઠા અને કરા માટેની આગાહી કરતા અંબાલાલ પટેલે જણાવ્યુ છે કે, ફેબ્રુઆરી મહિનાની શરૂઆતમાં ગુજરાતના ભાગોમાં ભારે પવન સાથે કમોસમી વરસાદ અને કરા પડવાની શક્યતા રહેશે. બેથી ત્રણ ફેબ્રુઆરીમાં દક્ષિણ ગુજરાતના વલસાડ અને સુરતના ઘણા ભાગોમાં કમોસમી વરસાદ થવાની સંભાવના છે.
અંબાલાલ પટેલે વધુમાં જણાવ્યુ છે કે, સૌરાષ્ટ્રમાં જૂનાગઢ, ભાવનગર, જામનગરના કેટલાક ભાગોમાં તેમજ સૌરાષ્ટ્રના ઘણા ભાગોમાં કમોસમી વરસાદ થવાની શકયતા રહેશે. આ સાથે મધ્ય ગુજરાતમાં વડોદરા, આણંદ, નડિયાદ, કપડવંજ, પંચમહાલ કેટલાક ભાગોમાં ગાજવીજ સાથે વરસાદ થવાની શકયતા રહેશે. ઉતર ગુજરાતના સાબરકાંઠામાં કમોસમી વરસાદ થવાની શકયતા રહેશે. કેટલાક ભાગોમાં 10થી 20 મિલિમિટર વરસાદ થવાની શકયતા રહેશે.
મજબૂત વેસ્ટન ડિસ્ટર્બન્સના કારણે ઉત્તરીય પર્વતીય વિસ્તારમાં ભારે હિમવર્ષા, કરા સાથે કમોસમી વરસાદ થશે. જેની અસર ગુજરાત સુધી થશે અને ગુજરાતના ભાગોમાં પણ ગાજવીજ ભારે પવન સાથે કમોસમી વરસાદ થવાનું હવામાન નિષ્ણાત અંબાલાલ પટેલનું અનુમાન છે.
