Bindia
પૂરઝડપે દોડતી કાર પર લટકીને PIએ લૂંટારુઓને દબોચ્યા: નડિયાદ રેલવે સ્ટેશન પર કરોડોની સોનાની લૂંટ, વિરમગામ નજીક પોલીસનું દિલધડક ઓપરેશન
PI ગુજરાતમાં સોનાની મોટી લૂંટના ચકચારી કેસનો ગણતરીના કલાકોમાં પર્દાફાશ કરવામાં અમદાવાદ ગ્રામ્ય પોલીસ અને પશ્ચિમ રેલવે GRPને મોટી સફળતા મળી છે. નડિયાદ રેલવે સ્ટેશન પર થયેલી સોનાની લૂંટ બાદ આરોપીઓ સોનું લઈને કારમાં ફરાર થઈ ગયા હતા. પોલીસને આરોપીઓ વિરમગામ તરફ જતા હોવાની કડી મળતાં ટીમોએ તાત્કાલિક નાકાબંધી ગોઠવી હતી.
આ દરમિયાન વિરમગામ નજીક આરોપીઓએ પોલીસથી બચવા માટે કાર પૂરઝડપે દોડાવી હતી. પોલીસની ગાડીને ટક્કર મારીને ભાગવાનો પ્રયાસ પણ કર્યો હતો. જોકે PI એસ.એ. ગઢવીએ અસાધારણ હિંમત બતાવી ચાલુ કારનો દરવાજો પકડી લીધો હતો. આરોપીઓએ પોલીસ અધિકારીને આશરે 500 મીટર સુધી ઢસડ્યા હોવા છતાં PIએ સ્ટિયરિંગ પર કાબૂ મેળવી કાર રોકી હતી. ત્યારબાદ પોલીસે તમામ આરોપીઓને ઝડપી પાડ્યા હતા. સમગ્ર ઓપરેશનમાં લૂંટાયેલું આશરે 2.90 કિલો સોનું અને બે વાહનો સહિત અંદાજે ₹4 કરોડનો મુદ્દામાલ રિકવર કરવામાં આવ્યો હોવાનું અહેવાલ છે.
-> નડિયાદ રેલવે સ્ટેશન પર બની લૂંટની ઘટના : મળતી માહિતી મુજબ નડિયાદ રેલવે સ્ટેશન પર સાંજે આશરે 5 વાગ્યાની આસપાસ સોનાની લૂંટની ઘટના બની હતી. ઘટનાની જાણ થતાં જ રેલવે પોલીસ હરકતમાં આવી હતી. લૂંટ બાદ આરોપીઓ ઝડપથી વાહનમાં બેસીને ફરાર થયા હતા.લૂંટનો ભોગ બનેલી વ્યક્તિએ પણ હિંમત દાખવી આરોપીઓનો પીછો કર્યો હતો અને તેમના વાહનનો ફોટો લઈ લીધો હતો. આ ફોટો અને વાહન અંગેની વિગતો પોલીસ માટે તપાસમાં મહત્વની કડી બની હતી. GRP દ્વારા તાત્કાલિક CCTV ફૂટેજની તપાસ કરવામાં આવી હતી અને શંકાસ્પદ વાહન અંગે સ્ટેટ કંટ્રોલ રૂમને એલર્ટ કરવામાં આવ્યો હતો.
ઘટનાની માહિતી સાંજે આશરે 7:30 વાગ્યે અમદાવાદ ગ્રામ્ય પોલીસ સુધી પહોંચી હતી. ત્યારબાદ પોલીસ દ્વારા આરોપીઓના સંભવિત રૂટનું રૂટ મેપિંગ કરવામાં આવ્યું હતું.પોલીસે વાહનના રજીસ્ટ્રેશન નંબર ઉપરાંત મોબાઇલ નંબરના SDR એટલે કે Subscriber Detail Recordના આધારે પણ તપાસ આગળ ધપાવી હતી. તપાસમાં બનાસકાંઠા કનેક્શન સહિતની મહત્વની વિગતો સામે આવી હતી.આ દરમિયાન LCBના હેડ કોન્સ્ટેબલ નરેન્દ્રસિંહે પોતાના બાતમીદાર નેટવર્કની મદદથી આરોપીઓની કારનું લોકેશન મેળવ્યું હતું. પોલીસને એવી પણ માહિતી મળી હતી કે લૂંટમાં વપરાયેલી ટાટા ટિયાગો કારની પાછળ નંબર પ્લેટ વગરની મારુતિ બલેનો કાર પણ આગળ વધી રહી હતી.
-> વિરમગામ તરફ જતાં પોલીસની નાકાબંધી : આરોપીઓ સાચાણા અને વિરમગામ તરફ આગળ વધી રહ્યા હોવાની માહિતી મળતાં અમદાવાદ ગ્રામ્ય LCB અને વિરમગામ ટાઉન પોલીસની ટીમોએ સંભવિત રૂટ પર નાકાબંધી ગોઠવી હતી.વિરમગામ ટાઉનમાં બલેનો કાર પ્રવેશે તે પહેલાં જ LCB જવાન હિમાંશુ અને વિરમગામ ટાઉન પોલીસના જવાન સિદ્ધરાજે સમયસૂચકતા બતાવી ટ્રક અને અન્ય વાહનો રસ્તા પર આડા મૂકીને રસ્તો બ્લોક કર્યો હતો.પોલીસે બલેનો કારમાંથી એક આરોપીને ઝડપી લીધો હતો. ત્યારબાદ તેની પૂછપરછ દરમિયાન પોલીસને જાણવા મળ્યું કે લૂંટાયેલું સોનું લઈને અન્ય ત્રણ આરોપીઓ ટિયાગો કારમાં આગળ નીકળી ગયા છે.
પોલીસે ઝડપાયેલા આરોપી મારફતે અન્ય આરોપીઓ સુધી પહોંચવાની રણનીતિ બનાવી હતી. પૂછપરછ દરમિયાન મળેલી માહિતીના આધારે પોલીસ ટીમે ટિયાગો કારમાં સવાર આરોપીઓનું લોકેશન મેળવ્યું.માહિતી મળતાં જ PI એસ.એ. ગઢવી, PI પરેશ જાની, વિરમગામ ટાઉન પોલીસ અને LCBની ટીમોએ સ્થળ પર પહોંચીને ટિયાગો કારને કોર્ડન કરી હતી.પરંતુ પોલીસની હાજરી જોઈને આરોપીઓએ શરણાગતિ સ્વીકારવાને બદલે ભાગવાનો પ્રયાસ કર્યો હતો. આ દરમિયાન જ સમગ્ર ઓપરેશને ફિલ્મી વળાંક લીધો હતો.
-> કારથી પોલીસની ગાડીને ટક્કર મારી, પછી પૂરઝડપે ભાગ્યા : પોલીસના કોર્ડનમાંથી બહાર નીકળવા માટે આરોપીઓએ ટિયાગો કારને PI એસ.એ. ગઢવીની ગાડી સાથે અથડાવી હતી. ત્યારબાદ આરોપીઓએ કાર રિવર્સમાં લઈ ઝડપથી ભાગવાનો પ્રયાસ કર્યો હતો.આ સમયે PI એસ.એ. ગઢવીએ અસાધારણ હિંમત બતાવી. તેમણે દોડીને ચાલુ કારનો દરવાજો પકડી લીધો હતો. આરોપીઓ કાર પૂરઝડપે હંકારતા રહ્યા અને PI ગઢવીને આશરે 500 મીટર સુધી ઢસડ્યા હતા.પરિસ્થિતિ અત્યંત જોખમી હોવા છતાં PI ગઢવીએ હિંમત ન હારી. તેમણે ચાલુ કારનો દરવાજો ખોલીને સ્ટિયરિંગ પર કાબૂ મેળવ્યો અને ઈમરજન્સી હેન્ડબ્રેકનો ઉપયોગ કરીને કારને અટકાવી દીધી હતી.
કાર અટક્યા બાદ પોલીસના અન્ય જવાનો તાત્કાલિક ત્યાં પહોંચી ગયા હતા અને કારમાં સવાર આરોપીઓને દબોચી લીધા હતા. આ દરમિયાન એક આરોપી ખેતર તરફ ભાગી છૂટવાનો પ્રયાસ કર્યો હતો. જોકે પોલીસે સમગ્ર વિસ્તારને કોર્ડન કરીને તેને પણ ઝડપી પાડ્યો હતો.આ રીતે લૂંટના આરોપીઓને વિરમગામ નજીકથી ઝડપી લેવામાં આવ્યા હતા. પોલીસની ઝડપી કાર્યવાહી અને ટીમના સંકલનને કારણે આરોપીઓ લૂંટેલું સોનું લઈને વધુ દૂર ભાગી શક્યા નહોતા.
-> 2.90 કિલો સોનું અને બે કાર જપ્ત : પોલીસ તપાસ દરમિયાન બલેનો કારની સીટના કવર હેઠળ છુપાવેલું લૂંટાયેલું આશરે 2.90 કિલોગ્રામ સોનું મળી આવ્યું હતું. આ સોનાની કિંમત આશરે ₹4 કરોડ હોવાનું પોલીસ અહેવાલોમાં જણાવાયું છે.આ ઉપરાંત ગુનામાં વપરાયેલી ટાટા ટિયાગો અને મારુતિ બલેનો એમ બે કાર પણ પોલીસે કબજે કરી છે. એટલે પોલીસે આ કેસમાં લૂંટાયેલા મુદ્દામાલનો સંપૂર્ણ જથ્થો રિકવર કર્યો હોવાનો દાવો કરવામાં આવ્યો છે.
ચાર આરોપીઓ ઝડપાયા બાદ હવે પોલીસનું ધ્યાન લૂંટ પાછળના સમગ્ર કાવતરાને સમજવા પર છે. આરોપીઓએ નડિયાદ રેલવે સ્ટેશન પર લૂંટનું આયોજન કેવી રીતે કર્યું હતું, તેમને સોનાની હેરફેર અંગે માહિતી ક્યાંથી મળી અને આ કેસમાં અન્ય કોઈ વ્યક્તિ સંડોવાયેલી છે કે નહીં તે સહિતના મુદ્દે તપાસ હાથ ધરવામાં આવી રહી છે.પોલીસ આરોપીઓની પૂછપરછ કરીને લૂંટની સમગ્ર કડી જોડવાનો પ્રયાસ કરી રહી છે. લૂંટની ઘટનાથી લઈને વિરમગામ નજીકની ધરપકડ સુધીના CCTV ફૂટેજ અને અન્ય પુરાવાઓ પણ તપાસમાં મહત્વપૂર્ણ બની શકે છે.
-> પોલીસ ટીમની બહાદુરીની ચર્ચા : આ ઓપરેશનમાં PI એસ.એ. ગઢવી અને સમગ્ર પોલીસ ટીમની સતર્કતા તથા હિંમતની ખાસ ચર્ચા થઈ રહી છે. ખાસ કરીને ચાલુ કારનો દરવાજો પકડીને તેને રોકવાની કાર્યવાહી અત્યંત જોખમી હતી. તેમ છતાં પોલીસ ટીમે આરોપીઓને ભાગી જવા દીધા નહોતા.નાયબ મુખ્યમંત્રી હર્ષ સંઘવીએ પણ સમગ્ર પોલીસ ટીમને સફળ ઓપરેશન બદલ અભિનંદન પાઠવ્યા હોવાનું અહેવાલમાં જણાવાયું છે.આ સમગ્ર કેસમાં પોલીસની ઝડપી તપાસ, ટેક્નિકલ ઇનપુટ, બાતમીદાર નેટવર્ક અને મેદાન પરની તાત્કાલિક કાર્યવાહીનું સંયોજન જોવા મળ્યું છે. નડિયાદ રેલવે સ્ટેશનની સોનાની લૂંટ બાદ ગણતરીના કલાકોમાં આરોપીઓ સુધી પહોંચીને કરોડોનું સોનું રિકવર કરવું પોલીસ માટે મહત્વની સફળતા માનવામાં આવી રહી છે.
- on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https://www.instagram.com/bindiaa.in
- FACEBOOK : hus ttps://www.facebook.com/buletinindialive
- X : https://x.com/bindia276
