હોર્મુઝ હુમલા બાદ નાવિકો પહોંચ્યા કોર્ટ: 'હવે સામાન્ય અવાજથી પણ ડર લાગે છે', કંપની પાસે માગ્યું મોટું વળતર

સ્ટ્રેટ ઓફ હોર્મુઝમાં થયેલા હુમલામાંથી બચેલા થાઈ માલવાહક જહાજના ત્રણ ભૂતપૂર્વ નાવિકોએ પોતાની જ કંપની સામે કોર્ટનો દરવાજો ખખડાવ્યો છે. નાવિકોનો આરોપ છે કે ગંભીર સુરક્ષા જોખમ હોવા છતાં કંપનીએ જહાજને હોર્મુઝ સ્ટ્રેટના જોખમી માર્ગ પરથી પસાર થવા મોકલ્યું, જેના કારણે ક્રૂના જીવ પર જોખમ ઊભું થયું. હુમલા બાદ માનસિક આઘાતનો સામનો કરી રહેલા ત્રણેય નાવિકોએ કંપની પાસેથી વળતરની માગ કરી છે.

દરેક નાવિકે 10 લાખ થાઈ બાટનું વળતર માગ્યું
અહેવાલો અનુસાર, ત્રણેય નાવિકોએ બેંગકોકની સેન્ટ્રલ લેબર કોર્ટમાં કેસ દાખલ કર્યો છે. તેમણે પ્રત્યેક વ્યક્તિ માટે 10 લાખ થાઈ બાટ (આશરે 30 હજાર અમેરિકી ડોલર)ના વળતરની માગ કરી છે. નાવિકોનું કહેવું છે કે હુમલા બાદ તેમની માનસિક સ્થિતિ એટલી ખરાબ થઈ ગઈ છે કે તેઓ ફરીથી જહાજ પર કામ કરવાની સ્થિતિમાં નથી.

‘માયુરી નારી’ જહાજ પર થયો હતો હુમલો
આ મામલો થાઈ માલવાહક જહાજ ‘માયુરી નારી’ સાથે જોડાયેલો છે. 11 માર્ચના રોજ ઓમાનની ઉત્તરમાં હોર્મુઝ નજીક આ જહાજ પર હુમલો થયો હતો. આ ઘટનામાં ત્રણ લોકોના ઘટનાસ્થળે જ મોત થયા હતા. ક્રૂના બાકીના 20 સભ્યોને સુરક્ષિત બચાવી લેવામાં આવ્યા હતા. હુમલામાંથી બચેલા પનિથી તુમકાએવ, નોપ્પાદોન વોંગસુવાન અને સુરદેસ માનપુએ મળીને કાનૂની કાર્યવાહી શરૂ કરી છે.

કંપની અને કેપ્ટન સામે ફરિયાદ
ત્રણેય નાવિકોએ જહાજ સંચાલન કરતી કંપની પ્રેશિયસ શિપિંગ કંપની, તેની સાથે જોડાયેલી અન્ય બે કંપનીઓ અને જહાજના કેપ્ટન વિરુદ્ધ કેસ દાખલ કર્યો છે. તેમના વકીલનો આરોપ છે કે કંપનીને વિસ્તારમાં રહેલા સુરક્ષા જોખમોની જાણ હોવા છતાં જહાજને ત્યાંથી પસાર થવા દેવામાં આવ્યું.

‘હવે મોટા અવાજથી પણ ગભરાઈ જાઉં છું’
હુમલામાંથી બચેલા પનિથી તુમકાએવનું કહેવું છે કે ઘટનાએ તેમના જીવન પર ઊંડી અસર કરી છે. તેમણે જણાવ્યું કે હવે સામાન્ય અથવા મોટા અવાજથી પણ તેઓ ડરી જાય છે. તેઓ હાલ દવાઓ લઈ રહ્યા છે અને કામ કરવાની સ્થિતિમાં નથી. નાવિકો હાલમાં ગંભીર માનસિક આઘાત (PTSD) જેવી સમસ્યાઓનો સામનો કરી રહ્યા હોવાનું તેમના વકીલે જણાવ્યું છે.

નોકરીમાંથી હટાવવાનો પણ આરોપ
નાવિકોનો આરોપ છે કે હુમલા બાદ જહાજ ફરી કાર્યરત સ્થિતિમાં ન રહ્યું અને 9 મહિનાનો કોન્ટ્રાક્ટ પૂરો થાય તે પહેલાં જ તેમને નોકરીમાંથી દૂર કરી દેવામાં આવ્યા. તેમના જણાવ્યા મુજબ કંપનીએ માત્ર બે મહિનાના પગાર જેટલું વળતર આપ્યું હતું. જોકે, કંપની સાથે સમાધાન કરવાનો પ્રયાસ નિષ્ફળ જતા તેમણે કોર્ટનો માર્ગ અપનાવ્યો છે.

હોર્મુઝ સ્ટ્રેટ કેમ છે મહત્વપૂર્ણ?
હોર્મુઝ સ્ટ્રેટ વિશ્વના સૌથી વ્યસ્ત અને મહત્વપૂર્ણ દરિયાઈ વેપાર માર્ગોમાંનું એક છે. વૈશ્વિક સ્તરે કાચા તેલ અને LNGના મોટા હિસ્સાનો વેપાર આ જ માર્ગ પરથી થાય છે. અમેરિકા અને ઈરાન વચ્ચે વધેલા તણાવને કારણે છેલ્લા કેટલાક સમયથી આ વિસ્તારમાં જહાજોની સુરક્ષા અંગે ચિંતા વધી છે. ભારત, થાઈલેન્ડ અને ફિલિપાઈન્સ સહિત અનેક દેશોના હજારો નાવિકો આ માર્ગ પર કામ કરે છે. આંતરરાષ્ટ્રીય મેરીટાઇમ ઓર્ગેનાઇઝેશન (IMO)એ પણ ચિંતા વ્યક્ત કરી છે કે આવા સંઘર્ષોની સૌથી મોટી અસર સામાન્ય નાવિકો અને તેમના પરિવારો પર પડે છે.