મિડલ ઈસ્ટમાં શાંતિની ચર્ચા વચ્ચે રશિયા-યુક્રેન યુદ્ધમાં ભડકો, વર્લ્ડ હેરિટેજ સાઈટ પર હુમલામાં 9ના મોત

મિડલ ઈસ્ટમાં તણાવ ઘટાડવાના પ્રયાસો વચ્ચે રશિયા-યુક્રેન યુદ્ધે ફરી એકવાર ગંભીર વળાંક લીધો છે. છેલ્લા ત્રણ વર્ષથી ચાલી રહેલા યુદ્ધ દરમિયાન સોમવારે રશિયાએ યુક્રેનની રાજધાની કિવ સહિત અનેક વિસ્તારોમાં મોટા પાયે હવાઈ હુમલાઓ કર્યા હોવાનું સામે આવ્યું છે. આ હુમલામાં પાંચ બચાવકર્મીઓ સહિત કુલ નવ લોકોના મોત થયા હોવાનું અધિકારીઓએ જણાવ્યું છે.

યુનેસ્કોની વર્લ્ડ હેરિટેજ સાઈટ બની નિશાન
રશિયાના હુમલામાં કિવ સ્થિત ઐતિહાસિક અને ધાર્મિક મહત્ત્વ ધરાવતી યુનેસ્કોની વર્લ્ડ હેરિટેજ સાઈટ ‘કિવ પેચેર્સ્ક લાવરા’ મઠને ભારે નુકસાન પહોંચ્યું છે. હુમલા બાદ મઠના કેટલાક ભાગોમાં આગ ફાટી નીકળી હતી, જેના કારણે સ્થળ પર અફરાતફરીનો માહોલ સર્જાયો હતો. કિવના લશ્કરી વહીવટના વડા તીમૂર તકાચેન્કોએ જણાવ્યું કે 1051માં સ્થાપિત આ ઐતિહાસિક મઠ પર સીધી અસર થઈ છે. આ સ્થળ યુક્રેનની સાંસ્કૃતિક અને ધાર્મિક ઓળખનું મહત્વપૂર્ણ પ્રતિક માનવામાં આવે છે.

યુક્રેનની કડક પ્રતિક્રિયા
હુમલા બાદ યુક્રેનના વડાપ્રધાન યુલિયા સ્વિરિદેન્કોએ સોશિયલ મીડિયા પ્લેટફોર્મ X પર પ્રતિક્રિયા આપતા કહ્યું કે, “આ માત્ર અમારા લોકો પર જ નહીં પરંતુ અમારી ઐતિહાસિક અને સાંસ્કૃતિક વારસા પર પણ ક્રૂર હુમલો છે.” યુક્રેન સરકારના જણાવ્યા અનુસાર હુમલામાં અનેક ઇમારતોને નુકસાન થયું છે અને બચાવ કામગીરી સતત ચાલુ છે.

સ્થાનિકોમાં ભયનો માહોલ
હુમલા દરમિયાન મઠ અને આસપાસના વિસ્તારોમાંથી ધુમાડા અને આગની મોટી જ્વાળાઓ ઉઠતી જોવા મળી હતી. પરિસ્થિતિ ગંભીર બનતા સ્થાનિક રહેવાસીઓએ સુરક્ષા માટે ભૂગર્ભ બંકરોમાં આશરો લીધો હતો. અધિકારીઓના જણાવ્યા અનુસાર જૂન મહિનાની શરૂઆત પછીનો આ સૌથી ઘાતક હવાઈ હુમલો માનવામાં આવી રહ્યો છે. અગાઉના ડ્રોન અને મિસાઈલ હુમલાઓમાં પણ 20થી વધુ લોકોના મોત અને 100થી વધુ લોકો ઘાયલ થયા હતા.

G7 બેઠક પહેલાં વધ્યો તણાવ
આ હુમલો એવા સમયે થયો છે જ્યારે યુક્રેનના રાષ્ટ્રપતિ વોલોદિમિર ઝેલેન્સકીએ તાજેતરમાં અમેરિકાના રાષ્ટ્રપતિ ડોનાલ્ડ ટ્રમ્પ સાથે ચર્ચા કરી હતી. ઝેલેન્સકીએ જણાવ્યું હતું કે બંને નેતાઓ વચ્ચે લાંબા સમયથી ચાલી રહેલા યુદ્ધનો અંત લાવવા માટેના પ્રયાસો અંગે ચર્ચા થઈ હતી. ફ્રાન્સમાં યોજાનારી G7 બેઠક પહેલાં થયેલા આ હુમલાએ આંતરરાષ્ટ્રીય સમુદાયની ચિંતા વધારી દીધી છે. હવે વૈશ્વિક નેતાઓની નજર યુદ્ધવિરામ અને શાંતિ સ્થાપનાના પ્રયાસો પર કેન્દ્રિત થઈ છે. રશિયા-યુક્રેન યુદ્ધમાં વધતા હુમલાઓ વચ્ચે યુરોપમાં ફરીથી સુરક્ષા અને સ્થિરતાને લઈને ગંભીર પ્રશ્નો ઊભા થયા છે.

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276