MPમાં ટ્રેનમાં આગની અફવાએ લીધો 4 લોકોનો જીવ, ગભરાઈને કૂદેલા મુસાફરોને બીજી ટ્રેને અડફેટે લીધા

મધ્યપ્રદેશના મુરૈના જિલ્લામાં રવિવારે એક હૃદયદ્રાવક રેલ દુર્ઘટના સર્જાઈ હતી. ટ્રેનમાં આગ લાગ્યાની અફવા ફેલાતા ગભરાયેલા મુસાફરો ચાલુ ટ્રેનમાંથી કૂદી પડ્યા હતા. જોકે, પાટા પર ઉતરેલા મુસાફરોને સામેથી આવી રહેલી બીજી ટ્રેનની અડફેટે આવતાં 4 લોકોના મોત થયા હોવાનું જાણવા મળ્યું છે.

આગની અફવાએ સર્જી અફરાતફરી
માહિતી મુજબ, ઉદયપુર ઇન્ટરસિટી એક્સપ્રેસ રવિવારે સાંજે મુરૈના જિલ્લાના હેતમપુર સ્ટેશન નજીકથી પસાર થઈ રહી હતી. તે દરમિયાન ટ્રેનના એક ડબ્બામાં આગ લાગી હોવાની અફવા ઝડપથી ફેલાઈ ગઈ. અચાનક ફેલાયેલી આ વાતથી મુસાફરોમાં ભારે ગભરાટ ફેલાયો હતો. પોતાનો જીવ બચાવવા માટે ઘણા મુસાફરો કોઈ તપાસ કર્યા વગર ટ્રેનમાંથી નીચે કૂદવા લાગ્યા હતા. થોડા જ ક્ષણોમાં ટ્રેનમાં અફરાતફરીનો માહોલ સર્જાઈ ગયો હતો.

પાટા પર જ મોત બનીને આવી બીજી ટ્રેન
ટ્રેનમાંથી કૂદેલા મુસાફરો રેલવે ટ્રેક પર ઉભા હતા ત્યારે બીજી બાજુથી પાતાળકોટ એક્સપ્રેસ પૂરપાટ ઝડપે આવી રહી હતી. ગભરાટના માહોલમાં મુસાફરોને બીજી ટ્રેન આવી રહી હોવાની જાણ થઈ નહોતી. જોકે, કંઈ સમજે તે પહેલાં જ પાતાળકોટ એક્સપ્રેસ કેટલાક મુસાફરોને અડફેટે લઈને પસાર થઈ ગઈ. અકસ્માત એટલો ગંભીર હતો કે ચાર લોકોના ઘટનાસ્થળે જ મોત થયા હતા.

રાહત અને બચાવ કામગીરી શરૂ
દુર્ઘટનાની જાણ થતાં જ રેલવે અધિકારીઓ, સ્થાનિક પ્રશાસન અને પોલીસની ટીમો તાત્કાલિક ઘટનાસ્થળે પહોંચી ગઈ હતી. ઘાયલોને સારવાર માટે નજીકની હોસ્પિટલમાં ખસેડવામાં આવ્યા હતા અને રાહત-બચાવ કામગીરી હાથ ધરવામાં આવી હતી.

અફવાઓથી સાવચેત રહેવાની જરૂર
આ ઘટના ફરી એકવાર દર્શાવે છે કે કોઈપણ અફવા કેટલી ઘાતક સાબિત થઈ શકે છે. પ્રાથમિક તપાસમાં ટ્રેનમાં આગ લાગ્યાના કોઈ પુરાવા મળ્યા નથી. રેલવે તંત્ર દ્વારા સમગ્ર ઘટનાની તપાસ શરૂ કરવામાં આવી છે.