Bindia
પશ્ચિમ બંગાળમાં ચૂંટણી બાદ રાજકીય તણાવ સતત વધી રહ્યો છે. ગુરુવારે હાવડા જિલ્લાના શિવપુર વિસ્તારમાં બોમ્બ વિસ્ફોટની ઘટના સામે આવતા વિસ્તારમાં ભારે ચકચાર મચી ગઈ હતી. આ ઘટનામાં ભાજપના બે કાર્યકરો ઈજાગ્રસ્ત થયા હોવાનું જાણવા મળ્યું છે.
માહિતી મુજબ, શિવપુર પોલીસ સ્ટેશન હેઠળ આવેલા ચૌરાબસ્તી વિસ્તારમાં બપોરે લગભગ 2:30 વાગ્યે અથડામણ સર્જાઈ હતી. ભાજપનો આરોપ છે કે સ્થાનિક તૃણમૂલ કોંગ્રેસ (TMC) નેતા શમીમ અહમદના સમર્થકોએ ભાજપ કાર્યકરો પર હુમલો કર્યો હતો. હુમલા દરમિયાન પથ્થરમારો તેમજ દેશી બોમ્બ ફેંકાયા હોવાનું પણ જણાવાયું છે.
ઘટનાની જાણ થતાં જ પોલીસ દળ, કેન્દ્રીય સુરક્ષા દળ તેમજ ક્વિક રિસ્પોન્સ ટીમ (QRT)ને તાત્કાલિક ઘટનાસ્થળે મોકલવામાં આવી હતી. સુરક્ષા દળોએ વિસ્તારમાં ફ્લેગ માર્ચ કરીને પરિસ્થિતિને કાબૂમાં લેવાનો પ્રયાસ કર્યો હતો.
ઘટનાના વિરોધમાં ભાજપ કાર્યકરોએ શિવપુર પોલીસ સ્ટેશન બહાર પ્રદર્શન કર્યું હતું અને આરોપીઓની તાત્કાલિક ધરપકડ કરવાની માંગ કરી હતી. હાલ સમગ્ર વિસ્તારમાં તણાવપૂર્ણ શાંતિ જોવા મળી રહી છે.
હાવડા સિટી પોલીસ કમિશનર અખિલેશ ચતુર્વેદીએ જણાવ્યું કે આ રાજકીય અથડામણનો મામલો છે. પોલીસ સમયસર પહોંચી જતા પરિસ્થિતિ વધુ બગડતી અટકાવી શકાઈ હતી. તેમણે જણાવ્યું કે ઘટનામાં સંડોવાયેલા લોકોની ઓળખ કરીને તેમની સામે કડક કાર્યવાહી કરવામાં આવશે.
બીજી તરફ કાંથી વિસ્તારમાં પણ તૃણમૂલ કોંગ્રેસના નેતા ઉસ્માન ગનીના ઘરે બોમ્બ હુમલો થયાની ઘટના સામે આવી છે. આ હુમલાને કારણે રાજ્યમાં રાજકીય પરિસ્થિતિ વધુ ગરમાઈ ગઈ છે. પોલીસે સમગ્ર મામલે તપાસ શરૂ કરી છે અને હુમલાઓ પાછળ કોઈ રાજકીય કડી છે કે નહીં તે દિશામાં પણ તપાસ ચાલી રહી છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
