PM મોદીનો નવો વૈશ્વિક કીર્તિમાન, 20મી વખત વિદેશી સંસદને કર્યું સંબોધન

વડાપ્રધાન નરેન્દ્ર મોદીએ રવિવારે સેશેલ્સની નેશનલ અસેમ્બલીને સંબોધિત કરીને આંતરરાષ્ટ્રીય સ્તરે વધુ એક ઐતિહાસિક સિદ્ધિ પોતાના નામે નોંધાવી છે. આ સાથે તેઓ વિદેશી ધરતી પર 20મી વખત કોઈ દેશની સંસદને સંબોધન કરનારા વિશ્વના ગણતરીના નેતાઓમાં સામેલ થયા છે.

સેશેલ્સની સંસદને સંબોધિત કરતાં વડાપ્રધાન મોદીએ બંને દેશો વચ્ચેના 50 વર્ષ જૂના મજબૂત સંબંધોની પ્રશંસા કરી હતી. તેમણે કહ્યું કે ભારત અને સેશેલ્સ વચ્ચેનો સંબંધ પરસ્પર વિશ્વાસ, મિત્રતા અને સહિયારા વિકાસના વિઝન પર આધારિત છે. તેમણે સેશેલ્સની જનતાનો ઉષ્માભર્યો આવકાર બદલ આભાર પણ વ્યક્ત કર્યો હતો.

2014થી શરૂ થયો ઐતિહાસિક પ્રવાસ
વડાપ્રધાન નરેન્દ્ર મોદીએ વર્ષ 2014માં સત્તા સંભાળ્યા બાદ વિદેશી સંસદોને સંબોધિત કરવાનો ઐતિહાસિક સિલસિલો શરૂ કર્યો હતો. પ્રથમ કાર્યકાળ દરમિયાન તેમણે ભૂતાન, નેપાળ, ઓસ્ટ્રેલિયા અને ફિજીની સંસદોને સંબોધિત કરી હતી.

ત્યારબાદ વર્ષ 2015માં તેમણે મોરેશિયસ, શ્રીલંકા, મંગોલિયા, બ્રિટન અને અફઘાનિસ્તાનની સંસદોમાં ભારતનું પ્રતિનિધિત્વ કર્યું હતું.

અમેરિકી કોંગ્રેસને બે વખત સંબોધન કરનારા પ્રથમ ભારતીય PM
વર્ષ 2016માં વડાપ્રધાન મોદીએ અમેરિકી કોંગ્રેસના સંયુક્ત સત્રને સંબોધિત કર્યું હતું. ત્યારબાદ વર્ષ 2023માં ફરી એકવાર અમેરિકી કોંગ્રેસના સંયુક્ત સત્રને સંબોધન કરીને તેઓ બે વખત અમેરિકી કોંગ્રેસને સંબોધન કરનારા ભારતના પ્રથમ વડાપ્રધાન બન્યા હતા.

અનેક દેશોની સંસદોમાં ભારતનો અવાજ
વર્ષ 2018માં યુગાન્ડા, 2019માં માલદીવ અને 2024માં ગુયાનાની સંસદમાં વડાપ્રધાન મોદીએ ભારતના દૃષ્ટિકોણને વિશ્વ સમક્ષ રજૂ કર્યો હતો.

વર્ષ 2025 દરમિયાન તેમણે ઘાના, ત્રિનિદાદ અને ટોબેગો, નામીબિયા તેમજ ઇથોપિયાની સંસદોને સંબોધિત કરીને ગ્લોબલ સાઉથ સાથે ભારતના સંબંધોને વધુ મજબૂત બનાવવાનો સંદેશ આપ્યો હતો.

ઇઝરાયેલની સંસદને સંબોધન કરનારા પ્રથમ ભારતીય PM
25 ફેબ્રુઆરી 2026ના રોજ વડાપ્રધાન મોદીએ ઇઝરાયેલની ઐતિહાસિક સંસદ ‘નેસેટ’ (Knesset)ને સંબોધિત કરીને વધુ એક ઇતિહાસ રચ્યો હતો. તેઓ ઇઝરાયેલની સંસદને સંબોધન કરનારા પ્રથમ ભારતીય વડાપ્રધાન બન્યા હતા.

સેશેલ્સમાં રચાયો બેવડો ઇતિહાસ
સેશેલ્સ પ્રવાસ પહેલાં વડાપ્રધાન મોદીએ સોશિયલ મીડિયા પ્લેટફોર્મ X પર જણાવ્યું હતું કે તેઓ સેશેલ્સની નેશનલ અસેમ્બલીને સંબોધન કરનારા પ્રથમ ભારતીય વડાપ્રધાન બનવાના છે, જે બંને દેશોના મજબૂત લોકતાંત્રિક સંબંધોનું પ્રતીક છે.

સંસદને સંબોધન કર્યા બાદ સેશેલ્સના રાષ્ટ્રપતિ ડૉ. પેટ્રિક હર્મિનીએ વડાપ્રધાન મોદીને દેશના સર્વોચ્ચ નાગરિક સન્માન ‘ગાર્ડિયન ઓફ ધ બ્લુ હોરાઇઝન’થી સન્માનિત કર્યા હતા.

એવોર્ડ દેશોને સમર્પિત કર્યો
સન્માન સ્વીકાર્યા બાદ વડાપ્રધાન મોદીએ સેશેલ્સ સરકાર અને ત્યાંની જનતાનો આભાર વ્યક્ત કર્યો હતો. તેમણે આ સન્માન વિશ્વના એવા તમામ દેશોને સમર્પિત કર્યું હતું, જે જળવાયુ પરિવર્તન સામે લડી રહ્યા છે અને પર્યાવરણ સંરક્ષણ માટે સતત કાર્ય કરી રહ્યા છે.