ભારતમાં મેમરી ચિપ ઉદ્યોગને મળશે નવી ગતિ! અનેક કંપનીઓ રોકાણ માટે તૈયાર

ભારતમાં આર્ટિફિશિયલ ઇન્ટેલિજન્સ (AI) અને ડેટા સેન્ટરની વધતી માંગ વચ્ચે મેમરી ચિપ ઉત્પાદન ક્ષેત્રમાં મોટા રોકાણની સંભાવનાઓ ઊભી થઈ રહી છે. કેન્દ્રીય ઇલેક્ટ્રોનિક્સ અને માહિતી પ્રૌદ્યોગિકી મંત્રી અશ્વિની વૈષ્ણવે સંકેત આપ્યા છે કે આગામી સમયમાં અનેક નવી કંપનીઓ ભારતમાં મેમરી ચિપ ઉત્પાદન માટે રોકાણ કરી શકે છે.

મંત્રીએ જણાવ્યું કે વૈશ્વિક સ્તરે હાઈ-બેન્ડવિડ્થ મેમરી (HBM) ચિપ્સની ભારે અછત જોવા મળી રહી છે. ખાસ કરીને AI આધારિત ડેટા સેન્ટરોના ઝડપી વિસ્તરણને કારણે મેમરી ચિપ્સની માંગમાં જબરદસ્ત વધારો થયો છે, જેના કારણે સપ્લાય અને માંગ વચ્ચે મોટું અંતર સર્જાયું છે.

AI અને ડેટા સેન્ટરની માંગથી વધ્યો અવસર
અશ્વિની વૈષ્ણવે જણાવ્યું કે વિશ્વભરમાં AI ટેક્નોલોજીના વધતા ઉપયોગને કારણે મેમરી ચિપ્સનું મહત્વ સતત વધી રહ્યું છે. આ પરિસ્થિતિ ભારત માટે એક મહત્વપૂર્ણ તક સાબિત થઈ શકે છે. તેમણે કહ્યું કે માત્ર નવી કંપનીઓ જ નહીં, પરંતુ હાલ કાર્યરત કંપનીઓ પણ પોતાની ઉત્પાદન ક્ષમતા વધારવા માટે આયોજન કરી રહી છે. કેન્દ્ર સરકાર સેમિકન્ડક્ટર ઇકોસિસ્ટમને મજબૂત બનાવવા માટે સતત નીતિગત અને ઔદ્યોગિક સહયોગ પૂરો પાડી રહી છે.

માઈક્રોનની પ્રથમ યુનિટે શરૂ કર્યું ઉત્પાદન
કેન્દ્રીય મંત્રીએ જણાવ્યું કે Micron Technologyની પ્રથમ યુનિટે 28 ફેબ્રુઆરીથી વ્યાવસાયિક ઉત્પાદન શરૂ કરી દીધું છે. ઉપરાંત બીજી યુનિટ માટે 31 માર્ચથી બાંધકામ કાર્ય પણ શરૂ કરવામાં આવ્યું છે. તેમણે ઉમેર્યું કે વૈશ્વિક સપ્લાય ચેઇનમાં હજુ પણ મેમરી ચિપ્સની અછત યથાવત હોવાથી ભારતમાં વધુ ફેબ્રિકેશન (Fab) અને ATMP (Assembly, Testing, Marking and Packaging) યુનિટ સ્થાપિત થવાની શક્યતા છે.

સેમિકન્ડક્ટર મિશન 2.0માં ચીપ ડિઝાઇન પર ભાર
અશ્વિની વૈષ્ણવે જણાવ્યું કે India Semiconductor Mission 2.0 હેઠળ ચીપ ડિઝાઇનને વિશેષ પ્રાથમિકતા આપવામાં આવશે. સાથે જ સેમિકન્ડક્ટર ઉત્પાદન માટે જરૂરી મશીનો, વિશિષ્ટ ગેસ અને જટિલ રસાયણોના સ્થાનિક ઉત્પાદનને પણ પ્રોત્સાહન આપવામાં આવશે.

ભારત બનશે વૈશ્વિક સેમિકન્ડક્ટર હબ?
મંત્રીએ જણાવ્યું કે ભારતમાં ઉપલબ્ધ કુશળ ટેક્નિકલ માનવશક્તિ, મજબૂત વીજ પુરવઠો અને નવીનીકરણીય ઊર્જાની વધતી ક્ષમતા વૈશ્વિક ટેક કંપનીઓને આકર્ષી રહી છે. જેના પરિણામે AI, ડેટા સેન્ટર અને સેમિકન્ડક્ટર ક્ષેત્રમાં મોટા પ્રમાણમાં રોકાણ આવવાની શક્યતા છે. વિશેષજ્ઞોનું માનવું છે કે જો સરકારની નીતિઓ અને ઉદ્યોગનો સહયોગ યથાવત રહેશે તો આગામી વર્ષોમાં ભારત વૈશ્વિક સેમિકન્ડક્ટર અને મેમરી ચિપ ઉત્પાદન ક્ષેત્રમાં મહત્વનું કેન્દ્ર બની શકે છે.

 

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276