Bindia
1 જુલાઈ 2026થી એલપીજી ગેસ અને પેટ્રોલ-ડીઝલને લગતા કેટલાક મહત્વપૂર્ણ નિયમોમાં ફેરફાર થવા જઈ રહ્યા છે. કેન્દ્ર સરકારના નવા નિયમો મુજબ LPG ગ્રાહકો માટે E-KYC ફરજિયાત રહેશે, જ્યારે પાઈપલાઈન ગેસ (PNG) ઉપલબ્ધ વિસ્તારોમાં LPG કનેક્શન અંગે પણ નવા નિયમો લાગુ થશે. બીજી તરફ પેટ્રોલ અને ડીઝલના વેચાણ પર લાગુ કરાયેલી 200 લીટરની મર્યાદા પણ હટાવવામાં આવશે.
PNG ઉપલબ્ધ હોય તો LPG કનેક્શન બંધ થઈ શકે
નવી વ્યવસ્થા અનુસાર, જ્યાં પાઈપલાઈન નેચરલ ગેસ (PNG)ની સુવિધા ઉપલબ્ધ છે, ત્યાંના ગ્રાહકોને PNG તરફ સ્થળાંતર કરવાનું રહેશે. જો કોઈ ગ્રાહક પહેલેથી જ PNG કનેક્શનનો ઉપયોગ કરી રહ્યો હોય, તો તેનું LPG કનેક્શન એક મહિનાની અંદર બંધ કરવામાં આવી શકે છે. જો ગ્રાહક સ્વૈચ્છિક રીતે LPG કનેક્શન સરેન્ડર કરશે તો તેને એક કૂપન આપવામાં આવશે, જેના આધારે ભવિષ્યમાં જરૂર પડ્યે ફરીથી LPG કનેક્શન શરૂ કરાવી શકાશે.
30 જૂન સુધી E-KYC ફરજિયાત
તમામ ઘરેલુ LPG ગ્રાહકો માટે E-KYC પ્રક્રિયા પૂર્ણ કરવી ફરજિયાત કરવામાં આવી છે. જો ગ્રાહક 30 જૂન સુધી E-KYC નહીં કરાવે તો તેનું ગેસ કનેક્શન બ્લોક થઈ શકે છે અને નવા સિલિન્ડરની બુકિંગમાં મુશ્કેલી આવી શકે છે. જેમણે પહેલેથી જ E-KYC પૂર્ણ કરી દીધી છે, તેમને કોઈ વધારાની કાર્યવાહી કરવાની જરૂર રહેશે નહીં.
પેટ્રોલ-ડીઝલ પરની 200 લીટરની મર્યાદા દૂર થશે
સરકારે 12 જૂનથી એક વાહન માટે પ્રતિદિન વધુમાં વધુ 200 લીટર પેટ્રોલ અથવા ડીઝલ ખરીદવાની મર્યાદા લાગુ કરી હતી. આ નિર્ણયનો હેતુ મોટા જથ્થામાં ઇંધણ ખરીદતા બલ્ક ગ્રાહકોને રિટેલ પેટ્રોલ પંપનો ઉપયોગ કરતા અટકાવવાનો હતો. પરંતુ આ નિયમને કારણે ટ્રાન્સપોર્ટર્સ અને મોટા વાહન માલિકોને મુશ્કેલીનો સામનો કરવો પડતો હતો. હવે સરકારે આ મર્યાદા હટાવવાનો નિર્ણય લીધો છે.
1 જુલાઈથી ગ્રાહકોને મળશે રાહત
1 જુલાઈથી પેટ્રોલ પંપો પર 200 લીટરની મર્યાદા સંપૂર્ણપણે દૂર કરવામાં આવશે. ત્યારબાદ ગ્રાહકો પોતાની જરૂરિયાત મુજબ કોઈપણ મર્યાદા વગર પેટ્રોલ અથવા ડીઝલ ખરીદી શકશે. આ નિર્ણયથી ખાસ કરીને ટ્રાન્સપોર્ટ કંપનીઓ, બસ ઓપરેટરો અને ભારે વાહનોના માલિકોને મોટી રાહત મળશે.
LPG સિલિન્ડર બુકિંગમાં પણ મળી શકે રાહત
હાલમાં ઘરેલુ LPG સિલિન્ડર માટે શહેરોમાં અંદાજે 25 દિવસ અને ગ્રામ્ય વિસ્તારોમાં 45 દિવસ સુધી રાહ જોવી પડે છે. પશ્ચિમ એશિયામાં તણાવ ઘટતા સરકારે કોમર્શિયલ ગેસ સંબંધિત કેટલાક પ્રતિબંધોમાં રાહત આપી છે. તેના કારણે 1 જુલાઈ બાદ ઘરેલુ LPG સિલિન્ડરની બુકિંગ અને ડિલિવરીનો સમય પણ ઘટી શકે તેવી શક્યતા છે. જોકે, આ અંગે સરકાર તરફથી હજુ સુધી કોઈ સત્તાવાર જાહેરાત કરવામાં આવી નથી.
ગ્રાહકો માટે શું મહત્વનું?
– 30 જૂન સુધી LPG E-KYC પૂર્ણ કરવી જરૂરી.
– PNG ઉપલબ્ધ હોય તો LPG કનેક્શન અંગે નવા નિયમોનું પાલન કરવું.
– 1 જુલાઈથી પેટ્રોલ-ડીઝલ ખરીદી પર 200 લીટરની મર્યાદા દૂર થશે.
– LPG સિલિન્ડર બુકિંગ પ્રક્રિયામાં પણ આગામી દિવસોમાં રાહત મળવાની શક્યતા છે.
1 જુલાઈથી અમલમાં આવનારા આ નવા નિયમોનો સીધો અસર લાખો LPG ગ્રાહકો તેમજ પેટ્રોલ-ડીઝલનો ઉપયોગ કરતા વાહનચાલકો પર પડશે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
