ઇઝરાયલનો લેબનોન પર મોટો હુમલો, બેરૂતમાં હિઝબુલ્લાહના કમાન્ડ સેન્ટરને નિશાન બનાવ્યાનો દાવો

મધ્ય પૂર્વમાં ફરી એકવાર તણાવ વધી ગયો છે. ઇઝરાયલી સેનાએ લેબનોનની રાજધાની બેરૂતના દક્ષિણ ઉપનગર વિસ્તારમાં હવાઈ હુમલો કરીને હિઝબુલ્લાહના કમાન્ડ સેન્ટરને નિશાન બનાવ્યાનો દાવો કર્યો છે. હુમલો એવા વિસ્તારમાં કરવામાં આવ્યો હતો જેને હિઝબુલ્લાહનો મુખ્ય ગઢ માનવામાં આવે છે.

નેતન્યાહૂ અને સંરક્ષણ પ્રધાનનું સંયુક્ત નિવેદન
ઇઝરાયલના વડા પ્રધાન બેન્જામિન નેતન્યાહૂ અને સંરક્ષણ પ્રધાન ઇઝરાયલ કાત્ઝએ સંયુક્ત નિવેદનમાં જણાવ્યું કે આ કાર્યવાહી ઉત્તર ઇઝરાયલ પર હિઝબુલ્લાહ દ્વારા કરવામાં આવેલા ગોળીબારના જવાબરૂપે કરવામાં આવી હતી. ઇઝરાયલી વડા પ્રધાન કાર્યાલય દ્વારા જાહેર કરાયેલા નિવેદન અનુસાર, નેતન્યાહૂ અને કાત્ઝની સૂચનાના આધારે ઇઝરાયલી સંરક્ષણ દળોએ બેરૂતના દહિયેહ વિસ્તારમાં સ્થિત આતંકવાદી કમાન્ડ સેન્ટર પર ચોક્કસ નિશાન બનાવીને હુમલો કર્યો હતો.

યુદ્ધવિરામ બાદ ફરી વધ્યો તણાવ
આ હુમલો એવા સમયે થયો છે જ્યારે ઇઝરાયલ અને લેબનોન વચ્ચે અમેરિકાની મધ્યસ્થીથી થયેલા યુદ્ધવિરામ બાદ વિસ્તારમાં શાંતિ જળવાઈ રહેવાની આશા વ્યક્ત કરવામાં આવી રહી હતી. જોકે તાજેતરના ગોળીબાર અને સૈન્ય કાર્યવાહીઓ બાદ બંને પક્ષો વચ્ચે ફરી તણાવ વધી રહ્યો છે. રસપ્રદ બાબત એ છે કે થોડા દિવસો અગાઉ જ અમેરિકાના રાષ્ટ્રપતિ ડોનાલ્ડ ટ્રમ્પએ બેરૂતના દક્ષિણ ઉપનગરો પર હુમલા અંગે ઇઝરાયલને સાવચેતી રાખવાની સલાહ આપી હતી. તેમ છતાં ઇઝરાયલે આ કાર્યવાહી હાથ ધરી છે.

બે રહેણાંક ઇમારતોને થયું નુકસાન
લેબનોનની સરકારી સમાચાર એજન્સીના અહેવાલ મુજબ, ઇઝરાયલી હુમલામાં દહિયેહ વિસ્તારમાં આવેલી બે રહેણાંક ઇમારતોના ફ્લેટોને નિશાન બનાવવામાં આવ્યા હતા. હુમલા બાદ વિસ્તારમાં ભારે ધડાકા સંભળાયા હતા અને અનેક સ્થળોએ ધુમાડાના ગોટેગોટા જોવા મળ્યા હતા. પ્રત્યક્ષદર્શીઓના જણાવ્યા અનુસાર, હિઝબુલ્લાહના પ્રભાવવાળા દહિયેહ વિસ્તારમાં એક બહુમાળી ઇમારતને સીધી અસર પહોંચી હતી, જેના કારણે સ્થાનિક રહેવાસીઓમાં ભયનો માહોલ સર્જાયો હતો.

સ્થિતિ પર વિશ્વની નજર
હુમલા બાદ લેબનોન અને ઇઝરાયલ વચ્ચેની સ્થિતિ વધુ સંવેદનશીલ બની છે. અત્યાર સુધી જાનહાનિ અંગે સત્તાવાર માહિતી જાહેર કરવામાં આવી નથી, પરંતુ આંતરરાષ્ટ્રીય સમુદાય અને વૈશ્વિક નેતાઓ સમગ્ર ઘટનાક્રમ પર નજીકથી નજર રાખી રહ્યા છે. મધ્ય પૂર્વમાં વધતા તણાવ વચ્ચે આ હુમલો વિસ્તારની સુરક્ષા અને સ્થિરતા માટે નવી ચિંતાઓ ઊભી કરી રહ્યો છે.

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276