પીએમ મોદીની અપીલની અસર: મહારાષ્ટ્ર સરકારનું પ્રતિનિધિમંડળ કાન્સ ફિલ્મ ફેસ્ટિવલમાં નહીં જાય

મિડલ ઈસ્ટમાં વધતા તણાવ અને વૈશ્વિક ઉર્જા સંકટ વચ્ચે વડાપ્રધાન નરેન્દ્ર મોદી દ્વારા દેશવાસીઓને સંયમપૂર્વક ખર્ચ અને અનાવશ્યક વિદેશ પ્રવાસ ટાળવાની અપીલનો સીધો પ્રભાવ હવે રાજ્ય સરકારોના નિર્ણયો પર પણ જોવા મળી રહ્યો છે. આ અપીલને અનુસરીને મહારાષ્ટ્ર સરકારે એક મહત્વપૂર્ણ નિર્ણય લઈને પોતાનું પ્રતિનિધિમંડળ ફ્રાન્સના પ્રતિષ્ઠિત Cannes Film Festivalમાં મોકલવાનું રદ કર્યું છે.

સાંસ્કૃતિક મંત્રીનો નિર્ણય જાહેર
મહારાષ્ટ્રના સાંસ્કૃતિક કાર્યમંત્રી આશિષ સેલારે જણાવ્યું કે રાજ્ય સરકારનું ડેલિગેશન કાન્સ ફિલ્મ ફેસ્ટિવલમાં ભાગ લેવા જવાનું હતું, પરંતુ રાષ્ટ્રીય હિત અને વર્તમાન આર્થિક પરિસ્થિતિને ધ્યાનમાં રાખીને પ્રવાસ રદ કરવાનો નિર્ણય લેવાયો છે. તેમણે જણાવ્યું કે વડાપ્રધાનની અપીલને ગંભીરતાથી લેવામાં આવી છે અને ખર્ચમાં સંયમ રાખવો જરૂરી છે. તેમણે સ્પષ્ટ કર્યું કે ફેસ્ટિવલમાં ભાગ લેનારી મરાઠી ફિલ્મો અને સંબંધિત પ્રતિનિધિઓ માટે જરૂરી સહયોગ યથાવત રહેશે, જેથી ભારતીય સિનેમાની હાજરી આંતરરાષ્ટ્રીય મંચ પર જળવાઈ રહે.

ખર્ચમાં ઘટાડા પર ભાર
સરકારે આ નિર્ણય સાથે સાથે અન્ય ખર્ચ ઘટાડવાના પગલાં પણ સૂચવ્યા છે. હવે ઓછામાં ઓછા સરકારી વાહનોનો ઉપયોગ, વર્ચ્યુઅલ બેઠકઓ અને અનાવશ્યક પ્રવાસ ટાળવા પર ભાર મૂકવામાં આવ્યો છે. અધિકારીઓને પણ સંસાધનોના વિવેકપૂર્ણ ઉપયોગ માટે સૂચના આપવામાં આવી છે.

ઉલ્લેખનીય છે કે કાન્સ ફિલ્મ ફેસ્ટિવલ દર વર્ષે ફ્રાન્સના કાન્સ શહેરમાં યોજાતો વિશ્વપ્રસિદ્ધ આંતરરાષ્ટ્રીય ફિલ્મ મહોત્સવ છે, જ્યાં ફિલ્મ ઉદ્યોગના મોટા નામો અને વિવિધ દેશોના પ્રતિનિધિઓ ભાગ લે છે. આ વર્ષે આ મહોત્સવ 13 મે થી 24 મે સુધી ચાલી રહ્યો છે. સરકારના આ નિર્ણયને કેટલાક વર્ગો દ્વારા આર્થિક સંયમ અને રાષ્ટ્રીય પ્રાથમિકતાઓને આગળ રાખવાનો સંકેત તરીકે જોવામાં આવી રહ્યો છે, જ્યારે ફિલ્મ જગત સાથે જોડાયેલા લોકો તેને સંયમપૂર્ણ પરંતુ અસરકારક પગલું માને છે.