Bindia
પંકજ મકવાણા – અમદાવાદ,
રાજકોટ: ભારતીય સંસ્કૃતિમાં ગુરુ અને શિષ્યના સંબંધને પવિત્ર માનવામાં આવે છે, પણ રાજકોટમાં એક કળયુગી શિષ્યએ આ મર્યાદાના લીરેલીરા ઉડાવ્યા છે. જે હાથે ક્યારેક પાટી-પેન પકડાવી હતી, એ જ હાથોમાં આજે પોલીસની હથકડી પહેરાવવાનો વારો આવ્યો છે. પોતાની જ પૂર્વ શિક્ષિકાને પ્રેમજાળમાં ફસાવી, દોઢ વર્ષ સુધી પત્નીની જેમ રાખી, લાખો રૂપિયા પડાવીને છેલ્લે “તમે કોણ છો?” કહી તરછોડી દેનાર ધ્રુવલ પંકજભાઈ દેસાઈની કરતૂત જાણીને તમે પણ ફીટકાર વર્ષાવશો.
સોશિયલ મીડિયાથી શરૂ થઈ ‘શિકાર’ કરવાની રમત!
વાતની શરૂઆત થાય છે જૂન 2024માં. 2012માં ધોરણ 10માં અભ્યાસ કરતો ધ્રુવલ દેસાઈ અચાનક ફેસબુક પર પોતાની પૂર્વ શિક્ષિકાનો સંપર્ક કરે છે. શિક્ષિકા ડિવોર્સી છે અને એકલી રહે છે તેની જાણ થતા જ ધ્રુવલે ‘લગ્નની લાલચ’નું એવું માયાવી જાળ બિછાવ્યું કે શિક્ષિકા તેમાં ફસાઈ ગઈ. 12 વર્ષ નાના શિષ્યએ ગુરુ સામે પ્રેમનો પ્રસ્તાવ મૂક્યો અને શરૂ થયો અત્યાચારનો દોર.
થાઈલેન્ડની સફર અને ‘પત્ની’ જેવો વ્યવહાર: માત્ર એક દેખાડો?
ધ્રુવલની ચાલાકીનો અંદાજ એ વાત પરથી લગાવી શકાય છે કે તે દિવસમાં ત્રણ વાર શિક્ષિકાના ઘરે જતો હતો. તેમને ચારધામની યાત્રા કરાવી, 10 દિવસ માટે થાઈલેન્ડ લઈ ગયો અને પડોશીઓ ખબર ન પડે તેમ અને ભોગ બનનારના પરિવારને‘પત્ની’ની જેમ ટ્રીટ કરતો રહ્યો. આટલું ઓછું હોય તેમ, વિદેશમાં સ્થાયી થવાના બહાને શિક્ષિકાની નોકરી પણ છોડાવી દીધી.
“જેના પર ભરોસો મૂકીને ઓસ્ટ્રેલિયા જવાના સપના જોયા, તે જ શિષ્યએ ગુરુની જિંદગીને નરક બનાવી દીધી.”
PF ના પૈસા અને સોનું પણ સ્વાહા: 7 લાખની છેતરપિંડી:
પ્રેમમાં આંધળી બનેલી શિક્ષિકાએ ધ્રુવલને પોતાના પીએફ (PF) ના અઢી લાખ, રોકડા બે લાખ અને સોના-ચાંદીના દાગીના વેચીને કુલ 7 લાખ રૂપિયાની મદદ કરી. ધ્રુવલ દેસાઈ, જે અમૂલ પાર્લર ચલાવે છે, તેણે આ પૈસા ધંધામાં ખોટના બહાને ખંખેરી લીધા હતા.
ભાંડો ફૂટ્યો અને બદલાઈ ગયો મિજાજ:
પાપનો ઘડો ત્યારે ભરાયો જ્યારે ધ્રુવલની સગાઈ અન્ય યુવતી સાથે થઈ ગઈ હોવાની જાણ શિક્ષિકાને થઈ. જ્યારે શિક્ષિકાએ લગ્નનું દબાણ કર્યું, ત્યારે માર્ચ 2025માં સગાઈ કરી લેનાર ધ્રુવલે ડિસેમ્બર સુધી સંબંધ ચાલુ રાખ્યા અને છેલ્લે મોઢું ફેરવી લીધું. જે શિક્ષિકાના ઘરે રાતો વિતાવતો હતો, તેને પોતાની દુકાને જોઈને કહેવા લાગ્યો “હું તમને ઓળખતો નથી, તમે કોણ છો? અહીંથી નીકળો!”
પોલીસની ભૂમિકા સામે સવાલો: 2.5 મહિના સુધી કેમ થઈ ઢીલ?
આ સમગ્ર કેસમાં ગાંધીગ્રામ પોલીસની કામગીરી પણ શંકાના દાયરામાં છે. પીડિતાએ જાન્યુઆરી 2026માં અરજી આપી હોવા છતાં, પોલીસે ગુનો નોંધવામાં અઢી મહિનાનો સમય કાઢી નાખ્યો. તપાસના નામે પીડિતાને ધક્કા ખવડાવવામાં આવ્યા, જે રાજકોટ પોલીસની ગંભીર બેદરકારી સૂચવે છે.
મુખ્ય મુદ્દાઓ:
– આરોપી: ધ્રુવલ પંકજભાઈ દેસાઈ (રાજકોટ).
– ગુનો: લગ્નની લાલચ આપી દુષ્કર્મ અને લાખોની છેતરપિંડી.
– ફરિયાદમાં નોંધાયેલી કલમો: BNS ની કલમ 64(2)(M), 69, 316(2) હેઠળ ગુનો દાખલ.
– વિગત: 12 વર્ષ નાના પૂર્વ વિદ્યાર્થીએ સોશિયલ મીડિયા દ્વારા સંપર્ક કરી રમત આદરી!
હવે જોવાનું એ રહે છે કે, શું કાયદો આ કળયુગી શિષ્યને કડકમાં કડક સજા અપાવશે? અને શું પીડિતાને તેના હકના નાણાં પરત મળશે?
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
